Shani Vakri 2026: రాబోయే 4 నెలలు వారికి గోల్డెన్ డేస్..! లిస్ట్లో మీ రాశి ఉందా..?
Saturn Retrograde 2026: జూలై 27, 2026 నుంచి శని దేవుడు మీన రాశిలో వక్ర గమనాన్ని ప్రారంభించనున్నాడు. నాలుగు మాసాలకు పైగా.. అంటే డిసెంబర్ 11 వరకు సాగే ఈ 138 రోజుల కాలం కొన్ని రాశుల వారికి శుభ ఫలితాలు, పెండింగ్ పనుల పూర్తి, బాకీల వసూళ్లకు అనుకూలంగా ఉంటుంది. మరికొన్ని రాశుల వారు ఆర్థిక, వ్యక్తిగత నిర్ణయాల్లో మరింత జాగ్రత్తగా వ్యవహరించాలని జ్యోతిష్య నిపుణులు సూచిస్తున్నారు.
Updated on: Jul 25, 2026 | 12:38 PM
జ్యోతిష్య శాస్త్రంలో శని దేవుడిని కర్మఫలదాత అని పిలుస్తారు. అంటే మన కర్మలకు తగిన ప్రతిఫలాన్ని ఇచ్చే గ్రహం. జూలై 27, 2026 నుండి శని గ్రహం మీన రాశిలో వక్ర గమనం చేయనుంది. దాదాపు 138 రోజుల పాటు (డిసెంబర్ 11, 2026 వరకు) శని ఇదే స్థానంలో కొనసాగుతాడు. అంటే దాదాపు నాలుగు మాసాలకు పైగా కొన్ని రాశుల వారికి శనిదేవుడు వరాలు ఇవ్వనున్నాడు. ఈ రాశుల వారు కొత్త పనుల కంటే కూడా.. పాత బాకీలు వసూలు చేసుకోవడానికి, పెండింగ్ పనులు పూర్తి చేసుకునేందుకు, గతంలో తీసుకున్న నిర్ణయాలను సమీక్షించుకోవడానికి శనిదేవుడు అవకాశం ఇస్తాడని జ్యోతిష్య నిపుణులు చెప్తున్నారు. అదే సమయంలో కొన్ని రాశుల వారు కాస్త జాగ్రత్తగా ఉండటం మంచిది. ఆర్థిక వ్యవహారాలతో ఇతర కీలక విషయాల్లో వారు క్రమశిక్షణ, సహనం, జాగ్రత్తగా నిర్ణయాలు తీసుకోవాలి.
శని వక్ర గమనంతో ఈ రాశుల వారికి ఊరట..
మకర రాశి & కుంభ రాశి:
ఈ రెండు రాశులకు అధిపతి శనిదేవుడే. శని వక్ర గమనం కారణంగా గత కొంత కాలంగా నిలిచిపోయిన పనుల్లో వేగం పెరుగుతుంది. ఉద్యోగంలో ఎదుర్కొంటున్న ఇబ్బందులు తగ్గుతాయి. పాత పెట్టుబడుల నుండి లాభాలు రావడం లేదా అప్పుగా ఇచ్చిన డబ్బు తిరిగి చేతికి అందే సూచనలు ఉన్నాయి.
వృషభ రాశి:
శని వక్ర గమనం కారణంగా ఈ రాశి వారికి వ్యాపార, ఉద్యోగ రంగాల్లో క్రమంగా పురోగతి కనిపిస్తుంది. దీర్ఘకాలంగా కొనసాగుతున్న ప్రాజెక్టులను విజయవంతంగా పూర్తి చేస్తారు. చాలా కాలంగా వేసుకున్న ప్రణాళికలు నెరవేరుతాయి. మీకు పెద్దలు లేదా పై అధికారుల మద్దతు లభిస్తుంది.
మిథున రాశి:
కెరీర్కు సంబంధించి సానుకూల మార్పులు చూస్తారు. గతంలో చేసిన కష్టానికి తగిన ప్రతిఫలం లభించడం ప్రారంభిస్తుంది. అయితే తొందరపాటు నిర్ణయాలు తీసుకోకూడదు. ఏదైన ఓపికతో ఒకటికి రెండుసార్లు ఆలోచించి నిర్ణయాలు తీసుకోవాలి.
ఈ రాశుల వారు జాగ్రత్తగా ఉండాలి:
మీన రాశి:
శని మీన రాశిలోనే వక్రీకరిస్తున్నందున బాధ్యతలు పెరిగే అవకాశముంది. పని ఒత్తిడితో కాస్త ఇబ్బందిపడే అవకాశముంది. ఏదైనా పెద్ద నిర్ణయం తీసుకునే ముందు బాగా ఆలోచించి అడుగు వేయడం శ్రేయస్కరం.
కర్కాటక రాశి:
ఖర్చులు పెరగడం వల్ల మానసిక ఒత్తిడికి లోనయ్యే అవకాశం ఉంది. కుటుంబానికి, ఉద్యోగానికి మధ్య సమతుల్యత పాటించాలి. అనవసర వివాదాలకు దూరంగా ఉండటం మంచిది.
సింహ రాశి:
ఉద్యోగం, వ్యాపారంలో ఓర్పు చాలా అవసరం. కొత్త పెట్టుబడులు పెట్టేటప్పుడు లేదా ఆర్థిక నిర్ణయాలు తీసుకునేటప్పుడు జాగ్రత్త అవసరం. చిన్న విషయాలకే కోపపడటం వల్ల నష్టం వాటిల్లుతుంది.
శని వక్ర సంచార సమయంలో ఏం చేయాలి?
శని దేవుడి కటాక్షం కోసం.. నిలిచిపోయిన లేదా అసంపూర్తిగా ఉన్న పనులను పూర్తి చేయడంపై దృష్టి పెట్టండి. మీ బాధ్యతల నుండి పారిపోకుండా, కష్టపడి పనిచేసే గుణాన్ని (క్రమశిక్షణను) అలవర్చుకోండి. పెద్దలను, పేదలను, అవసరంలో ఉన్న వారిని గౌరవించండి. ఆలోచించకుండా పెద్ద మొత్తంలో ఆర్థిక నిర్ణయాలు తీసుకోవద్దు.
