ఒక్క ఎకరంతో మొదలై.. 100కు పైగా దేశాల్లో సేవలు.. శ్రీ సత్యసాయి ట్రస్ట్ గురించి ఇవి తెలుసా..?
శ్రీ సత్యసాయి బాబా 100వ జయంతి వేడుకలు వైభవంగా జరుగుతున్నాయి. ఆయన దైవత్వాన్ని చాటిన మానవ సేవా కార్యక్రమాలు ప్రపంచవ్యాప్తంగా విస్తరించాయి. విద్య, వైద్యం, తాగునీరు వంటి రంగాలలో సాయి ట్రస్ట్ అందించిన సేవలు కోట్లాది మంది భక్తులను ఆకర్షించాయి. ఈ మహోత్సవానికి దేశ, విదేశాల నుండి ప్రముఖులు, భక్తులు పెద్ద సంఖ్యలో తరలివచ్చారు.
మానవ సేవ ద్వారా దైవత్వాన్ని చాటిన పుట్టపర్తి శ్రీ సత్యసాయి బాబా 100వ జయంతి వేడుకలు పుట్టపర్తిలో అత్యంత ఘనంగా జరుగుతున్నాయి. గత పది రోజులుగా జరుగుతున్న ఈ శతజయంతి ఉత్సవాలు సంబరాలు అంబరాన్ని అంటాయి. ఈ వేడుకలకు దేశంలోని ప్రముఖ నాయకులు, వేలాది మంది భక్తులు తరలివచ్చారు. సత్యసాయి బాబా దైవగతులైన తర్వాత జరుగుతున్న అతిపెద్ద జయంతి వేడుకలు ఇవి. బాబా వందేళ్లు బతుకుతానని చెప్పినప్పటికీ 90 ఏళ్లకే దేహాన్ని విడిచిపెట్టడం భక్తులను శోకంలో ముంచినా, ఆయన శతజయంతిని అత్యంత భక్తిశ్రద్ధలతో జరుపుకుంటున్నారు. ఈ సందర్భంగా పుట్టపర్తి పట్టణం ముస్తాబైంది. ఈ మహోత్సవంలో భారత రాష్ట్రపతి, ఉపరాష్ట్రపతి, ప్రధానమంత్రి, రెండు తెలుగు రాష్ట్రాల ముఖ్యమంత్రులు, ఇతర రాష్ట్రాల ముఖ్యమంత్రులు, గవర్నర్లు పుట్టపర్తికి విచ్చేశారు. ఇది సత్యసాయి బాబా సేవలకు లభించిన అరుదైన గౌరవంగా భక్తులు భావిస్తున్నారు.
సత్యసాయి బాబా సేవలు, ట్రస్ట్ కార్యకలాపాలు కేవలం ఒక్క ఎకరం పొలంతో ప్రారంభం కావడం విశేషం. ఈ విషయాన్ని బాబా స్వయంగా ఓ సందర్భంలో తెలియజేశారు. ఉరవకొండలో జన్మించిన బాబా పుట్టపర్తికి వచ్చిన తర్వాత ఆయన సేవలకు తొలిసారిగా సాయం చేసింది సుబ్బాయమ్మ అనే మహిళ. పుట్టపర్తిలోని సత్యమ్మ దేవాలయం వద్ద సుబ్బాయమ్మ అనే మహిళ సత్యసాయి బాబాకు ఒక ఎకరం పొలాన్ని తన సేవలు కొనసాగించడానికి తొలి విరాళంగా ఇచ్చింది. అలా ఒక ఎకరం పొలంతో మొదలైన సత్యసాయి బాబా సేవా కార్యక్రమాలు నేడు ప్రపంచవ్యాప్తంగా 100కు పైగా దేశాలకు విస్తరించాయి. విద్య, వైద్యం, తాగునీరు వంటి రంగాల్లో సత్యసాయి ట్రస్ట్ అందించే సేవలు కోట్లాది మంది భక్తులను ఆయనకు సంపాదించి పెట్టాయి.
అనంతపురం దాహార్తిని తీర్చిన మహానుభావుడు
సత్యసాయి బాబా చేసిన అపార సేవల్లో ముఖ్యంగా చెప్పుకోవలసింది కరువు జిల్లాగా పేరొందిన అనంతపురం జిల్లాకు మంచినీటిని అందించడం. ఈ ప్రాంత ప్రజల దాహార్తిని తీర్చిన మహానుభావుడిగా ఆయన చిరస్మరణీయులు. మన దేశంతో పాటు ప్రపంచంలోని ఇతర దేశాల నుండి కూడా పెద్ద ఎత్తున సాయి భక్తులు పుట్టపర్తికి తరలివచ్చి, తమ గురుదేవుని శతజయంతి వేడుకల్లో పాల్గొంటున్నారు. ఈ వేడుకలు అత్యంత రమణీయంగా, అంగరంగ వైభవంగా కొనసాగుతున్నాయి.
