Andhra: యాడ లేని పాము మన దగ్గరే.. పచ్చరంగు త్రాచును మీరెప్పుడైనా చూస్తిరా..?

Green Cobra

శేషాచలం అటవీ ప్రాంతం జీవవైవిధ్యానికి నిలయంగా పేరుగాంచింది. అనేక అరుదైన వృక్ష, జంతు జాతులు నివసించే ఈ ప్రాంతంలో తాజాగా తిరుమలలో ఒక అరుదైన పచ్చ నాగుపాము కనిపించడం ఆసక్తికరంగా మారింది. సాధారణంగా నాగుపాములు బూడిద రంగులో ఉంటాయి. అయితే ఈ పాము పూర్తిగా పచ్చ రంగులో ఉండటం ప్రత్యేకంగా నిలిచింది. దాదాపు రెండు అడుగులకుపైగా పొడవున్న ఈ పాము పడగ విప్పి కనిపించింది. సమాచారం అందుకున్న టీటీడీ ఫారెస్ట్ విభాగంలో కాంట్రాక్ట్ ఉద్యోగిగా పనిచేస్తున్న స్నేక్ క్యాచర్ భాస్కర్ నాయుడు వెంటనే అక్కడికి చేరుకుని పామును సురక్షితంగా పట్టుకున్నారు. ఇది నాగుపాము జాతికి చెందినదిగా, అత్యంత విషపూరితమైనదిగా ఆయన తెలిపారు. అనంతరం దానిని శేషాచలం అటవీ ప్రాంతంలో వదిలిపెట్టారు.

ఇదిలా ఉండగా, తిరుపతిలోని శ్రీ వెంకటేశ్వర ఆయుర్వేద కాలేజీలో మరో పాము కనిపించడం కలకలం రేపింది. కాలేజీ ప్రాంగణంలో దాదాపు ఆరు అడుగుల పొడవున్న జర్రిపోతు కనిపించడంతో సిబ్బంది అప్రమత్తమై టీటీడీ ఫారెస్ట్ అధికారులకు సమాచారం ఇచ్చారు. వెంటనే ఘటనాస్థలానికి చేరుకున్న స్నేక్ క్యాచర్ భాస్కర్ నాయుడు స్టిక్ సహాయంతో పామును సురక్షితంగా పట్టుకుని బ్యాగులో ఉంచి శేషాచలం అటవీ ప్రాంతంలో విడిచిపెట్టారు. దీంతో కాలేజీ సిబ్బంది, విద్యార్థులు ఊపిరి పీల్చుకున్నారు.