జీడిమామిడి తోటలో ఏం జరిగింది..? శవాలుగా తల్లీకూతురు.. ఉలిక్కిపడ్డ ఏలూరు..
ఏలూరు జిల్లా ఉంగుటూరు మండలం నల్లమాడు గ్రామ శివారులోని జీడిమామిడి తోటలో తల్లి, కుమార్తె మృతదేహాలు లభ్యమవడం కలకలం రేపింది. తూర్పుగోదావరి జిల్లా అనంతపల్లికి చెందిన మద్దా అంతోభాయి (62), ఆమె అంధురాలైన కుమార్తె మద్దా వెంకటలక్ష్మి (46) అనుమానాస్పద పరిస్థితుల్లో మృతి చెందారు. మే 29 నుంచి అదృశ్యమైన వీరిద్దరూ సోమవారం తోటలో శవాలుగా కనిపించడంతో కుటుంబ సభ్యులు, స్థానికులు దిగ్భ్రాంతికి గురయ్యారు.
ఏలూరు: ఏలూరు జిల్లా ఉంగుటూరు మండలం నల్లమాడు గ్రామ శివారులో సోమవారం ఉదయం తీవ్ర కలకలం రేగింది. స్థానిక జీడిమామిడి తోటలో తల్లి, కుమార్తెల మృతదేహాలు లభ్యమవడం స్థానికంగా సంచలనంగా మారింది. నిర్మానుష్య ప్రాంతంలో పడి ఉన్న వీరి మృతదేహాలను చూసిన స్థానికులు భయాందోళనలకు గురై తక్షణమే పోలీసులకు సమాచారం అందించారు. రంగంలోకి దిగిన పోలీసులు దీనిని అనుమానాస్పద మృతిగా కేసు నమోదు చేసి దర్యాప్తును ముమ్మరం చేశారు. పోలీసుల ప్రాథమిక విచారణలో మృతులు తూర్పుగోదావరి జిల్లా నల్లజర్ల మండలం అనంతపల్లి గ్రామానికి చెందినవారిగా తేలింది. వారిని మద్దా అంతోభాయి (62), ఆమె కుమార్తె మద్దా వెంకటలక్ష్మి (46)గా గుర్తించారు. మృతురాలైన వెంకటలక్ష్మి పుట్టుకతోనే అంధురాలు.. ఆమె ఏలూరు మున్సిపల్ కార్పొరేషన్లో స్వీపర్గా విధులు నిర్వహిస్తూ జీవనం సాగిస్తోంది. అంధురాలైన కుమార్తెకు తోడుగా ఉంటూ తల్లి అంతోభాయి ఆమె బాగోగులు చూసుకునేది. ఈ క్రమంలో వీరిద్దరూ ఒక్కసారిగా శవాలై తేలడం పట్ల బంధువులు, స్థానికులు తీవ్ర దిగ్భ్రాంతిని వ్యక్తం చేస్తున్నారు.
మిస్టరీగా మారిన అదృశ్యం.. తోటలో శవాలుగా లభ్యం..
కుటుంబ సభ్యులు తెలిపిన వివరాల ప్రకారం.. గత నెల మే29న తల్లి, కుమార్తె ఇద్దరూ కలిసి వ్యక్తిగత పనుల నిమిత్తం ఇంటి నుంచి బయటకు వెళ్లారు. అయితే, రాత్రి ఎంతకీ వారు తిరిగి రాకపోవడంతో ఆందోళన చెందిన కుటుంబ సభ్యులు వారి కోసం వెతకడం ప్రారంభించారు. ఫోన్లు కలవకపోవడం, చుట్టుపక్కల ఆరా తీసినా జాడ లభించకపోవడంతో ఏం జరిగిందో తెలియక తలమునకలయ్యారు. ఈ నేపథ్యంలో సోమవారం ఉదయం నల్లమాడు గ్రామ శివారులోని జీడిమామిడి తోటలో రెండు మహిళల మృతదేహాలు పడి ఉన్నాయనే సమాచారం కలకలం సృష్టించింది. అక్కడికి వెళ్లి చూసేసరికి వారు అదృశ్యమైన అంతోభాయి, వెంకటలక్ష్మిగా తేలడంతో కుటుంబంలో విషాద ఛాయలు అలముకున్నాయి.
నగదు, బంగారం సురక్షితం.. వీడని చిక్కుముడి
మృతుల వద్ద సుమారు ఏడు కాసుల బంగారు ఆభరణాలతో పాటు రూ. 40,000 నగదు ఉన్నట్లు బంధువులు పోలీసులకు వెల్లడించారు. ఒకవేళ ఇది హత్యే అయితే సదరు సొమ్ము, నగదు అక్కడే ఎందుకు ఉన్నాయి? సాధారణంగా దారిదోపిడీ లేదా దొంగతనాల కోసం జరిగే హత్యల్లో దుండగులు నగదు, నగలను వదిలిపెట్టరు. కానీ ఇక్కడ అవన్నీ సురక్షితంగా ఉండటం కేసును మరింత క్లిష్టంగా మార్చింది. ఇది పాత కక్షల వల్ల జరిగిన ఘటనా? లేక కుటుంబ విబేధాలు ఏమైనా ఉన్నాయా? లేదా మరేదైనా బలమైన కారణం ఉందా? అనే కోణంలో పోలీసులు అనుమానాలు వ్యక్తం చేస్తున్నారు.
రంగంలోకి క్లూస్ టీమ్, డాగ్ స్క్వాడ్.. పోలీసుల ముమ్మర తనిఖీలు
ఘటనాస్థలికి చేరుకున్న పోలీసులు ఉద్రిక్త పరిస్థితుల నడుమ మృతదేహాలను స్వాధీనం చేసుకున్నారు. కేసు తీవ్రతను పరిగణనలోకి తీసుకుని ఏలూరు నుంచి ప్రత్యేకంగా వేలిముద్ర నిపుణులను (క్లూస్ టీమ్), డాగ్ స్క్వాడ్ను రప్పించారు. క్లూస్ టీమ్ సభ్యులు ఘటనాస్థలంలో లభించిన భౌతిక ఆధారాలను, వేలిముద్రలను నిశితంగా సేకరించారు. డాగ్ స్క్వాడ్ తోట పరిసర ప్రాంతాల్లో కొంతదూరం పరిగెత్తి ఆగిపోయింది. ఘటనాస్థలంలో లభించిన ఆనవాళ్లు, మృతదేహాలు పడి ఉన్న తీరును బట్టి క్షుణ్ణంగా పరిశీలిస్తున్నారు.
నల్లమాడు మర్డర్ కేస్ దర్యాప్తులో ఉన్నతాధికారులు
ఈ ఘోర ఉదంతంపై సమాచారం అందుకున్న వెంటనే ఏలూరు డీఎస్పీ శ్రవణ్కుమార్ సంఘటనా స్థలానికి చేరుకుని పరిశీలించారు. ఆయనతో పాటు నిడమర్రు, భీమడోలు, దేవరపల్లి పరిధుల సీఐలు, ఎస్ఐలు, భారీగా పోలీస్ సిబ్బంది అక్కడ మోహరించారు. నిందితుల కోసం సాక్ష్యాధారాలను సేకరిస్తూ అన్ని కోణాల్లో విచారణ జరుపుతున్నారు. మృతదేహాల స్థితిని బట్టి ఇవి పథకం ప్రకారం చేసిన హత్యగా ప్రాధమికంగా నిర్ధారించారు. శవపరీక్ష నివేదిక వస్తేనే మరణానికి గల అసలు కారణాలు తెలుస్తాయని, కేసును అత్యంత ప్రతిష్టాత్మకంగా తీసుకుని దర్యాప్తు చేస్తున్నామని డీఎస్పీ శ్రవణ్కుమార్ స్పష్టం చేశారు. ఈ ఘటనతో ఉంగుటూరు, నల్లజర్ల మండలాల్లో విషాదంతో పాటు భయాందోళనలు వ్యక్తమవుతున్నాయి.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..