అద్భుతం.. 24 క్యారెట్ల బంగారంపై నడిచే ఛాన్స్! ప్రపంచంలోనే తొలి గోల్డ్ వాక్‌వే!

బంగారు ఆభరణాలు, విలాసవంతమైన భవనాలు, అత్యాధునిక పర్యాటక ఆకర్షణలకు పేరుగాంచిన దుబాయ్ మరో సంచలన ప్రాజెక్టుకు సిద్ధమవుతోంది. పర్యాటకులకు సరికొత్త అనుభూతిని అందించే లక్ష్యంతో 24 క్యారెట్ల బంగారు నడక మార్గాన్ని (గోల్డ్ వాక్‌వే) అందుబాటులోకి తీసుకురావాలని దుబాయ్ గోల్డ్ డిస్ట్రిక్ట్ యోచిస్తోంది. ఈ ప్రాజెక్టు 2026 చివరి నాటికి ప్రారంభమయ్యే అవకాశం ఉందని నిర్వాహకులు వెల్లడించారు. అయితే, దీనికి సంబంధించిన కచ్చితమైన ప్రారంభ తేదీ, పొడవు, నిర్మాణ వ్యయం వంటి వివరాలు ఇంకా అధికారికంగా వెల్లడికాలేదు.

బంగారంపై నడిచే అరుదైన అనుభూతి!

దుబాయ్‌లోని డీరా ప్రాంతంలో ఉన్న గోల్డ్ డిస్ట్రిక్ట్ ఈ వినూత్న ఆకర్షణకు వేదిక కానుంది. 24 క్యారెట్ల బంగారంతో రూపొందించే ఈ నడక మార్గం ప్రపంచంలోనే తొలి, అత్యంత పొడవైన బంగారు వాక్‌వేగా నిలవాలన్నది ప్రాజెక్టు లక్ష్యంగా తెలుస్తోంది. ఈ ఆకర్షణ ద్వారా బంగారంతో దుబాయ్‌కు ఉన్న చారిత్రక, వాణిజ్య అనుబంధాన్ని సందర్శకులు సరికొత్త రీతిలో అనుభవించే అవకాశం ఉంటుంది. దుబాయ్ గోల్డ్ డిస్ట్రిక్ట్ కమర్షియల్ సెక్టార్ సీనియర్ డైరెక్టర్ రషీద్ అల్ హర్మూది వెల్లడించిన వివరాల ప్రకారం, ఈ ఆకర్షణను రాబోయే రెండు నెలల్లో ప్రారంభించాలని ప్రణాళిక రూపొందించారు. అయితే, ఈ గడువు, ప్రాజెక్టు పూర్తి స్థాయి వివరాలు అధికారిక ప్రకటన వెలువడాల్సి ఉంది.

బంగారం, ఆభరణాల అంతర్జాతీయ కేంద్రంగా దుబాయ్

దుబాయ్ గోల్డ్ డిస్ట్రిక్ట్‌ను 2026 జనవరిలో బంగారం, ఆభరణాలు, బులియన్, టోకు వ్యాపారం, పెట్టుబడులకు ప్రత్యేక కేంద్రంగా ప్రారంభించారు. దుబాయ్ మీడియా ఆఫీస్ వివరాల ప్రకారం, ఈ ప్రాంతంలో బంగారం, ఆభరణాలు, సుగంధ ద్రవ్యాలు, సౌందర్య సాధనాలు, జీవనశైలి ఉత్పత్తులకు సంబంధించిన 1,000కు పైగా రిటైలర్లు ఉన్నారు. వ్యాపార కార్యకలాపాలను మరింత విస్తరించేందుకు అధికారులు ప్రణాళికలు రూపొందిస్తున్నారు. 2026 ప్రారంభం నుంచి టోకు బంగారు వ్యాపార కార్యాలయాలు 20 శాతం పెరిగాయని, బంగారం, ఆభరణాలు, విలువైన రాళ్లు, విలాసవంతమైన గడియారాల దుకాణాల సంఖ్య 15 శాతం పెరిగిందని నిర్వాహకులు పేర్కొన్నారు. వచ్చే ఏడాదిలో కొత్త కంపెనీల రాక మరో 10 నుంచి 20 శాతం పెరగవచ్చని అంచనా వేస్తున్నారు. మధ్యప్రాచ్యంలోనే అతిపెద్ద బంగారం, ఆభరణాల వాణిజ్య ప్రదర్శన నిర్వహించాలనే ప్రణాళిక కూడా ఉంది.

16.5 కిలోల బంగారు ఝుంకాలకు గిన్నిస్ రికార్డులు!

ఇదే సమయంలో దుబాయ్ బంగారు ఆభరణాల రంగంలో మరో ప్రత్యేక ఘనత సాధించింది. జోయాలుక్కాస్ రూపొందించిన ‘మయూర సహస్ర’ పేరుతో ఉన్న సాంప్రదాయ భారతీయ ఝుంకా చెవిపోగుల జతకు రెండు గిన్నిస్ వరల్డ్ రికార్డులు లభించాయి. 22 క్యారెట్ల బంగారంతో తయారైన ఈ జత బరువు 16.514 కిలోగ్రాములు. ప్రపంచంలోనే అత్యంత బరువైన, అతిపెద్ద చెవిపోగుల జతగా గుర్తింపు పొందింది. 2026 అక్టోబర్ 24న యూఏఈ ఆర్థిక, పర్యాటక శాఖ మంత్రి అబ్దుల్లా బిన్ తౌక్ అల్ మర్రి సమక్షంలో వీటిని ఆవిష్కరించారు. ఈ ఆభరణాలను విక్రయించకుండా దుబాయ్‌లో శాశ్వత ప్రదర్శన కోసం ఉంచారు.

పర్యాటకానికి కొత్త ఆకర్షణ

గోల్డ్ వాక్‌వే, భారీ బంగారు ఝుంకాలు, విస్తరిస్తున్న ఆభరణాల వ్యాపారంతో దుబాయ్ తన అంతర్జాతీయ గుర్తింపును మరింత పెంచుకోవాలని చూస్తోంది. ఈ బంగారు నడక మార్గం అనుకున్న సమయానికి ప్రారంభమైతే పర్యాటకులకు ప్రత్యేక అనుభూతిని అందించే మరో ప్రధాన ఆకర్షణగా నిలవవచ్చు. అయితే, ప్రాజెక్టు నిర్మాణం, ప్రవేశ నిబంధనలు, సందర్శకులకు అందించే అనుభవం వంటి పూర్తి వివరాల కోసం అధికారిక ప్రకటన కోసం వేచి చూడాలి.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..