అంతు చిక్కని వ్యాధి..ఆ ఊళ్లో ఏం జరుగుతోంది..?

Share

అదో విచిత్రమైన వ్యాధి. ఎందుకొస్తుందో తెలియదు. వచ్చినా అసలు లక్షణాలు ఎలా ఉంటాయో అర్థం కావడం లేదు. ఓ ఇంట్లో ఒకరికి సోకిందన్న వార్త తెలిసేలోగా మరో ఇంట్లో మరో వ్యక్తికి ఇదే ముప్పు ముంచుకొస్తోంది. ఇప్పటి వరకూ ఈ వింత వ్యాధితో 17 మంది ప్రాణాలు కోల్పోయారు. ఊరు ఊరంతా కంటి మీద కునుకు లేకుండా, సరైని తిండి కూడా తినకుండా వెర్రెత్తినట్టుగా అయిపోతోంది. డాక్టర్లు వస్తున్నారు. ఏదో చెప్తున్నారు. వెళ్లిపోతున్నారు. బతికున్న వాళ్లని ఆంబులెన్స్‌లో ఎక్కించుకుని తీసుకెళ్తున్నారు. తోచిన వైద్యం చేస్తున్నారు. కానీ..ఇప్పటి వరకూ అసలు ఏం జరుగుతోందో అంతుపట్టడం లేదు. జమ్ముకశ్మీర్‌లోని రాజౌరిలోని బదాల్ గ్రామంలో దాదాపు రెండు నెలలుగా ఇదే పరిస్థితి. అంతా మిస్టరీ అని చెబుతున్నారు తప్ప..అసలు ఆ మిస్టరీ ఏంటో ఇప్పటి వరకూ తేలలేదు. ఏదో వైరస్ సోకుతోందని కొందరు..కాదు కాదు మరింకేదో ఉందని ఇంకొందరు. ఇలా ఎవరికి తోచింది వాళ్లు చెబుతున్నారు. అటు ప్రాణాలు పోతూనే ఉన్నాయి. హాస్పిటల్స్ అన్నీ అలెర్ట్ అయ్యాయి. మెడికల్ సిబ్బంది కూడా అప్రమత్తమైంది. కానీ...అసలు ఆ వ్యాధేంటో తెలిస్తే కదా..వాళ్లు ఏమైనా చేయగలిగేది.