ఆకాశంలో అదుపుతప్పిన శాటిలైట్‌.. భూమివైపు దూసుకొస్తుందా ఏంది

ఆకాశంలో అలజడి రేగిందా? భూమిపై వాహనాలు మాదిరిగానే అంతరిక్షంలో శాటిలైట్‌ అదుపుతప్పిందా? కూలేందుకు దూసుకొస్తుందా? అంటే ప్రముఖ అంతరిక్షయాన సంస్థ స్పేస్‌ఎక్స్‌ అవుననే అంటోంది. ఎలాన్‌ మస్క్‌కు చెందిన స్టార్‌లింక్‌ ప్రాజెక్టులోని శాటిలైట్స్‌లో ఒకటి ఇటీవల అంతరిక్షం నుంచి అదుపుతప్పి భూమివైపు వస్తోంది. ఈ నెల 17వ తేదీన శాటిలైట్‌ 35956 భూమి నుంచి 418 కిలోమీటర్ల ఎత్తులో ఉంది. అది హఠాత్తుగా అక్కడి నుంచి కూలిపోవడం మొదలైంది. దానిపై నియంత్రణను స్పేస్‌ఎక్స్‌ కోల్పోయింది. ప్రస్తుతం స్టార్‌లింక్‌ ప్రాజెక్టు కింద 9,000 ఉపగ్రహాలను స్పేస్‌ఎక్స్‌ అంతరిక్షంలోకి పంపింది. దీంతో భూమిపై మారుమూల ప్రాంతాలకు ఇంటర్నెట్‌ను సరఫరా చేయగలుగుతోంది. అమెరికాలోని నాసా, యూఎస్‌ స్పేస్‌ఫోర్స్‌తో సమన్వయం చేసుకొంటూ పనిచేస్తోంది. శాటిలైట్‌లో సాంకేతిక లోపంపై స్పేస్‌ఎక్స్‌ స్పందించింది. ‘‘హఠాత్తుగా ఉపగ్రహంలో సాంకేతిక లోపం తలెత్తి ప్రొపెల్షన్‌ ట్యాంక్‌లో గ్యాస్‌ అత్యంత శక్తిమంతంగా బయటకు వెలువడింది. దీంతో ఒక్కసారిగా అది నాలుగు కిలోమీటర్ల కిందకు దూసుకొచ్చింది. ఆ తర్వాత కొన్ని భాగాలు విడిపోయి మెల్లగా కదలడం మొదలుపెట్టాయి. వారం రోజుల్లోగా భూవాతావరణంలోకి వచ్చి కూలిపోవచ్చు’’ అని ఎక్స్‌లో స్పేస్‌ఎక్స్‌ పోస్టు చేసింది. శనివారం ఈ ఉపగ్రహ శకలాలు అమెరికాలోని అలాస్కా సమీపంలో గగనతలంలో ప్రయాణిస్తుండగా.. వెంటోర్‌టెక్‌ సంస్థకు చెందిన వరల్డ్‌వ్యూ-3 అనే ఉపగ్రహం 241 కిలోమీటర్ల దూరం నుంచి హైరిజల్యూషన్‌ చిత్రాలను తీసింది. ఈ ఉపగ్రహం నుంచి అంతర్జాతీయ అంతరిక్ష కేంద్రానికి లేదా భూమికి ఎటువంటి ముప్పు లేదని స్పేస్‌ఎక్స్‌ చెబుతోంది. ప్రస్తుతం అది ఐఎస్‌ఎస్‌ కంటే కిందే ఉందని వెల్లడించింది. అది లోయర్‌ ఎర్త్‌ ఆర్బిట్‌లో ఉండటంతో.. భూగురుత్వాకర్షణ శక్తి దానిని సులువుగా లాగేస్తుందని వెల్లడించింది. ఇవి వాతావరణ ఘర్షణతో కాలిపోయే అవకాశం ఉన్నట్లు సమాచారం.

మరిన్ని వీడియోల కోసం ఇక్కడ క్లిక్ చేయండి

Also Watch:

కొడుకు హత్యకు తండ్రి సుపారీ… ఎందుకో తెలిసి పోలీసులే షాక్‌

తాజ్‌మహల్ కనిపించుట లేదు.. పొగమంచులో ఉత్తర భారతం

Srisailam: శ్రీశైలం వెళ్లే భక్తులకు గుడ్‌ న్యూస్‌.. స్పర్శ దర్శనం సమయాలు

ఒక్క గ్రామ పంచాయతీకి ఇద్దరు సర్పంచులా ?? ఇదెక్కడి ట్విస్ట్

‘కమెడియన్స్‌ది ఏ స్థానమో మళ్లీ చూపించారు’ మీకో దండం