‘ఐ స్ట్రోక్’ గురించి తెలుసా? నిర్లక్ష్యం చేస్తే అంధత్వమే

సాధారణంగా స్ట్రోక్ లేదా పక్షవాతం అంటే మెదడుకు సంబంధించిందని మాత్రమే అని అందరూ అనుకుంటారు. కానీ, మెదడు మాదిరిగానే కంటికి కూడా స్ట్రోక్ వచ్చే అవకాశం ఉందని వైద్య నిపుణులు హెచ్చరిస్తున్నారు. దీనిని ‘ఐ స్ట్రోక్’ అంటారు. ఇది సంభవించినప్పుడు కొన్ని గంటల్లోనే చికిత్స అందకపోతే శాశ్వతంగా చూపు కోల్పోయే ప్రమాదం ఉందంటున్నారు. అసలు ఈ ‘ఐ స్ట్రోక్’ అంటే ఏమిటి? మన కంటి వెనుక భాగంలో ఉండే ‘రెటీనా’ కాంతిని గ్రహించి మెదడుకు సంకేతాలను పంపుతుంది. ఈ రెటీనా ఆరోగ్యంగా ఉండాలంటే నిరంతరం రక్త ప్రసరణ జరగాలి. ఒకవేళ రెటీనాకు రక్తాన్ని చేరవేసే ధమనుల్లో గానీ, రక్తాన్ని వెనక్కి తీసుకెళ్లే సిరల్లో గానీ అడ్డంకులు ఏర్పడితే దానిని ‘ఐ స్ట్రోక్’ అంటారు. వైద్య భాషలో దీనిని ‘రెటీనల్ ఆర్టరీ లేదా వెయిన్ అక్లూజన్’ అని పిలుస్తారు. వైద్యులు దీనిని ప్రధానంగా రెండు రకాలుగా వర్గీకరిస్తారు. ఒకటి.. రెటీనల్ ఆర్టరీ అక్లూజన్ : ఇది రెటీనాకు ఆక్సిజన్‌తో కూడిన రక్తాన్ని అందించే ధమనిలో రక్తం గడ్డకట్టడం వల్ల సంభవిస్తుంది. ఇది చాలా ప్రమాదకరమైనది. రెండోది..రెటీనల్ వెయిన్ అక్లూజన్: ఇది రక్తాన్ని వెనక్కి తీసుకెళ్లే సిరల్లో అడ్డంకి ఏర్పడటం వల్ల సంభవిస్తుంది. ఇది ధమని సమస్య కంటే సాధారణంగా కనిపిస్తుంది. ఐ స్ట్రోక్ లక్షణాలు చాలా వరకు అకస్మాత్తుగా కనిపిస్తాయి. ఇందులో నొప్పి ఉండకపోవడం వల్ల చాలామంది దీన్ని సాధారణ అలసటగా భావించి పొరపాటు పడతారు. ఒక్క కంటిలో లేదా రెండు కళ్లలో అకస్మాత్తుగా చూపు మసకబారడం. కంటి ముందు ఒక్కసారిగా చీకటి కమ్మినట్లు అవ్వడం లేదా ఒక వైపు అసలు కనిపించకపోవడం. కంటి ముందు నల్లటి చుక్కలు లేదా వెంట్రుకల వంటి ఆకారాలు కదులుతున్నట్లు అనిపించడం. దృష్టి క్షేత్రంలో ఒక తెర దించినట్లుగా నీడ అడ్డుపడటం లాంటి లక్షణలు ఉంటాయి. ఈ లక్షణాలు కనిపించిన మొదటి 4 నుండి 24 గంటల్లోపు వైద్యుడిని సంప్రదిస్తే చూపును కాపాడే అవకాశం ఉంటుంది. ముఖ్యంగా బీపీ, షుగర్‌, అధిక కొలెస్ట్రాల్‌, గుండెజబ్బులు ఉన్నవారికి, ధూమపానం చేసేవారికి, 50 ఏళ్లు వయసు పైబడినవారిలో ఐ స్ట్రోక్‌ వచ్చే ప్రమాదం ఎక్కువగా ఉంటుందంటున్నారు నిపుణులు. ఐ స్ట్రోక్ బారిన పడకుండా ఉండాలంటే నిరంతరం అప్రమత్తంగా ఉండాలని సూచిస్తున్నారు. రక్తపోటు , చక్కెర స్థాయిలు , కొలెస్ట్రాల్‌ను ఎప్పటికప్పుడు పరీక్షించుకోవాలి. ప్రతిరోజూ నడక లేదా చిన్నపాటి వ్యాయామం వల్ల రక్త ప్రసరణ మెరుగుపడుతుంది. పండ్లు, కూరగాయలు ఎక్కువగా ఉండే పౌష్టికాహారం తీసుకోవాలి.

మరిన్ని వీడియోల కోసం ఇక్కడ క్లిక్ చేయండి

Also Watch:

ఈ సైలెంట్ కిల్లర్‌తో జాగ్రత్త.. ముఖ్యంగా వృద్ధులు

ఆలయంలోని బావిలో అద్భుతం.. చూసి షాకైన గ్రామస్తులు

పింక్ సాల్ట్ వాడుతున్నారా? అయితే ఈ విషయం తెలుసుకోండి

భూమ్మీద అత్యంత ప్రమాదకరమైన పాము.. కన్నుమూసి తెరిచే లోపే ప్రాణాలు తీసేస్తుంది!

ప్రతీ రోజూ నడకతో.. శరీరంలో అద్భుత మార్పులు!