సమాధులపై కన్నేసిన కిలేడీ.. చివరికి..!

చనిపోయిన తమ ఆత్మీయులను గుర్తు చేసుకుంటూ కుటుంబ సభ్యులు సమాధుల వద్ద పూల మొక్కలు, కొవ్వొత్తులు, లాంతర్లు ఇతర జ్ఞాపికలు ఉంచుతుంటారు. వాటిని చూసినప్పుడల్లా తమ వారు పక్కనే ఉన్నారని భావిస్తారు. కానీ ఓ మహిళ మాత్రం సమాధుల వద్ద ఉంచిన వస్తువులపై కన్నేసింది.

20 కుటుంబాలకు చెందిన వస్తువులు మాయం

కెనడాలోని ఒంటారియో రాష్ట్రం మిల్టన్‌లోని స్మశానవాటికలో ఈ ఘటన జరిగింది. సమాధుల వద్ద ఉంచిన వస్తువులు ఒక్కొక్కటిగా మాయమవుతున్నాయి. తమ ఆత్మీయుల సమాధుల వద్ద ఉంచిన లాంతర్లు, మొక్కలు, కొవ్వొత్తులు, ఇతర జ్ఞాపికలు కనిపించడం లేదని 20 కుటుంబాలు ఫిర్యాదు చేశాయి. దీంతో స్మశానవాటిక నిర్వాహకులు పోలీసులకు సమాచారం ఇచ్చారు. కేసు నమోదు చేసుకున్న హాల్టన్ పోలీసులు విషయాన్ని సీరియస్‌ గా తీసుకున్నారు. వాటి విలువ తక్కువే అయినప్పటికీ, వాటితో కుటుంబ సభ్యులకు ఎంతో భావోద్వేగ అనుబంధం ఉంది.

ఇంటి నుంచి డజన్ల కొద్దీ వస్తువులు స్వాధీనం

అక్టోబర్ 24న పోలీసులు మిల్టన్‌లోని ఓ ఇంట్లో సోదాలు నిర్వహించారు. సమాధుల వద్ద నుంచి చోరీకి గురైన డజన్ల కొద్దీ వస్తువులను స్వాధీనం చేసుకున్నారు. డయానా ఆండర్సన్ (57)ను అరెస్ట్ చేశారు. ఆమెపై 5,000 కెనడియన్ డాలర్ల విలువైన వస్తువుల చోరీకి సంబంధించి ఒక అభియోగంతో పాటు, నేరం ద్వారా సంపాదించిన వస్తువులను కలిగి ఉన్నారనే ఆరోపణలపై నాలుగు అభియోగాలు నమోదు చేశారు.

మరింత మంది బాధితులు ఉండే అవకాశం

ఇప్పటివరకు సుమారు 20 కుటుంబాలు తమ వస్తువులు కనిపించడం లేదని ఫిర్యాదు చేశాయి. మరికొన్ని కుటుంబాలకు తమ ఆత్మీయుల సమాధుల వద్ద వస్తువులు మాయమైన విషయం ఇంకా తెలిసి ఉండకపోవచ్చని పోలీసులు భావిస్తున్నారు. స్వాధీనం చేసుకున్న వస్తువులను పరిశీలించి, అవి ఎవరివో గుర్తించే ప్రయత్నం చేస్తున్నారు. స్వాధీనం చేసుకున్న వస్తువులను వాటి అసలు యజమానులకు తిరిగి అందించేందుకు పోలీసులు ప్రయత్నిస్తున్నారు. తమ ఆత్మీయుల జ్ఞాపకంగా భద్రపరుచుకున్న వస్తువులు తిరిగి దొరికితే బాధిత కుటుంబాలకు కొంతైనా ఊరట లభించనుంది.