ఇదే ప్రపంచపు అసలైన అరటిపండు..కానీ, దీని సంకర రకాన్ని మార్కెట్లో అమ్ముతారు!
మనం రోజూ తినే తీపి అరటిపండ్లు నిజానికి సహజమైనవి కావని మీకు తెలుసా..? అవును.. మీరు విన్నతి నిజమే.. మనం తింటున్న అరటిపండ్లు హైబ్రిడ్ రకాలు. అడవుల్లో దట్టంగా పెరిగే అసలైన అడవి అరటిపండ్లు లోపల గట్టి విత్తనాలను కలిగి ఉంటాయని తెలిస్తే షాక్ తింటారు.. దట్టమైన అడవుల్లో పెరిగే ఈ అసలైన విత్తన అరటిపండ్లకు, మనం నిత్యం ఉపయోగించే సాధారణ అరటిపండ్లకు మధ్య ఉన్న వ్యత్యాసాలు, వాటి పుట్టుక వెనుక ఉన్న రహస్యాలు నిజంగా ఆశ్చర్యపరిచేలా ఉంటాయి.
మనం నిత్యం తినే పండ్లలో అరటిపండు అత్యంత ప్రజాదరణ పొందినది. సాధారణంగా అరటిపండు తొక్క తీసి చూడగానే అందులో విత్తనాలు ఉండకపోవడం మనం గమనిస్తుంటాం. అయితే, ప్రకృతి సిద్ధంగా దట్టమైన అడవుల్లో పెరిగే అసలైన అరటిపండులో గట్టి విత్తనాలు ఉంటాయని మీకు తెలుసా? మనం మార్కెట్లో కొనుగోలు చేసే అరటిపండ్లు సహజసిద్ధమైనవి కావు, అవి మానవులు అభివృద్ధి చేసిన హైబ్రిడ్ రకాలు.
అసలైన అడవి అరటిపండు:
దట్టమైన వర్షారణ్యాల్లో పెరిగే అసలైన అరటి జాతులను మూసా అక్యుమినేటా, మూసా బాల్బిసియానా అని పిలుస్తారు. ఈ అడవి అరటిపండ్లను కోసి చూస్తే లోపల తెల్లటి గుజ్జు కంటే నల్లటి, బఠానీ గింజలంత గట్టి విత్తనాలే ఎక్కువగా కనిపిస్తాయి. వీటిని నేరుగా తినడం చాలా కష్టం, ఎందుకంటే విత్తనాలు పంటి కింద పడితే దంతాలు దెబ్బతినే ప్రమాదం ఉంది.
మనం తినే విత్తన రహిత అరటిపండు ఎలా వచ్చింది?:
వేలాది సంవత్సరాల క్రితం మానవులు అడవి అరటి జాతులను గుర్తించి, విత్తనాలు లేని లేదా చాలా చిన్నవిగా ఉన్న అరుదైన ఉత్పరివర్తన మొక్కలను ఎంపిక చేసి సాగు చేయడం ప్రారంభించారు. దీనిని పార్థెనోకార్పీ అంటారు. దీనివల్ల ఫలదీకరణం చెందకుండానే కాయలు కాస్తాయి, ఫలితంగా విత్తనాలు లేని తీపి అరటిపండ్లు తయారవుతాయి.
ఈ రోజుల్లో మనం తినే కావెండిష్ వంటి ప్రజాదరణ పొందిన అరటి రకాలన్నీ క్లోనింగ్, హైబ్రిడ్ పద్ధతుల ద్వారా రూపుదిద్దుకున్నవే. ప్రకృతిలో సహజంగా విత్తనాలతో పెరిగే అరటిపండ్లు వన్యప్రాణులకు ప్రధాన ఆహారంగా ఉపయోగపడతాయి.