బర్త్ డే నాడు క్యాండిల్స్ వెలిగించడం వెనుక వందల ఏళ్ల కథ.. మీకు తెలియని నిజాలు ఇవే..
బర్త్ డే అనగానే కేక్ కోయడం, కొవ్వొత్తులు వెలిగించడం, మనసులో ఒక కోరిక కోరుకుని వాటన్నింటినీ ఒకే ఊపులో ఊదేయడం.. మనకు చాలా అలవాటైన సంప్రదాయం. ప్రతి ఒక్కరూ ఎంతో సరదాగా చేసే ఈ పని వెనుక వేల సంవత్సరాల చరిత్ర దాగి ఉందన్న విషయం ఎప్పుడైనా గమనించారా?.. ఆ విషయాలు ఇప్పుడు తెలుసుకుందాం..
ప్రపంచవ్యాప్తంగా ప్రతిరోజూ కోట్ల మంది ప్రజలు పుట్టినరోజు వేడుకలు జరుపుకుంటారు. కేక్ మధ్యలో కొవ్వొత్తులు వెలిగించడం, అందరూ కలిసి హ్యాపీ బర్త్డే పాట పాడటం, మనసులో ఒక కోరిక కోరుకుని ఆ కొవ్వొత్తులను ఒకే ఊపులో ఊదేయడం.. మనకు చాలా అలవాటైన సంప్రదాయం. కానీ అసలు పుట్టినరోజు నాడు కొవ్వొత్తులను ఎందుకు వెలిగిస్తారు? వాటిని ఊదేసి ఆర్పివేయడం వెనుక ఉన్న రహస్యం ఏంటి? ఒకే ఊపులో ఊదితేనే అదృష్టం అని ఎందుకు నమ్ముతారు? ఈ ప్రశ్నలన్నింటికీ సమాధానాలు కావాలంటే మనం వేల సంవత్సరాల క్రితం నాటి పురాతన చరిత్ర, గ్రీకు పురాణాలు, యూరప్ సంప్రదాయాల్లోకి వెళ్లాల్సిందే.
చంద్రుడి దేవతకు సమర్పించిన తేనె కేకులు
చరిత్రకారుల ప్రకారం.. బర్త్డే కేక్లపై కొవ్వొత్తులు పెట్టే సంప్రదాయానికి పునాది పురాతన గ్రీస్లో పడింది. గ్రీకు పురాణాల ప్రకారం.. చంద్రుడు, వేట దేవత అయిన ఆర్టెమిస్ని పూజించే భక్తులు ఆమె దేవాలయాలలో గుండ్రటి తేనె కేకులను నైవేద్యంగా పెట్టేవారు. ఆ కేక్ చుట్టూ వెలిగించిన కొవ్వొత్తులను అలంకరించేవారు. ఆ గుండ్రటి కేక్ చంద్రుడిని సూచిస్తే, వెలిగే కొవ్వొత్తులు చంద్రుని వెలుగును సూచించేవి. కొవ్వొత్తులు కాలినప్పుడు వచ్చే పొగ, తమ ప్రార్థనలను నేరుగా ఆకాశంలో ఉన్న దేవుడికి చేరవేస్తుందని గ్రీకులు బలంగా నమ్మేవారు. అయితే వారు అప్పట్లో సొంత పుట్టినరోజుల కోసం ఈ పని చేయలేదు, కేవలం దేవత పూజల కోసమే చేసేవారు.
జర్మనీ.. ఆధునిక బర్త్డే క్యాండిల్ పురిటిగడ్డ
గ్రీకులు కేవలం ఐడియా ఇస్తే.. దాన్ని నేటి ఆధునిక బర్త్డే సంప్రదాయంగా మార్చిన ఘనత 18వ శతాబ్దపు జర్మనీ దేశానికి దక్కుతుంది. జర్మనీలో పిల్లల పుట్టినరోజులను కిండర్ఫెస్ట్ పేరుతో ఒక పెద్ద పండుగలా జరుపుకునేవారు. ఈ వేడుకల్లో కేక్పై కొవ్వొత్తులను పెట్టడం ప్రారంభించారు. ఒక చిన్నారి వయసు ఎన్ని సంవత్సరాలైతే.. అన్ని కొవ్వొత్తులను కేక్పై ఉంచేవారు. దాంతో పాటు రాబోయే సంవత్సరంలో ఆ బిడ్డకు మంచి జరగాలని ఆశిస్తూ అదనంగా మరొక కొవ్వొత్తిని కూడా వెలిగించేవారు. రోజంతా ఆ కొవ్వొత్తులను అలానే వెలిగించి ఉంచి.. చివరకు ఆ పుట్టినరోజు జరుపుకునే పిల్లాడి చేత ఒకే ఊపులో వాటన్నింటినీ ఊదించేవారు. జర్మన్ ప్రముఖ కవి గొథే తన 52వ పుట్టినరోజున ఇలాంటి ఒక భారీ క్యాండిల్ కేక్ కట్ చేసినట్లు చారిత్రక ఆధారాలు ఉన్నాయి.
క్యాండిల్ ఊదే ముందు విష్ ఎందుకు కోరుకుంటారు?
కొవ్వొత్తులను ఆర్పివేసే ముందు మనసులో ఒక కోరిక కోరుకునే అలవాటు కూడా పురాతన కాలం నాటి పొగ, నిప్పుల నమ్మకం నుంచే వచ్చింది. కొవ్వొత్తిని ఊదినప్పుడు వచ్చే పొగ.. మన మనసులోని కోరికను నేరుగా దేవదూతలకు లేదా దేవుడికి తీసుకెళ్తుందని, తద్వారా ఆ కోరిక నెరవేరుతుందని కాలక్రమేణా ప్రజలు నమ్మడం ప్రారంభించారు.
ఒకే ఊపులో అన్ని కొవ్వొత్తులు ఆరిపోతేనే అదృష్టమా?
యూరప్ జానపద కథల ప్రకారం.. కేక్పై ఉన్న అన్ని కొవ్వొత్తులను ఒక్క ఊపులోనేఊది ఆర్పివేస్తే, అది అదృష్టానికి, సంపదకు, కోరికలు నెరవేరడానికి సంకేతం. ఒకవేళ పొరపాటున ఏదైనా ఒక కొవ్వొత్తి ఆరకుండా మిగిలిపోతే, కోరిన కోరిక తీరదని లేదా రాబోయే సంవత్సరంలో సవాళ్లు ఎదురవుతాయని నమ్మేవారు. కానీ నేటి ఆధునిక కాలంలో ప్రజలు దీన్ని ఒక గంభీరమైన నమ్మకం కంటే కూడా, పుట్టినరోజు వేడుకల్లో ఒక సరదా ఆచారంగా మాత్రమే ఎంజాయ్ చేస్తున్నారు.
కాగా కాలాలు మారినా, జీవన శైలులు మారినా.. వేల ఏళ్ల క్రితం ఒక దేవతకు సమర్పించిన కానుక, నేడు మన ఇళ్లల్లో బర్త్డే కేక్గా మారి తరాల బంధాన్ని కలుపుతోంది. కాబట్టి నెక్స్ట్ టైం మీరు బర్త్డే క్యాండిల్ ఊదేటప్పుడు.. దీని వెనుక ఇంత పెద్ద హిస్టరీ ఉందనే విషయం గుర్తుంచుకోండి.