Viral: ఈ చిన్న పురుగులు బంగారం కంటే విలువైనవి.. కిలో ఎంతో తెలిస్తే ఖంగుతింటారు.!

పైన పేర్కొన్న ఫోటోలో పసుపు కొమ్ముల్లా కనిపిస్తున్నవి.. గొంగళి పురుగులు. ఇవి బంగారం కంటే విలువైనవి. చాలా అరుదుగా దొరుకుతాయి. ఆ గొంగళి పురుగుల కిలో వందో, వెయ్యో ఉండదు గురూ.. ఏకంగా రూ. 70 లక్షలు ఉంటుంది. అలాగే ఒక గ్రాము రూ. 7 వేలు వరకు పలుకుతుంది. ఇదేంటి గొంగళి పురుగులు చూపించి.. గోల్డ్ కంటే విలువైనవి అని అంటున్నానని అనుకోవద్దు. వాటినే హిమాలయన్ వయాగ్రా అని పిలుస్తారు. ఇది ఎందుకు పని చేస్తుందో.. మీకు ప్రత్యేకంగా చెప్పనక్కర్లేదు. మనుషుల్లో లైంగిక సమస్యలకు ఇది దివ్యఔషధం అని అంటుంటారు. ఈ హిమాలయన్ వయాగ్రాకు చైనా, జపాన్, కొరియా లాంటి దేశాల్లో భారీ గిరాకీ ఉంది.

హిమాలయాలపై సుమారు 3 వేల అడుగుల ఎత్తులో ఈ గొంగళి పురుగులు ఓ అరుదైన ఫంగస్ వల్ల చనిపోయి.. ఆ తర్వాత ఎండిపోతాయి. అలా అయిన వాటిని హిమాలయన్ వయాగ్రా అని పిలుస్తారు. మే, జూన్ నెలల్లో దేశ విదేశాల నుంచి చాలామంది ఈ పురుగుల కోసం హిమాలయ పర్వతాలున్న ప్రదేశాలకు వస్తారు. కొన్నిసార్లయితే.. ఈ పురుగుల దొరకాలంటే.. ప్రాణాలను కూడా లెక్కచేయకుండా హిమాలయ పర్వతాలు ఎక్కాల్సి ఉంటుంది. ఈ పురుగులను అక్కడ నివసించే స్థానికులు, విదేశీయులు ఎక్కువగా సేకరిస్తారు. అంతేకాకుండా దీన్నే ఆదాయ వనరుగా మార్చుకుంటారు కొందరు.

కాగా, ఈ పురుగులు దొరికినప్పుడు.. వీటిని అమ్మేందుకు సరైన కొనుగోలుదారులను కూడా మనమే ముందు చూసుకోవాల్సి ఉంటుంది. ప్రస్తుత వాతావరణ పరిస్థితుల కారణంగా ఈ పురుగులు ఎక్కువగా దొరకట్లేదు. అంతేకాకుండా వీటి జాతి కూడా క్రమేపీ అంతరించిపోతోంది. ఈ క్రమంలోనే వీటి ధర కూడా పెరిగే అవకాశం ఉంది. ఈ పురుగులను లైంగిక సామర్ధ్యాన్ని పెంచేందుకు మాత్రమే కాదు.. క్యాన్సర్, డయాబెటిస్ లాంటి రోగాలు తగ్గేందుకు కూడా వినియోగిస్తారు.