32 నెలల్లో 3.77 కోట్ల ట్రాఫిక్ ఉల్లంఘనలు.. పెండింగ్ చలాన్ల వసూలుకు పోలీసుల మాస్టర్ ప్లాన్!

తెలంగాణలో వాహనదారులు ట్రాఫిక్ నిబంధనలను ఏమాత్రం పట్టించుకోవడం లేదు. గత 32 నెలల కాలంలో రాష్ట్రవ్యాప్తంగా ఏకంగా 3 కోట్ల 77 లక్షల ట్రాఫిక్ ఉల్లంఘన కేసులు నమోదయ్యాయంటే పరిస్థితి తీవ్రతను అర్థం చేసుకోవచ్చు. ప్రతిరోజూ వేలాది సంఖ్యలో కేసులు నమోదవుతున్నప్పటికీ వాహనదారుల ప్రవర్తనలో ఎలాంటి మార్పు రాకపోవడంపై ట్రాఫిక్ పోలీసులు తీవ్ర ఆందోళన వ్యక్తం చేస్తున్నారు.

రాష్ట్రంలో నమోదైన కేసుల్లో ప్రధానంగా హెల్మెట్ ధరించకపోవడం, ఓవర్ స్పీడింగ్, సీటు బెల్టు పెట్టుకోకపోవడం రాంగ్ రూట్ డ్రైవింగ్, సిగ్నల్ జంపింగ్ ఉల్లంఘనలే ఉన్నట్టు పోలీసులు తెలిపారు. ఆధునిక సీసీటీవీ కెమెరాలు, ఏఐ బేస్డ్ ట్రాఫిక్ సర్వేలెన్స్ సిస్టమ్ సహాయంతో ఈ ఉల్లంఘనలను సులభంగా పోలీసులు గుర్తిస్తున్నారు. రోడ్డు భద్రతపై నిరంతరం అవగాహన కార్యక్రమాలు నిర్వహిస్తున్నప్పటికీ, చలాన్ల సంఖ్య మాత్రం రోజురోజుకూ పెరుగుతూనే ఉండటం గమనార్హం.

భారీగా పెండింగ్‌లో చలాన్లు

ఒకవైపు కోట్లాది కేసులు నమోదవుతుంటే, మరోవైపు వాటి ద్వారా ప్రభుత్వానికి రావాల్సిన వందలాది కోట్ల రూపాయల చలాన్ మొత్తం ఇంకా పెండింగ్‌లోనే ఉండిపోయింది. చాలామంది వాహనదారులు చలాన్లను సకాలంలో చెల్లించకుండా నిర్లక్ష్యం చేస్తుండటంతో పెండింగ్ బకాయిలు భారీగా పేరుకుపోతున్నాయి. ఈ నేపథ్యంలో పెండింగ్ చలాన్లను వసూలు చేసేందుకు పోలీసులు ప్రత్యేక తనిఖీలు చేపట్టి కఠిన చర్యలు అమలు చేస్తున్నారు.

నిబంధనలు ఉల్లంఘిస్తే కఠిన చర్యలు

కేవలం జరిమానాల భయంతో కాకుండా, తమ ప్రాణ భద్రత కోసమైనా ప్రతీ ఒక్కరూ నిబంధనలను పాటించాలని ట్రాఫిక్ పోలీసులు విజ్ఞప్తి చేస్తున్నారు. నిర్లక్ష్యంగా వాహనాలు నడిపి ప్రమాదాల బారిన పడవద్దని, ప్రయాణంలో హెల్మెట్, సీటు బెల్టు తప్పనిసరిగా ధరించాలని స్పష్టం చేశారు. నిబంధనలను అతిక్రమిస్తే భారీ జరిమానాలతో పాటు లైసెన్స్ రద్దు వంటి చట్టపరమైన చర్యలు తప్పవని అధికారులు హెచ్చరించారు.

మరిన్ని తెలంగాణ వార్తల కోసం ఇక్కడ క్లిక్ చేయండి.