తెలంగాణలో బోనాల సందడి ప్రారంభం.. గోల్కొండలో తొలి బోనంతో ఆషాఢ ఉత్సవాలకు ఘన శ్రీకారం

Ashada Bonalu: తెలంగాణ ప్రజల ఆధ్యాత్మిక విశ్వాసం, సాంస్కృతిక వైభవానికి ప్రతీకగా నిలిచే ఆషాఢ బోనాల ఉత్సవాలు గురువారం (జూలై 16న) ఘనంగా ప్రారంభమయ్యాయి. ప్రతి ఏడాది ఆషాఢ మాసంలో నిర్వహించే ఈ మహోత్సవాలకు ఆద్యంగా, గోల్కొండ కోటపై కొలువైన శ్రీ జగదాంబిక మహంకాళి అమ్మవారికి తొలి బోనం సమర్పించారు. ఈ తొలి బోనంతో రాష్ట్రవ్యాప్తంగా నెల రోజుల పాటు జరిగే బోనాల సంబరాలకు అధికారికంగా శ్రీకారం చుట్టారు. గోల్కొండలో తెల్లవారుజాము నుంచే భక్తులు పెద్ద సంఖ్యలో తరలివచ్చి అమ్మవారిని దర్శించుకుంటున్నారు. సంప్రదాయ వస్త్రధారణలో మహిళలు తలపై బోనాలు మోసుకుంటూ, పోతురాజుల విన్యాసాలు, డప్పుల మోతలు, జానపద కళారూపాల నడుమ ఆలయ పరిసరాలు భక్తి పారవశ్యంతో కళకళలాడుతున్నాయి. “జై మహంకాళి” నినాదాలతో గోల్కొండ కోట ఆధ్యాత్మిక వాతావరణంలో మునిగిపోయింది.

భక్తులకు ఎలాంటి ఇబ్బందులు తలెత్తకుండా అధికారులు విస్తృత ఏర్పాట్లు చేశారు. తాగునీటి సదుపాయం, వైద్య శిబిరాలు, అత్యవసర సేవల కోసం అంబులెన్సులను అందుబాటులో ఉంచారు. రద్దీని దృష్టిలో ఉంచుకుని ప్రత్యేక క్యూలైన్లు, ట్రాఫిక్ నియంత్రణ చర్యలు చేపట్టారు.

భద్రతా పరంగా కూడా కట్టుదిట్టమైన ఏర్పాట్లు చేశారు. భారీ సంఖ్యలో పోలీసు సిబ్బందిని మోహరించడంతో పాటు ప్రత్యేక పోలీసు కంట్రోల్ రూమ్‌ను ఏర్పాటు చేశారు. వివిధ శాఖల అధికారులు సమన్వయంతో పనిచేస్తూ భక్తులు ప్రశాంతంగా అమ్మవారిని దర్శించుకునేలా అన్ని చర్యలు తీసుకుంటున్నారు.

ఇవి కూడా చదవండి

జగన్నాథ రథయాత్రలో బంగారు చీపురు ప్రత్యేకత ఏంటి? ఈ ఆచారం వెనుక..

ఆషాఢ మాసం అత్యంత పవిత్ర కాలం.. ఈ మాసంలో వచ్చే పుణ్యతిథులు, పండగలు

ప్రసాదం ఎందుకు పంచాలి? భగవద్గీత చెప్పిన ప్రసాదం మహిమ, ఆధ్యాత్మిక

మరణం తర్వాత ఆత్మ ఎక్కడికి వెళ్తుంది? గరుడ పురాణం ప్రకారం స్వర్గం

గోల్కొండలో ప్రారంభమైన ఈ బోనాల ఉత్సవాలు రాబోయే రోజుల్లో సికింద్రాబాద్ ఉజ్జయిని మహంకాళి ఆలయం, హైదరాబాద్ లాల్‌దర్వాజా సింహవాహిని మహంకాళి ఆలయంతో పాటు తెలంగాణలోని అనేక మహంకాళి దేవాలయాల్లో అత్యంత వైభవంగా కొనసాగనున్నాయి. బోనాల పండుగ సందర్భంగా రాష్ట్రవ్యాప్తంగా భక్తి, భద్రత, సంస్కృతి, సంప్రదాయాల కలయికతో ఆధ్యాత్మిక శోభ నెలకొననుంది.

పట్టు వస్త్రాలు సమర్పించిన మంత్రులు

గోల్కొండ కోట జగదాంబిక అమ్మవారికి తొలి బోనంతో ఆషాడ బోనాల ఉత్సవాలు ప్రారంభమయ్యాయి. మంత్రులు కొండా సురేఖ, పొన్నం ప్రభాకర్.. అమ్మవారికి పట్టు వస్త్రాలు సమర్పించారు. గోల్కొండ జగదాంబిక అమ్మవారి దయతో ఎల్‌నినో ప్రభావం తగ్గి, వర్షాలు సమృద్దిగా కురవాలని మంత్రి సురేఖ ఆకాంక్షించారు. తెలంగాణ ముఖ్యమంత్రి రేవంత్ రెడ్డి సారథ్యంలోని కాంగ్రెస్ ప్రజా ప్రభుత్వం ప్రజా సంక్షేమమే ప్రధాన ఎజెండాగా పనిచేస్తోందని తెలిపారు.