మాదాపూర్‌‌లోని ఫ్లాట్‌లో గుట్టుచప్పుడు కాకుండా యవ్వారం.. పోలీసుల తనిఖీల బట్టబయలు..!

హైదరాబాద్‌లోని మాదాపూర్ ఐటీ కారిడార్ పరిధిలో అక్రమంగా నిర్వహిస్తున్న రమ్మీ బెట్టింగ్ రాకెట్‌ను కూకట్‌పల్లి జోన్ ప్రత్యేక ఆపరేషన్ టీమ్ ఎస్‌వోటీ పోలీసులు మంగళవారం అర్ధరాత్రి విజయవంతంగా బట్టబయలు చేశారు. పోలీసులకు అందిన విశ్వసనీయ ముందస్తు సమాచారం ఆధారంగా కాకతీయ హిల్స్, రోడ్ నంబర్ 7 లో ఉన్న కైజెన్ వెంకటేశ్వర నిలయం అపార్ట్‌మెంట్‌పై ఒక్కసారిగా దాడి జరిపారు. సదరు అపార్ట్‌మెంట్‌లోని ఫ్లాట్ నంబర్ 301 ను కేంద్రంగా చేసుకుని గత కొంతకాలంగా రహస్యంగా జూద క్రీడలు నడుపుతున్నట్లు అధికారులు స్పష్టం చేశారు.

సోదాల సమయంలో ఫ్లాట్‌లో భారీగా నగదు పందేలు కాస్తూ రమ్మీ ఆడుతున్న ఆరుగురు వ్యక్తులను పోలీసులు రెడ్ హ్యాండెడ్‌గా అదుపులోకి తీసుకున్నారు. వీరిలో ఈ అక్రమ రమ్మీ స్థావరాన్ని నిర్వహిస్తున్న ప్రధాన నిర్వాహకుడితో పాటు, బెట్టింగ్‌కు పాల్పడుతున్న మరో ఐదుగురు పాల్గొన్నట్లు గుర్తించారు. దాడి అనంతరం సంఘటనా స్థలం నుండి పోలీసులు రూ.1,47,940 నికర నగదుతో పాటు ఆట కోసం ఉపయోగిస్తున్న 25 సెట్ల ప్లేయింగ్ కార్డులను స్వాధీనం చేసుకున్నారు.

పట్టుబడిన ఆరుగురు నిందితులను, స్వాధీనం చేసుకున్న నగదు మరియ సామాగ్రిని తదుపరి చట్టపరమైన చర్యల కోసం స్థానిక మాదాపూర్ పోలీస్ స్టేషన్‌కు తరలించారు. నగరంలోని నివాస ప్రాంతాలు, అపార్ట్‌మెంట్లలో రహస్యంగా జూద కేంద్రాలు లేదా చట్టవ్యతిరేక కార్యకలాపాలు నిర్వహిస్తే కఠిన చర్యలు తప్పవని ఎస్‌ఓటీ పోలీసులు హెచ్చరించారు. ఈ ఘటనపై కేసు నమోదు చేసుకున్న మాదాపూర్ పోలీసులు సమగ్ర విచారణ చేపడుతున్నారు.

మరిన్ని క్రైమ్ వార్తల కోసం ఇక్కడ క్లిక్ చేయండి..