భారత్ సహా పలు దేశాల్లో నిలిచిపోయిన ఎక్స్‌ సేవలు! మస్క్‌ను ఏకిపారేసిన నెటిజన్లు

సోషల్ మీడియా ప్లాట్‌ఫామ్ ఎక్స్‌ గణనీయమైన సాంకేతిక అంతరాయాన్ని ఎదుర్కొంది. ఈ లోపం కారణంగా భారతదేశం సహా ప్రపంచవ్యాప్తంగా వేలాది మంది వినియోగదారులు తమ ఫీడ్‌లను రిఫ్రెష్ చేయడం, లింక్‌లను ఓపెన్ చేయడం వంటి కీలక సేవలను ఉపయోగించలేకపోయారు. అంతరాయాలను పర్యవేక్షించే డౌన్‌డిటెక్టర్ ప్రకారం, సాయంత్రం సమస్యలు క్రమంగా పెరుగుతూ రాత్రి 8:17 గంటల నాటికి భారతదేశంలో 1,200కి పైగా ఫిర్యాదులు నమోదయ్యాయి. కేవలం కొన్ని నిమిషాల్లోనే ఈ సంఖ్య వేగంగా పెరిగి, 8:30 గంటలకల్లా 4,500 నివేదికలను దాటింది. ఇదే సమయంలో అమెరికాలో కూడా 30 నిమిషాల వ్యవధిలో 14,000కు పైగా అంతరాయ నివేదికలు రావడం సమస్య తీవ్రతను సూచించింది.

వినియోగదారులు తెలిపిన వివరాల ప్రకారం నోటిఫికేషన్‌లు అందుతున్నప్పటికీ ప్రధాన ఫీడ్ లోడ్ కాలేదు. మొబైల్ యాప్‌లో “Something went wrong, try reloading” అనే ఎర్రర్ మెసేజ్ కనిపించడం వల్ల సేవల వినియోగం పూర్తిగా దెబ్బతింది. సుమారు 35 నిమిషాల తర్వాత సేవలు క్రమంగా పునరుద్ధరించబడ్డాయి. అయితే ఈ అంతరాయానికి గల ఖచ్చితమైన కారణాన్ని సంస్థ అధికారికంగా వెల్లడించలేదు. నిపుణుల అభిప్రాయం ప్రకారం, సర్వర్ లోపాలు, సైబర్ దాడులు లేదా సిస్టమ్ అప్‌డేట్ల సమయంలో తలెత్తే సమస్యలు ఇలాంటి అంతరాయాలకు కారణమయ్యే అవకాశం ఉంది.

ఈ పరిణామం మధ్యలో కూడా సోషల్ మీడియాలో వినియోగదారులు తమ ఫన్నీ మీమ్స్‌తో చెలరేగిపోయారు. ఎక్స్‌ అధినేత ఎలాన్‌ మస్క్‌ను ట్యాగ్ చేస్తూ మీమ్స్ వెల్లువెత్తించగా, కొందరు హాస్యాస్పద వ్యాఖ్యలతో పరిస్థితిని సరదాగా మార్చారు. తాత్కాలికంగా జరిగిన ఈ అంతరాయం ప్రపంచవ్యాప్తంగా కోట్లాది వినియోగదారులపై ప్రభావం చూపింది. సోషల్ మీడియాపై ఆధారపడే సమాచార మార్పిడి, వ్యాపార కార్యకలాపాలు, ప్రజా చర్చలపై ఇలాంటి ఘటనలు ఎంతటి ప్రభావం చూపగలవో మరోసారి స్పష్టమైంది.

మరిన్ని టెక్‌ వార్తల కోసం ఇక్కడ క్లిక్‌ చేయండి