Samsung Watch: శామ్‌సంగ్‌ గెలాక్సీ వాచ్ అద్భుతం.. మీరు స్పృహ తప్పి పడిపోవడానికి 5 నిమిషాల ముందే హెచ్చరిస్తుంది!

Samsung Galaxy Watch: సాంకేతిక ప్రపంచంలో దిగ్గజ సంస్థ అయిన శామ్‌సంగ్‌ (Samsung), తన స్మార్ట్‌వాచ్ వినియోగదారుల కోసం ఒక విప్లవాత్మక ఫీచర్‌ను తీసుకురాబోతోంది. మనం స్పృహ తప్పి పడిపోవడానికి (Fainting) ఐదు నిమిషాల ముందే గెలాక్సీ వాచ్ దానిని పసిగడుతుందని ఒక తాజా క్లినికల్ స్టడీలో వెల్లడైంది. దక్షిణ కొరియాలోని చుంగ్-అంగ్ యూనివర్సిటీ గ్వాంగ్మ్యోంగ్ హాస్పిటల్ భాగస్వామ్యంతో శామ్‌సంగ్‌ ఈ పరిశోధన చేపట్టింది. ఈ అధ్యయనం ప్రధానంగా ‘వాసోవాగల్ సింకోప్’ అనే పరిస్థితిపై దృష్టి సారించింది.

ఈ అధ్యయనంలో వాసోవాగల్ సింకోప్ లక్షణాలు ఉన్నాయని అనుమానించిన 132 మంది రోగులు పాల్గొన్నారు. వీరికి వైద్య పర్యవేక్షణలో ప్రేరిత మూర్ఛ మూల్యాంకనాలు నిర్వహించారు. పరీక్షలంతటా హృదయ స్పందన రేటు వైవిధ్య డేటాను పర్యవేక్షించే ఫోటోప్లెథిస్మోగ్రఫీ సెన్సార్‌తో కూడిన గెలాక్సీ వాచ్ 6ను పాల్గొన్నవారు ధరించారని కంపెనీ తెలిపింది. పరిశోధకులు ఆ తర్వాత సేకరించిన డేటాను ఏఐ-ఆధారిత ప్రిడిక్షన్ మోడల్‌ను ఉపయోగించి విశ్లేషించినట్లు చెబుతున్నారు.

వాసోవాగల్ సింకోప్ అంటే ఏమిటి?

ఒత్తిడి, నొప్పి, భయం లేదా తీవ్రమైన భావోద్వేగాల వల్ల గుండె వేగం,రక్తపోటు ఒక్కసారిగా పడిపోవడాన్ని ‘వాసోవాగల్ సింకోప్’ అంటారు. దీనివల్ల వ్యక్తి అకస్మాత్తుగా స్పృహ కోల్పోతాడు.

గెలాక్సీ వాచ్ ఎలా పనిచేస్తుంది?

ఈ పరిశోధనలో శామ్‌సంగ్‌ గెలాక్సీ వాచ్ 6 (Galaxy Watch 6) ను ఉపయోగించారు. ఇందులో ఉండే PPG (Photoplethysmography) సెన్సార్ సహాయంతో గుండె కొట్టుకునే వేగంలోని మార్పులను (Heart Rate Variability) నిరంతరం పర్యవేక్షించారు.

AI మోడల్: సేకరించిన డేటాను AI (ఆర్టిఫిషియల్ ఇంటెలిజెన్స్) ఆధారిత ప్రిడిక్షన్ మోడల్‌తో విశ్లేషించారు. అలాగే స్పృహ తప్పి పడిపోవడానికి 5 నిమిషాల ముందే ఈ సిస్టమ్ హెచ్చరికలను జారీ చేస్తుంది. ఈ అధ్యయనంలో 84.6% ఖచ్చితత్వాన్ని నమోదు చేయడం విశేషం.

దీనివల్ల కలిగే ప్రయోజనాలు

సాధారణంగా స్పృహ తప్పి పడిపోవడం ప్రాణాంతకం కాకపోయినప్పటికీ, అకస్మాత్తుగా పడిపోవడం వల్ల తలకు గాయాలు కావడం లేదా ఎముకలు విరగడం వంటి ప్రమాదాలు జరుగుతుంటాయి. ఐదు నిమిషాల ముందే హెచ్చరిక రావడం వల్ల బాధితులు సురక్షితంగా కింద కూర్చోవడానికి లేదా పడుకోవడానికి సమయం దొరుకుతుంది. ఇతరుల సహాయం కోరవచ్చు. అలాగే ప్రమాదకరమైన ప్రదేశాల నుండి పక్కకు తప్పుకోవచ్చు.

ఎప్పుడు అందుబాటులోకి వస్తుంది?

ప్రస్తుతానికి ఇది పరిశోధన దశలోనే ఉంది. శామ్‌సంగ్‌ ఈ ఫీచర్‌ను గెలాక్సీ వాచ్ వినియోగదారులందరికీ ఎప్పుడు రోల్ అవుట్ చేస్తుందనే దానిపై ఇంకా అధికారిక ప్రకటన చేయలేదు. అయితే, రాబోయే సాఫ్ట్‌వేర్ అప్‌డేట్స్ లేదా కొత్త మోడల్స్‌లో ఈ హెల్త్ ఫీచర్‌ను మనం ఆశించవచ్చు.

మరిన్ని టెక్ వార్తల కోసం ఇక్కడు క్లిక్ చేయండి