వామ్మో.. మతిపోగొడుతున్న ఐఫోన్ 18 ప్రో ఫీచర్లు! డిస్‌ప్లే, బ్యాటరీ అయితే నెక్ట్స​్‌ లెవెల్‌?

Iphone 18 Pro Max

ఆపిల్ తన తదుపరి తరం ఫ్లాగ్‌షిప్ స్మార్ట్‌ఫోన్‌లైన ఐఫోన్ 18 ప్రో, ఐఫోన్ 18 ప్రో మాక్స్‌లను అధికారికంగా ప్రకటించడానికి ఇంకా సమయం ఉన్నప్పటికీ, ఇప్పటికే పలు లీకులు టెక్ ప్రపంచంలో చర్చకు దారితీస్తున్నాయి. ఈ కొత్త మోడళ్లలో డిస్ప్లే డిజైన్, కెమెరా టెక్నాలజీ, ప్రాసెసర్, బ్యాటరీ వంటి అంశాల్లో గణనీయమైన మార్పులు ఉండవచ్చని నివేదికలు సూచిస్తున్నాయి. అత్యంత చర్చనీయాంశంగా మారింది డిస్ప్లే డిజైన్. ప్రస్తుతం ఉన్న డైనమిక్ ఐలాండ్ స్థానంలో స్క్రీన్ కింద ఫేస్ ఐడి టెక్నాలజీని ఆపిల్ ప్రవేశపెట్టవచ్చని సమాచారం. ఇలా జరిగితే డిస్ప్లే మరింత క్లియర్‌గా కనిపించే అవకాశం ఉంది. ముందు కెమెరా మాత్రం స్క్రీన్ ఎగువ ఎడమ మూలలో చిన్న రంధ్రం రూపంలో ఉండవచ్చని లీకులు చెబుతున్నాయి.

కెమెరా విభాగంలో కూడా ఆపిల్ కొత్త ప్రయోగాలు చేసే అవకాశముంది. కనీసం ఒక కెమెరాలో మెకానికల్ ఐరిస్ టెక్నాలజీని ఉపయోగించవచ్చని తెలుస్తోంది. దీని ద్వారా లైటింగ్ పరిస్థితులకు అనుగుణంగా కెమెరా ఎపర్చర్ మారుతుంది. అలాగే శామ్‌సంగ్ అభివృద్ధి చేసిన మూడు పొరల ఇమేజ్ సెన్సార్‌ను కూడా ఉపయోగించే అవకాశం ఉందని సమాచారం. దీని వల్ల లైటింగ్‌ తక్కువగా ఉన్నా మెరుగైన ఫోటోలు తీయవచ్చు. పనితీరు విషయంలో ఐఫోన్ 18 ప్రో మోడళ్లలో కొత్త A20 ప్రో చిప్‌సెట్ ఉండొచ్చని అంచనా. ఇది 2 నానోమీటర్ తయారీ సాంకేతికతతో రూపొందించబడే అవకాశం ఉంది. దీనివల్ల వేగం పెరగడంతో పాటు విద్యుత్ వినియోగం తగ్గుతుందని టెక్ నిపుణులు చెబుతున్నారు.

బ్యాటరీ పరంగా ఐఫోన్ 18 ప్రో మాక్స్‌లో సుమారు 5,100mAh బ్యాటరీ ఉండవచ్చని లీకులు సూచిస్తున్నాయి. ఇది ఇప్పటి వరకు ఐఫోన్‌లలో ఉన్న బ్యాటరీల కంటే పెద్దదిగా ఉండొచ్చు. అంతేకాదు LTPO ప్లస్ OLED డిస్ప్లే టెక్నాలజీ వాడటం వల్ల బ్యాటరీ మన్నిక కూడా మెరుగుపడే అవకాశం ఉంది. లాంచ్ విషయానికి వస్తే, ఐఫోన్ 18 ప్రో సిరీస్‌ను 2026 సెప్టెంబర్‌లో ఆపిల్ విడుదల చేసే అవకాశముందని నివేదికలు చెబుతున్నాయి. అయితే ధరల విషయంలో కంపెనీ ఇప్పటివరకు ఎలాంటి అధికారిక సమాచారం ప్రకటించలేదు. ప్రస్తుతం వస్తున్న లీకులు నిజమైతే, ఐఫోన్ 18 ప్రో సిరీస్ ఆపిల్ చరిత్రలో కీలకమైన అప్‌గ్రేడ్‌గా నిలవొచ్చని టెక్ వర్గాలు అభిప్రాయపడుతున్నాయి.

మరిన్ని టెక్‌ వార్తల కోసం ఇక్కడ క్లిక్‌ చేయండి