FIFA World Cup 2026 : ఫిఫా వరల్డ్ కప్లో ఎంబాప్పే సరికొత్త చరిత్ర.. రొనాల్డో ఆల్టైమ్ రికార్డ్ బద్దలు
FIFA World Cup 2026 : ఫిఫా వరల్డ్ కప్ 2026లో స్వీడన్పై రెండు గోల్స్ చేసిన కిలియన్ ఎంబాప్పే వరల్డ్ కప్ నాకౌట్ దశలో అత్యధిక గోల్స్ చేసిన ఆటగాడిగా చరిత్ర సృష్టించాడు. రొనాల్డో నాజారియో రికార్డును అధిగమించి ఫ్రాన్స్ను రౌండ్ ఆఫ్ 16కు చేర్చాడు.
FIFA World Cup 2026 : ఫుట్బాల్ ప్రపంచంలో ఫ్రాన్స్ స్టార్ స్ట్రైకర్ కిలియన్ ఎంబాప్పే సరికొత్త చరిత్ర సృష్టించాడు. ప్రస్తుత ఫిఫా వరల్డ్ కప్ 2026లో భాగంగా మంగళవారం (జూన్ 30) జరిగిన రౌండ్ ఆఫ్ 32 మ్యాచ్లో ఫ్రాన్స్ జట్టు 3-0 తేడాతో స్వీడన్ను చిత్తు చేసింది. ఈ ప్రతిష్టాత్మక మ్యాచ్లో రియల్ మాడ్రిడ్ స్టార్ ప్లేయర్ ఎంబాప్పే రెండు అద్భుతమైన గోల్స్ చేసి ఫ్రాన్స్కు అద్భుత విజయాన్ని అందించాడు. ఈ రెండు గోల్స్తో ఎంబాప్పే వరల్డ్ కప్ చరిత్రలోనే అత్యంత అరుదైన, ప్రతిష్టాత్మకమైన వరల్డ్ రికార్డును తన పేరిట లిఖించుకున్నాడు. కేవలం 28 ఏళ్ల వయసులోనే అతను ఫుట్బాల్ లెజెండ్ల రికార్డులను తిరగరాస్తూ దూసుకుపోతున్నాడు.
ఫిఫా వరల్డ్ కప్ నాకౌట్ స్టేజ్ మ్యాచుల్లో అత్యధిక గోల్స్ చేసిన ఆటగాడిగా ఎంబాప్పే ప్రపంచంలోనే నంబర్ 1 స్థానానికి చేరుకున్నాడు. స్వీడన్పై చేసిన రెండు గోల్స్తో కలిపి వరల్డ్ కప్ నాకౌట్ మ్యాచుల్లో ఎంబాప్పే చేసిన మొత్తం గోల్స్ సంఖ్య 10 కి చేరింది. దీనితో అతను బ్రెజిల్ దిగ్గజాలు రొనాల్డో నాజారియో, లియోనిడాస్ (తలో 8 గోల్స్) రికార్డులను దాటేశాడు. వీరి వెనుక బ్రెజిల్ లెజెండ్ పీలే, ఫ్రాన్స్కు చెందిన జస్ట్ ఫాంటైన్ చెరో 7 గోల్స్తో ఉన్నారు. నాకౌట్ లాంటి అత్యంత ఒత్తిడితో కూడిన మ్యాచుల్లో వరుసగా గోల్స్ సాధిస్తూ ఎంబాప్పే తన సత్తా ఏంటో ప్రపంచానికి మరోసారి నిరూపించాడు.
ప్రస్తుత తరం ఫుట్బాల్ లెజెండ్లతో పోల్చి చూస్తే ఎంబాప్పే రికార్డు ఎంత గొప్పదో అర్థమవుతుంది. వరల్డ్ కప్ చరిత్రలోనే 19 గోల్స్తో అత్యధిక గోల్స్ చేసిన ఆటగాడిగా టాప్లో ఉన్న లియోనెల్ మెస్సీ.. నాకౌట్ మ్యాచుల్లో మాత్రం కేవలం 5 గోల్స్ మాత్రమే చేయగలిగాడు. ఇక మెస్సీకి చిరకాల ప్రత్యర్థి అయిన పోర్చుగల్ స్టార్ క్రిస్టియానో రొనాల్డోకు అయితే వరల్డ్ కప్ చరిత్రలో ఇప్పటివరకు నాకౌట్ స్టేజ్లో ఒక్క గోల్ కూడా చేసిన రికార్డు లేకపోవడం గమనార్హం. ఈ టోర్నమెంట్లో ఎంబాప్పేకు ఇది 6వ గోల్ కాగా, గోల్డెన్ బూట్ రేసులో అర్జెంటినా స్టార్ మెస్సీతో కలిసి అతను సమానంగా టాప్ ప్లేస్లో నిలిచాడు.
స్వీడన్తో జరిగిన ఈ మ్యాచ్లో ఎంబాప్పే మెరుపు వేగం, అద్భుతమైన ఫినిషింగ్ చూసి ఫ్యాన్స్ ఫిదా అయ్యారు. ప్లేమేకర్ మైఖేల్ ఒలిసే అందించిన అద్భుతమైన అసిస్ట్లను (హ్యాట్రిక్ అసిస్ట్స్) వాడుకుంటూ ఎంబాప్పే స్వీడన్ డిఫెన్స్ను సులభంగా ఛేదించాడు. మ్యాచ్ అనంతరం ఫ్రాన్స్ మేనేజర్ మాట్లాడుతూ.. “మనం కళ్ల ముందే ఫుట్బాల్ చరిత్ర సృష్టింపబడటాన్ని చూస్తున్నాం. ఎంబాప్పే మ్యాచ్కు ముందు రికార్డుల గురించి ఆలోచించడు.. గ్రౌండ్లో దొరికే అవకాశాల గురించే చూస్తాడు. ప్రపంచంలోనే అతిపెద్ద వేదికపై అతను ఆడుతున్న తీరు అతడిని ఒక ప్రత్యేకమైన కేటగిరీలో నిలబెట్టింది” అని ప్రశంసల వర్షం కురిపించారు.
1998 వరల్డ్ కప్ ఫైనల్లో బ్రెజిల్ను 3-0తో ఓడించిన తర్వాత, ఫ్రాన్స్ జట్టుకు నాకౌట్ మ్యాచ్లో లభించిన అతిపెద్ద విజయం ఇదే కావడం విశేషం. ఈ అద్భుత విజయంతో ఫ్రాన్స్ జట్టు సగర్వంగా రౌండ్ ఆఫ్ 16 (ప్రీ-క్వార్టర్స్)లోకి అడుగుపెట్టింది. జులై 4వ తేదీన జరగబోయే ఈ కీలక పోరులో ఫ్రాన్స్ జట్టు పరాగ్వేతో తలపడనుంది. పెనాల్టీ షూటౌట్లో జర్మనీ వంటి బలమైన జట్టుకు షాక్ ఇచ్చి రౌండ్ ఆఫ్ 16కు దూసుకొచ్చిన పరాగ్వేను డీకొట్టడం ఫ్రాన్స్కు అంత సులువు కాదు. ఈ మ్యాచ్లో కూడా ఎంబాప్పే మెరిస్తే ఫ్రాన్స్ క్వార్టర్ ఫైనల్స్ చేరడం ఖాయం.
మరిన్ని క్రీడా వార్తల కోసం ఇక్కడ క్లిక్ చేయండి..