28 సెంచరీలు, 16వేలకుపైగా పరుగులు.. కట్‌చేస్తే.. జట్టు నుంచి తన్ని తరిమేశారు.. కారణం తెలిస్తే షాకే

Zimbabwe all rounder Sean williams: అంతర్జాతీయ క్రికెట్‌లో 8,000 పరుగులు చేసిన ఆటగాడు, 20 సంవత్సరాలుగా అంతర్జాతీయ క్రికెట్ ఆడుతున్న ఆటగాడు ఇప్పుడు పునరావాస కేంద్రంలో ఉన్నాడు. జింబాబ్వే సెంట్రల్ క్రాంటక్ట్ నుంచి మినహాయించిన సీన్ విలియమ్స్ గురించి మనం మాట్లాడుతున్నాం. విలియమ్స్ తన వ్యసనాన్ని అధిగమించడానికి పునరావాస కేంద్రంలో చేరాడు. ఈ ఆటగాడు మాదకద్రవ్య వ్యసనంతో పోరాడుతున్నాడని, జట్టుకు ఎంపిక చేయడం కుదరదని జింబాబ్వే క్రికెట్ బోర్డు వెల్లడించింది.

సీన్ విలియమ్స్ గురించి జింబాబ్వే ఏం చెప్పిందంటే..

పురుషుల టీ20 ప్రపంచ కప్ ఆఫ్రికా క్వాలిఫయర్స్‌కు ఒక రాత్రి ముందు, సీన్ విలియమ్స్ ఇటీవల వ్యక్తిగత కారణాలను చూపుతూ జింబాబ్వే జట్టు నుంచి వైదొలిగాడు. మంగళవారం, జింబాబ్వే క్రికెట్ విలియమ్స్ గైర్హాజరీకి కారణాన్ని గుర్తించడానికి అంతర్గత దర్యాప్తు నిర్వహించినట్లు వెల్లడించింది. ఆ తర్వాత విలియమ్స్ తాను మాదకద్రవ్య దుర్వినియోగంతో పోరాడుతున్నానని, పునరావాస కేంద్రంలో చేరినట్లు బోర్డుకు తెలియజేశాడు. బోర్డు ఇలా పేర్కొంది, “గత రెండు దశాబ్దాలుగా జింబాబ్వే క్రికెట్‌కు ఆయన చేసిన అపారమైన సహకారానికి ధన్యవాదాలు. విలియమ్స్ ఇటీవలి క్రికెట్ హిస్టరీలో కొన్ని కీలక రికార్డుల్లో ప్రధాన పాత్ర పోషించాడు. మైదానంలో, వెలుపల శాశ్వత వారసత్వాన్ని మిగిల్చాడు. జింబాబ్వే క్రికెట్ అతను త్వరగా కోలుకోవాలని కోరుకుంటున్నాం” అంటూ చెప్పుకొచ్చింది.

సీన్ విలియమ్స్ అద్భుతమైన కెరీర్..

జింబాబ్వే తరపున 24 టెస్టుల్లో సీన్ విలియమ్స్ 6 సెంచరీలు సాధించాడు. వన్డేల్లో, అతను 164 మ్యాచ్‌ల్లో 5,127 పరుగులు చేశాడు. వాటిలో ఎనిమిది సెంచరీలు ఉన్నాయి. ఈ జింబాబ్వే ఆల్ రౌండర్ 85 టీ20 అంతర్జాతీయ మ్యాచ్‌ల్లో 1,805 పరుగులు చేశాడు. అంతర్జాతీయ క్రికెట్‌లో 161 వికెట్లు కూడా పడగొట్టాడు. ప్రొఫెషనల్ క్రికెట్‌లో, అతను మొత్తం 28 సెంచరీలు, 16,000 పరుగులు చేశాడు.

ఈ క్రికెటర్లు కూడా డ్రగ్స్ ఉచ్చులో..

పాకిస్తాన్ మాజీ కెప్టెన్ వసీం అక్రమ్, వినోద్ కాంబ్లి, వెస్టిండీస్ మాజీ క్రికెటర్ డేవిడ్ ముర్రే, దివంగత ఆస్ట్రేలియా క్రికెటర్ ఆండ్రూ సైమండ్స్, జింబాబ్వేకు చెందిన బ్రెండన్ టేలర్ అందరూ మాదకద్రవ్యాల బానిసలే.