IND vs SL: శ్రీలంకతో ఫైనల్ ఛాన్స్ రా భయ్.. ఫెయిలైతే టీమిండియాలో నీ కెరీర్ క్లోజ్..!

India Vs Sri Lanka Test Series

India vs Sri Lanka Test Series: టీమిండియా యువ బ్యాటర్ సాయి సుదర్శన్ కెరీర్ తీవ్ర సందిగ్ధంలో పడింది. శ్రీలంకతో జరగబోయే టెస్టు సిరీస్ ఈ ఎడమచేతి వాటం బ్యాటర్‌కు అత్యంత కీలకంగా మారింది. ఈ పర్యటనలో నిరూపించుకోలేకపోతే అతడి అంతర్జాతీయ టెస్టు కెరీర్‌కు ఎండ్ కార్డ్ పడటం ఖాయంగా కనిపిస్తోంది. అభిమానుల్లో తీవ్ర ఉత్కంఠ నెలకొంది.

భారత టెస్టు జట్టులో సుదీర్ఘకాలం 3వ స్థానంలో చెలరేగిన ఛేతేశ్వర్ పూజారా స్థానాన్ని భర్తీ చేసే బాధ్యతను సెలెక్టర్లు సాయి సుదర్శన్‌కు అప్పగించారు. ఐపీఎల్ 2025లో 700కి పైగా పరుగులు సాధించి తన అద్భుతమైన బ్యాటింగ్ టెక్నిక్‌తో అందరి దృష్టిని ఆకర్షించిన ఈ యువ ఆటగాడు, టెస్టుల్లో మాత్రం ఆ స్థాయిలో రాణించలేకపోతున్నాడు. పూజారా లాంటి దిగ్గజం వదిలేసిన స్థానంలో నిలదొక్కుకోవడం సాయి సుదర్శన్‌కు పెద్ద సవాలుగా మారింది.

ఇంగ్లాండ్ పర్యటన నుంచి నిరాశజనక ప్రదర్శన..

ఐపీఎల్ అద్భుత ఫామ్‌తో ఇంగ్లాండ్ పర్యటనకు ఎంపికైన సుదర్శన్, అక్కడ తొలి టెస్టులోనే అరంగేట్రం చేసే అవకాశం దక్కించుకున్నాడు. అయితే, ఆ మ్యాచ్‌లో కేవలం 30 పరుగులు మాత్రమే చేసి నిరాశపరిచాడు. ఆ సిరీస్ పొడవునా పెద్దగా ప్రభావం చూపలేకపోయినా, మేనేజ్‌మెంట్ అతడిపై నమ్మకంతో అవకాశాలు ఇస్తూనే వచ్చింది. వెస్టిండీస్‌తో జరిగిన స్వదేశీ సిరీస్‌లోనూ అతడికి చోటు దక్కినప్పటికీ, ఒక భారీ ఇన్నింగ్స్ ఆడటంలో విఫలమయ్యాడు.

మూడంకెల స్కోరు లేకపోవడం ముప్పుగా మారింది..

ఇప్పటివరకు 7 టెస్టు మ్యాచ్‌ల్లో 12 ఇన్నింగ్స్‌లు ఆడిన సాయి సుదర్శన్ 31.91 సగటుతో 383 పరుగులు మాత్రమే సాధించాడు. ఇందులో 3 అర్ధశతకాలు ఉన్నప్పటికీ, అతడి అత్యధిక స్కోరు 87 పరుగులుగానే ఉండిపోయింది. ఇంతవరకు అంతర్జాతీయ టెస్టుల్లో ఒక్క సెంచరీ కూడా సాధించకపోవడం అతడి ఎంపికపై విమర్శలకు దారితీస్తోంది. ఆరంభాలు లభించినా వాటిని పెద్ద స్కోర్లుగా మల్చలేకపోవడం ప్రధాన బలహీనతగా మారింది.

శ్రీలంక పర్యటనతో తేలనున్న భవిష్యత్తు..

ఆగస్టు 15 నుంచి గాలె, కొలంబో వేదికలుగా శ్రీలంకతో జరగనున్న రెండు మ్యాచ్‌ల టెస్టు సిరీస్ సుదర్శన్‌కు నిజమైన అగ్నిపరీక్ష కానుంది. బోర్డు ఇప్పటికే 15 మందితో కూడిన జట్టును ప్రకటించగా, అందులో సారాంశ్ జైన్ లాంటి కొత్త ముఖాలతో పాటు సుదర్శన్ స్థానం సాధించాడు. రాబోయే న్యూజిలాండ్ సిరీస్‌లో జట్టులో స్థానం నిలుపుకోవాలంటే ఈ పర్యటనలో సుదర్శన్ బ్యాట్ ఝుళిపించాల్సిందే. లేదంటే అతడి స్థానంలో మరొకరికి అవకాశం ఇవ్వడం ఖాయంగా కనిపిస్తోంది.