Watch : పిచ్‌పై దొరికిన గోల్డ్ చైన్.. ఆర్‌సీబీ ప్లేయర్ నిజాయితీకి ఫిదా అవుతున్న ఫ్యాన్స్

Rcb

Watch : సాధారణంగా క్రికెట్ మ్యాచ్ అంటే సిక్సర్లు, ఫోర్లు, రికార్డుల గురించే మాట్లాడుకుంటాం. కానీ ఐపీఎల్ 2026లో రాయల్ ఛాలెంజర్స్ బెంగళూరు (RCB), కోల్‌కతా నైట్ రైడర్స్ (KKR) మధ్య జరిగిన మ్యాచ్ ఒక వెరైటీ ఘటనతో వార్తల్లో నిలిచింది. పరుగుల వేట కంటే కూడా మైదానంలో ఒక ఆటగాడు చూపించిన నిజాయితీ ఇప్పుడు సోషల్ మీడియాలో హాట్ టాపిక్‌గా మారింది. ఆర్‌సీబీ బ్యాటర్ దేవదత్ పడిక్కల్ చేసిన పనికి నెటిజన్లు సెల్యూట్ చేస్తున్నారు.

ఈ ఆసక్తికర ఉదంతం బెంగళూరు ఇన్నింగ్స్ సమయంలో జరిగింది. ఆర్‌సీబీ ఓపెనర్ జాకబ్ బెథెల్ ఇన్నింగ్స్ నాలుగో ఓవర్‌లో కార్తీక్ త్యాగి వేసిన షార్ట్ పిచ్ బంతిని ఎదుర్కొన్నాడు. ఆ బంతి వేగంగా వచ్చి బెథెల్ చేతికి తగిలి, ఆపై హెల్మెట్‌ను బలంగా తాకింది. ఆ దెబ్బకు తగిలిన షాక్‌లో బెథెల్ మెడలో ఉన్న బంగారు గొలుసు తెగి పిచ్‌పై పడిపోయింది. ఆ కంగారులో బెథెల్ 15 పరుగులకే అవుట్ అయి, తన చైన్ పడిపోయిన విషయం గమనించకుండానే పెవిలియన్‌కు వెళ్ళిపోయాడు.

బెథెల్ అవుట్ అయిన తర్వాత క్రీజులోకి వచ్చిన దేవదత్ పడిక్కల్.. పిచ్‌పై పడి ఉన్న బంగారు గొలుసును చూశాడు. అది విలువైన బంగారు చైన్ అని గ్రహించిన పడిక్కల్, వెంటనే దాన్ని తీసుకుని అక్కడే ఉన్న అంపైర్లకు, మ్యాచ్ అధికారులకు అప్పగించాడు. ఒకవేళ పడిక్కల్ గమనించకపోతే, అది మట్టిలో కలిసిపోయేది లేదా షూ కింద పడి పాడైపోయేది. తన తోటి ఆటగాడి వస్తువును కాపాడటంలో పడిక్కల్ చూపిన చొరవను చూసి మైదానంలోని ఆటగాళ్లే కాకుండా, టీవీల్లో చూస్తున్న ప్రేక్షకులు కూడా ప్రశంసలు కురిపిస్తున్నారు.

నిజాయితీ సంగతి పక్కన పెడితే, జాకబ్ బెథెల్ ఆటతీరు మాత్రం ఆర్‌సీబీ మేనేజ్‌మెంట్‌ను కలవరపెడుతోంది. ఫిలిప్ సాల్ట్ గాయం కారణంగా జట్టులోకి వచ్చిన బెథెల్.. ఇప్పటివరకు ఆడిన 6 ఇన్నింగ్స్‌ల్లో కేవలం 85 పరుగులు మాత్రమే చేశాడు. ఇందులో అతని అత్యధిక స్కోరు 27 పరుగులు మాత్రమే. ఓపెనర్‌గా భారీ స్కోర్లు చేయాల్సిన సమయంలో వరుసగా విఫలమవ్వడం బెంగళూరుకు మైనస్‌గా మారుతోంది. అయితే ఈ మ్యాచ్‌లో ఆర్‌సీబీ ఘనవిజయం సాధించడంతో ఆ లోటు కాస్త మెరుగుపడింది.

మరిన్ని క్రీడా వార్తల కోసం ఇక్కడ క్లిక్ చేయండి..