IPL 2026 Auction: రెండో టైటిల్ లోడింగ్.. ఈ రిపేర్లు చేస్తే ఆర్‌సీబీకి తిరుగులేదంతే..

Rcb Team

Royal Challengers Bengaluru: రాయల్ ఛాలెంజర్స్ బెంగళూరు (RCB) జట్టు 18 ఏళ్ల సుదీర్ఘ నిరీక్షణకు తెరదించి, IPL 2025 టైటిల్‌ను కైవసం చేసుకుంది. ఫైనల్‌లో పంజాబ్ కింగ్స్‌ను ఓడించి కప్పు గెలిచినప్పటికీ, వచ్చే సీజన్‌లో వరుసగా రెండో టైటిల్ సాధించాలంటే జట్టులో కొన్ని బలహీనతలు ఉన్నాయి. ముఖ్యంగా, IPL 2026 మినీ వేలానికి ముందు RCB దృష్టి పెట్టాల్సిన కీలక అంశం బౌలింగ్ విభాగం .

బౌలింగ్ డెప్త్‌లో లోపం ..

IPL 2025లో RCB బ్యాటింగ్ లైనప్ అద్భుతంగా రాణించింది. విరాట్ కోహ్లీ, ఫిల్ సాల్ట్, జితేశ్ శర్మ వంటి ఆటగాళ్లు అసాధారణంగా ఆడారు. అయితే, జట్టు విజయం సాధించినప్పటికీ, బౌలింగ్ యూనిట్‌లో కొన్ని తీవ్రమైన సమస్యలు కనిపించాయి.

ప్రధాన బౌలర్లలో కేవలం ఒకరిద్దరు మాత్రమే అత్యుత్తమంగా ప్రదర్శించారు. మిగిలిన బౌలర్లలో స్థిరత్వం కొరవడింది. జట్టులోని ప్రధాన బాధ్యతలను సీనియర్లు అయిన జోష్ హేజిల్‌వుడ్, భువనేశ్వర్ కుమార్ మోయాల్సి వచ్చింది.

IPL 2025లో RCB బౌలర్లు (కీలక గణాంకాలు):

జోష్ హేజిల్‌వుడ్, 22 (తీసిన వికెట్లు), 8.77 (ఎకానమీ రేట్)

భువనేశ్వర్ కుమార్, 17(తీసిన వికెట్లు), 9.29 (ఎకానమీ రేట్)

యశ్ దయాల్,13 (తీసిన వికెట్లు), 9.59 (ఎకానమీ రేట్)

సుయాష్ శర్మ, 8 (తీసిన వికెట్లు), 8.84 (ఎకానమీ రేట్)

కృనాల్ పాండ్యా, 17 (తీసిన వికెట్లు), 8.24 (ఎకానమీ రేట్).

హేజిల్‌వుడ్, భువనేశ్వర్ ఇద్దరూ కలిసి ఏకంగా 39 వికెట్లు పడగొట్టారు. కానీ, యువ బౌలర్లు అయిన యశ్ దయాల్ (13 వికెట్లు) ఎకానమీ రేట్ ఎక్కువగా ఉంది. ఇక, టీమ్ ప్రధాన స్పిన్నర్ సుయాష్ శర్మ (8 వికెట్లు) కేవలం పరుగులు కట్టడి చేసే ‘డిఫెన్సివ్ బౌలర్‌’గా మాత్రమే ఉన్నాడే, తప్ప కీలక వికెట్లు తీయడంలో విఫలమయ్యాడు. దీంతో, 30 ఏళ్లు పైబడిన ఇద్దరు పేసర్లు యువ ఆటగాళ్లతో పోలిస్తే మెరుగ్గా రాణించారు.

హేజిల్‌వుడ్, భువనేశ్వర్‌లకు తోడుగా నిలబడే ఒక నాణ్యమైన బౌలర్ లేకపోవడం RCBకి అతిపెద్ద లోపం.

మినీ వేలంలో RCB గేమ్ ప్లాన్ ఎలా ఉండాలి?

మినీ వేలంలో ఫ్రాంచైజీలు పెద్ద సంఖ్యలో ఆటగాళ్లను విడుదల చేయవు. అయినప్పటికీ, RCB కొన్ని కీలక మార్పులు చేయాలని భావిస్తోంది. పేలవ ప్రదర్శన చేసిన రసిఖ్ సలాం దార్‌ను, అలాగే మైదానం వెలుపలి వివాదాల కారణంగా యశ్ దయాల్‌ను కూడా RCB విడుదల చేయవచ్చు.

భారత పేసర్ కోసం వేట: ఒకవేళ రసిఖ్, యశ్ దయాల్‌లను విడుదల చేస్తే, భువీ, హేజిల్‌వుడ్ పక్కన మూడో పేసర్‌గా రాణించగలిగే ఒక నాణ్యమైన భారత పేసర్‌ను జట్టులోకి తీసుకోవడం అత్యవసరం.

వికెట్ టేకింగ్ స్పిన్నర్: సుయాష్ బౌలింగ్ బాగానే ఉన్నా, వికెట్లు తీసే సామర్థ్యం లేదు. యుజ్వేంద్ర చహల్ జట్టును విడిచిపెట్టినప్పటి నుంచి, RCBకి వికెట్లు తీయగల స్పిన్నర్ దొరకలేదు. ఈ మినీ వేలంలో బలమైన ప్రత్యర్థులపై ఒత్తిడి పెంచడానికి, వికెట్లు తీయగల ఒక అటాకింగ్ స్పిన్నర్‌ను కొనుగోలు చేయడం చాలా ముఖ్యం.

IPL 2026 మినీ వేలంలో RCB బ్యాటింగ్‌ను మెరుగుపరచాల్సిన అవసరం లేదు. కానీ, బౌలింగ్ విభాగాన్ని “రిపేర్” చేయాలి. ప్రధాన బౌలింగ్ కోర్ అలాగే ఉన్నప్పటికీ, జట్టు తమ ర్యాంకుల్లోకి ఒక వికెట్ తీయగల స్పిన్నర్‌ను, ఒక నాణ్యమైన భారత పేసర్‌ను చేర్చుకోవాలని నిపుణులు సూచిస్తున్నారు.