Video : యాషెస్ టెస్ట్‌లో సెంచరీ పూర్తి చేసిన మిచెల్ స్టార్క్.. గాల్లో ఎగిరి పట్టిన క్యాచ్ చూస్తే కళ్లు చెదిరిపోవాల్సిందే

Mitchell Starc

Video : యాషెస్ సిరీస్‌లో భాగంగా పెర్త్‌లో జరుగుతున్న తొలి టెస్టు రెండో రోజున ఆస్ట్రేలియా పేస్ బౌలర్ మిచెల్ స్టార్క్ తన డేంజరస్ బౌలింగ్, అద్భుతమైన ఫీల్డింగ్‌తో ఇంగ్లాండ్ బ్యాటింగ్ లైనప్‌ను కుదిపేశాడు. ముఖ్యంగా ఇంగ్లాండ్ ఓపెనర్ జాక్ క్రాలీని ఈ టెస్ట్ మ్యాచ్‌లోని రెండు ఇన్నింగ్స్‌లలోనూ సున్నా పరుగులకే అవుట్ చేసి, స్టార్క్ సంచలనం సృష్టించాడు. ఈ మ్యాచ్‌లో స్టార్క్ ఏకంగా 7 వికెట్లు తీయడమే కాక, అద్భుతమైన డైవింగ్ క్యాచ్ కూడా పట్టాడు. ఇదే మ్యాచ్‌లో స్టార్క్ యాషెస్ టెస్టుల్లో తన 100వ వికెట్‌ను కూడా పూర్తి చేసుకుని రికార్డు సృష్టించాడు.

గాలిలో ఎగిరి పట్టిన క్యాచ్

ఇంగ్లాండ్ రెండో ఇన్నింగ్స్ ప్రారంభంలోనే మిచెల్ స్టార్క్ తన బౌలింగ్‌తో పాత ఫామ్‌లోకి వచ్చేశాడు. మొదటి ఓవర్‌లోనే క్రాలీ వేసిన ఒక డ్రైవ్‌ను కొంచెం షాట్‌గా ఆడాడు. బంతి గాలిలో లేవగానే, తన ఫాలో-త్రూలో ఉన్న స్టార్క్ ఒక్కసారిగా గాలిలోకి ఎడమ చేతిని చాచి డైవ్ చేస్తూ అద్భుతంగా క్యాచ్ అందుకున్నాడు. క్రాలీ కేవలం ఐదు బంతులు మాత్రమే ఆడి, రెండు ఇన్నింగ్స్‌లలోనూ సున్నా పరుగులకే అవుట్ అయ్యాడు. థర్డ్ అంపైర్ అనేక రీప్లేలను పరిశీలించిన తర్వాత, స్టార్క్ వేళ్లు బంతి కింద ఉందని ధృవీకరించడంతో క్యాచ్‌ను సరైనదిగా ప్రకటించారు. స్టార్క్ పట్టిన ఈ క్యాచ్ కారణంగా, టెస్ట్ క్రికెట్ చరిత్రలో మొదటి మూడు ఇన్నింగ్స్‌లలోనూ తొలి వికెట్ ఒక్క పరుగు కూడా చేయకుండానే పడిపోవడం ఇదే మొదటిసారి అయ్యింది.

తొలి ఇన్నింగ్స్‌లో స్టార్క్ మాయాజాలం

ఇంగ్లాండ్ మొదటి ఇన్నింగ్స్‌లో కూడా స్టార్క్ బౌలింగ్ మ్యాజిక్ నడిచింది. అతను తన కెరీర్‌లోని అత్యుత్తమ ప్రదర్శనలలో ఒకటిగా నిలిచే విధంగా 7 వికెట్లు తీసి ఇంగ్లాండ్‌ను కేవలం 172 పరుగులకే కట్టడి చేశాడు. ఈ ఇన్నింగ్స్‌లో స్టార్క్, క్రాలీతో పాటు బెన్ డకెట్, జో రూట్, బెన్ స్టోక్స్, గస్ అట్కిన్సన్, జేమీ స్మిత్, మార్క్ వుడ్‌లను అవుట్ చేశాడు. ఈ అద్భుత ప్రదర్శనతోనే స్టార్క్ యాషెస్‌లో 100 టెస్ట్ వికెట్ల మైలురాయిని కూడా చేరుకున్నాడు.

మ్యాచ్ పరిస్థితి, బౌలర్ల ఆధిపత్యం

ఈ మ్యాచ్‌లో ఇప్పటి వరకు బౌలర్లే ఆధిపత్యం చెలాయించారు. మొదటి ఇన్నింగ్స్‌లో ఇంగ్లాండ్ 172 పరుగులకు ఆలౌట్ అయినా, వారి బౌలర్లు అద్భుతంగా పుంజుకున్నారు. ఇంగ్లాండ్ తరఫున కెప్టెన్ బెన్ స్టోక్స్ 5 వికెట్లు తీయడంతో, ఆస్ట్రేలియాను కేవలం 132 పరుగులకే ఆలౌట్ చేశారు. దీంతో ఇంగ్లాండ్‌కు 40 పరుగుల స్వల్ప ఆధిక్యం లభించింది. ఈ ఆధిక్యం మ్యాచ్‌ను మరింత ఉత్కంఠభరితంగా మార్చింది.పెర్త్ పిచ్ పేస్ బౌలర్లకు అనుకూలంగా ఉండటంతో మ్యాచ్ మొదటి రోజున ఏకంగా 19 వికెట్లు పడ్డాయి. దీనివల్ల రెండు జట్ల బ్యాటర్లు కూడా పెద్ద భాగస్వామ్యాలు నెలకొల్పలేకపోయారు.

ఆస్ట్రేలియాకు లోటు

ఈ యాషెస్ ఓపెనర్‌కు ఆస్ట్రేలియా తమ ముఖ్య బౌలర్లు అయిన ప్యాట్ కమిన్స్, జోష్ హేజిల్‌వుడ్ లేకుండానే బరిలోకి దిగింది. గాయాల కారణంగా వీరిద్దరూ అందుబాటులో లేరు. అయితే మిచెల్ స్టార్క్ ఒక్కడే ఈ లోటును చాలా వరకు భర్తీ చేసినప్పటికీ, రాబోయే రోజుల్లో వారి లేమి ఆస్ట్రేలియాపై ప్రభావం చూపే అవకాశం ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..