ఐపీఎల్ హిస్టరీలోనే తోపు మ్యాచ్.. అన్ని రికార్డులను తొక్కిపడేసిన MI vs RCB గేమ్..!

Ipl 2026 Mi Vs Rcb

MI vs RCB Longest IPL Match Record: ముంబైలోని వాంఖడే మైదానంలో ఆదివారం జరిగిన ముంబై ఇండియన్స్ వర్సెస్ రాయల్ ఛాలెంజర్స్ బెంగళూరు మ్యాచ్ ఐపీఎల్ చరిత్రలోనే అత్యంత సుదీర్ఘ కాలం పాటు సాగిన లీగ్ మ్యాచ్‌గా నిలిచింది. ఎటువంటి వర్షం ఆటంకం లేకుండా లేదా సూపర్ ఓవర్ అవసరం లేకుండానే ఈ మ్యాచ్ ముగిసేందుకు నాలుగు గంటల ఇరవై రెండు నిమిషాల సమయం పట్టింది. సాధారణంగా క్రికెట్ మ్యాచ్‌లు మూడు గంటల వ్యవధిలో ముగుస్తాయి. కానీ, ఈ మ్యాచ్ బాలీవుడ్ భారీ చిత్రాల నిడివిని కూడా మించిపోవడం గమనార్హం.

సినిమా నిడివిని మించిన క్రికెట్ వినోదం..

ఇటీవల విడుదలైన ప్రముఖ బాలీవుడ్ చిత్రం ‘ధురంధర్: ది రివెంజ్’ నిడివి మూడు గంటల యాభై నిమిషాలు కాగా, ఈ క్రికెట్ సమరం అంతకంటే ఎక్కువ సమయం పాటు ప్రేక్షకులను అలరించింది. రాత్రి ఏడున్నర గంటలకు ప్రారంభమైన ఈ మ్యాచ్, అర్ధరాత్రి దాటిన తర్వాత గానీ ముగియలేదు. మైదానంలో పరుగుల సునామీ కురవడంతో పాటు, వ్యూహాత్మక విరామాలు, బౌలర్లు సమయం తీసుకోవడం వల్ల ఈ రికార్డు నమోదైంది.

గత రికార్డులు..

గతంలో 2020లో ముంబై వర్సెస్ పంజాబ్ మధ్య జరిగిన మ్యాచ్ ఐదు గంటల పాటు సాగింది. అయితే అది రెండు సూపర్ ఓవర్ల కారణంగా అంత సమయం తీసుకుంది. అలాగే 2023 ఫైనల్ మ్యాచ్ వర్షం కారణంగా రిజర్వ్ డే వరకు వెళ్లడంతో ముప్పై గంటల సమయం పట్టింది. కానీ, ఎటువంటి బాహ్య ఆటంకాలు లేని సాధారణ ఇన్నింగ్స్‌లలో మాత్రం ప్రస్తుత ముంబై-బెంగళూరు మ్యాచ్ అగ్రస్థానంలో నిలిచింది.

పరుగుల జాతర: ఏం జరిగిందంటే?

ఈ మ్యాచ్‌లో తొలుత బ్యాటింగ్ చేసిన బెంగళూరు జట్టు నిర్ణీత ఓవర్లలో నాలుగు వికెట్ల నష్టానికి 240 పరుగులు చేసింది. సాల్ట్ మెరుపు ఇన్నింగ్స్ ఆడగా, విరాట్ కోహ్లీ, రజత్ పాటిదార్ అర్ధశతకాలతో చెలరేగారు. భారీ లక్ష్యంతో బరిలోకి దిగిన ముంబై ఇండియన్స్ కూడా గట్టిగానే పోరాడింది. రూథర్‌ఫోర్డ్ వీరోచితంగా ఆడినప్పటికీ, ముంబై జట్టు నిర్ణీత ఓవర్లలో 222 పరుగుల వద్దే ఆగిపోయింది. చివరికి బెంగళూరు జట్టు 18 పరుగుల తేడాతో విజయాన్ని అందుకుంది. క్రునాల్ పాండ్యా కట్టుదిట్టమైన బౌలింగ్ ముంబై విజయావకాశాలను దెబ్బతీసింది.