Jasprit Bumrah Injured: ప్రపంచకప్‌ ముందు టీమిండియాకు భారీ షాక్.. పేసర్ జస్ప్రీత్ బుమ్రా మెగా టోర్నీ నుంచి ఔట్.. అతని స్థానంలో ఇతనే..

Jasprit Bumrah

ప్రతిష్టాత్మక టీ20 ప్రపంచకప్‌ ముందు టీమిండియాకు భారీ షాక్ తగిలింది. భారత స్టార్ పేసర్ జస్ప్రీత్ బుమ్రా మెగా టోర్నీ నుంచి తప్పుకున్నాడు. తీవ్రమైన వెన్నునొప్పి కారణంగా టీ20 ప్రపంచకప్‌లో పేస్ దిగ్గజం బుమ్రా ఆడడం లేదు. దక్షిణాఫ్రికాతో టీ20 సిరీస్‌తో జస్ప్రీత్ బుమ్రా తిరిగి ఫామ్‌లోకి వస్తాడని అందరూ భావించారు. అయితే మరోసారి గాయం కారణంగా జట్టుకు దూరమయ్యాడు. ప్రాక్టీసు సెషన్‌లో వెన్ను నొప్పితో బాధపడిన బుమ్రా.. దక్షిణాఫ్రికాతో టీ20 సిరీస్‌లో ఆడడం లేదు. వెన్ను నొప్పికి ప్రస్తుతం సర్జరీ అవసరం లేకున్నా.. 4 నుంచి 6 నెలల విశ్రాంతి తప్పనిసరి అని డాక్టర్లు చెబుతున్నారు. ఫలితంగా త్వరలో ప్రారంభం కానున్న టీ20 ప్రపంచకప్‌ టోర్నీకి బుమ్రా దూరమైనట్టయ్యింది.

ఆసియా కప్‌లో భారత్‌ చావుదెబ్బ తింది. కనీసం ప్రపంచ కప్‌లోనైనా టీమిండియా రాణిస్తుందని ఫ్యాన్స్‌ ఎదురుచూస్తున్నారు. ఇలాంటి సమయంలో బుమ్రా లాంటి బౌలర్‌ దూరవమడం భారత్‌కు పెద్ద లోటే అని చెప్పవచ్చు.

ఆసియా కప్‌లో భారత బౌలింగ్‌ దళం తేలిపోయింది. బుమ్రా, జడేజా లాంటి బౌలర్లు లేని లోటు స్పష్టంగా కనిపించింది. కనీసం ప్రపంచ కప్‌ వరకైనా బుమ్రా అందుబాటులోకి వస్తాడని అందరూ భావించారు. కానీ బుమ్రా గాయం తిరగబెట్టడం జట్టుకు ఇబ్బందులు సృష్టిస్తోంది.

దక్షిణాఫ్రికాతో తొలి టీ20 ఆడలేక..

బుమ్రా తీవ్రమైన వెన్నునొప్పి సమస్యతో బాధపడుతున్నాడని, అతను కొన్ని నెలలపాటు జట్టుకు దూరంగా ఉండాల్సి ఉంటుందని భారత క్రికెట్ బోర్డు (బిసిసిఐ) అధికారి పిటిఐకి తెలిపింది. బిసిసిఐ అధికారి ఒకరు పిటిఐతో మాట్లాడుతూ.. “బుమ్రా టి 20 ప్రపంచ కప్‌లో ఆడలేడని ఖచ్చితంగా చెప్పవచ్చు. అతనికి తీవ్రమైన వెన్నునొప్పి ఉంది. ఆరు నెలల పాటు బయట ఉండాల్సి రావచ్చు.” బుమ్రా ఆస్ట్రేలియాతో రెండు T20 మ్యాచ్‌లు ఆడాడు కానీ దక్షిణాఫ్రికాతో సిరీస్‌లో మొదటి మ్యాచ్ ఆడేందుకు తిరువనంతపురం వెళ్లలేదు.

మహ్మద్ షమీ సహా రేసులో ముగ్గురు ఆటగాళ్లు..

జస్ప్రీత్ బుమ్రా స్థానంలో ఎవరిని తీసుకోవాలనే ప్రశ్నపై సెలక్టర్లు అయోమయంలో పడ్డారు. బుమ్రా చాలా కాలంగా వెన్నునొప్పితో పోరాడుతున్నాడు. అయితే అతను ప్రపంచ కప్ సమయంలో ఇలా జరుగుతుదని ఎవరూ ఊహించలేక పోయారు. అయితే ఒక్కసారిగా ఇలా జరగడంతో అంతా ఆలోచనల్లో పడిపోయారు. జస్ప్రీత్ బుమ్రా స్థానం కోసం ముగ్గురు పోటీ పడుతున్నారు. ఇందులో మొదటి స్థానం షమీకి దక్కే అవకాశం ఉంది.