Deepak Chahar: చెన్నై సూపర్‌ కింగ్స్ అభిమానులకు శుభవార్త.. జట్టులో చేరనున్న దీపక్ చాహర్..
చెన్నై సూపర్‌ కింగ్స్(CSK) అభిమానులకు శుభవార్త అందింది. ఆ జట్టు కీలక బౌలర్‌ దీపక్ చాహర్(Deepak Chahar) బరిలో దిగేందుకు సిద్ధమయ్యాడు...
Updated on: Apr 03, 2022 | 11:18 AM
చెన్నై సూపర్‌ కింగ్స్(CSK) అభిమానులకు శుభవార్త అందింది. ఆ జట్టు కీలక బౌలర్‌ దీపక్ చాహర్(Deepak Chahar) బరిలో దిగేందుకు సిద్ధమయ్యాడు. వేలంలో రూ.14 కోట్లు పెట్టి చాహర్‌ను తిరిగి దక్కించుకున్న చెన్నై అతడి సేవల కోసం ఎదురు చూస్తోంది. ఐపీఎల్ 2022(IPL) సీఎస్కే ఆడిన తొలి రెండు మ్యాచ్‌ల్లోనూ ఓడిపోయింది. ఆదివారం పంజాబ్‌తో జరిగే మూడో మ్యాచ్‌లో ఎలాగైనా గెలవాలనే పట్టుదలతో ఉంది. ఈ నేపథ్యంలో చాహర్ నెట్‌ ప్రాక్టీస్‌ మొదలుపెట్టడం ఆ జట్టుకు సంతోషాన్నిచ్చే విషయం. డెత్‌ ఓవర్లలో చాహర్ లాంటి పేసర్‌ లేని లోటు తొలి రెండు మ్యాచ్‌ల్లో చెన్నైకు చాలా స్పష్టంగా తెలిసొచ్చింది. గత సీజన్లో చెన్నై విజేతగా నిలవడంతో కీలకపాత్ర పోషించాడు.
ఐపీఎల్ చరిత్రలో అత్యంత విజయవంతమైన జట్లలో చెన్నై జట్టు ఒకటి. మహేంద్ర సింగ్ ధోనీ సారథ్యంలో ఈ జట్టు నాలుగు టైటిళ్లను కైవసం చేసుకుంది. కానీ ఈ సీజన్ ప్రారంభానికి రెండు రోజుల ముందు ధోనీ కెప్టెన్సీ నుంచి తప్పుకుని రవీంద్ర జడేజాకు కమాండ్ అప్పగించాడు. జట్టు వారసత్వాన్ని నిలబెట్టుకోవడం జడేజాకు సవాల్‌గా మారింది. గత 15 సీజన్లలో ఇరు జట్ల మధ్య 26 మ్యాచ్‌లు జరిగాయి. ఈ 26 మ్యాచ్‌ల్లో చెన్నై 16 మ్యాచ్‌ల్లో విజయం సాధించింది. మరోవైపు పంజాబ్ కింగ్స్ 10 విజయాలను సొంతం చేసుకుంది. గత సీజన్లో ఇరు జట్లు రెండుసార్లు తలపడ్డాయి. ఏప్రిల్ 16న జరిగిన తొలి మ్యాచ్‌లో చెన్నై విజయం సాధించింది. రెండో మ్యాచ్‌లో పంజాబ్ కింగ్స్ విజయం సాధించింది.
