IND vs NZ: వన్డే సిరీస్‌కు ముందే బిగ్ షాక్.. సిరీస్ మొత్తానికి దూరమైన ఇద్దరు స్టార్ ప్లేయర్స్..!

Ind Vs Nz Odi Series Players Fitness

IND vs NZ ODI Series: భారత్, న్యూజిలాండ్ మధ్య ఐదు మ్యాచ్‌ల టీ20 సిరీస్ ముగిసినా ఈ రెండు జట్ల మధ్య పోరు ఇంకా మిగిలే ఉంది. ఇరు జట్లు ఇప్పుడు ఐదు వన్డేల సిరీస్‌లో తలపడనున్నాయి. టీ20 సిరీస్‌లో తొలి మూడు మ్యాచ్‌లు గెలిచిన టీమిండియా 3-2తో ట్రోఫీని అందుకుంది. ఇప్పుడు శుభ్‌మన్ గిల్ (Shubman Gill) సారథ్యంలోని జట్టు వన్డేల్లోనూ విజయ పతాకం ఎగురవేయాలని చూస్తోంది.

వన్డే సిరీస్ నవంబర్ 4న ఆక్లాండ్‌లోని ఈడెన్ పార్క్‌లో మొదలుకానుంది. కానీ దీనికి ముందే కివీస్ శిబిరం నుంచి చేదు వార్త బయటకు వచ్చింది.

చాప్‌మన్, రచిన్ ఔట్..

సిరీస్ నుంచి తప్పుకున్న ఆ ఇద్దరు ఆటగాళ్లు మార్క్ చాప్‌మన్ (Mark Chapman), రచిన్ రవీంద్ర (Rachin Ravindra). గాయాల కారణంగా ఈ ఇద్దరూ టీమిండియాతో టీ20 సిరీస్‌లో ఆడలేదు. అయినా వన్డే స్క్వాడ్‌లో చోటు దక్కింది. సిరీస్ మొదలయ్యేలోపు కోలుకుంటారని అంతా భావించారు. కానీ ఇప్పుడు ఇద్దరూ సిరీస్‌కు దూరమైనట్లు ధ్రువీకరణ వచ్చేసింది.

న్యూజిలాండ్ అక్టోబర్ 11న తమ వన్డే స్క్వాడ్‌ను ప్రకటించింది. అందులో చాప్‌మన్‌ను మొత్తం సిరీస్‌కు ఎంపిక చేసింది. రచిన్‌ను మాత్రం టెస్టు సిరీస్ సన్నాహకాలను దృష్టిలో ఉంచుకుని తొలి మూడు మ్యాచ్‌లకే తీసుకుంది. కానీ ఇప్పుడు ఈ ఇద్దరూ ఒక్క మ్యాచ్ కూడా ఆడరు.

గాయాల వివరాలు..

యూరోపియన్ టీ20 ప్రీమియర్ లీగ్ సమయంలో చాప్‌మన్ ఎడమ హ్యామ్‌స్ట్రింగ్‌కు గాయమైంది. అతడు పూర్తిగా కోలుకోవడానికి కనీసం మరో రెండు వారాలు పడుతుంది. మరోవైపు, ఓ ప్రమోషనల్ షూట్ సమయంలో రచిన్ కుడి భుజం జాయింట్ పక్కకు తొలగింది. అతడికి కూడా రికవరీ కోసం ఇంకా సమయం కావాలి.

కోచ్ నిరాశ..

ఈ ఇద్దరూ దూరం కావడంపై న్యూజిలాండ్ హెడ్ కోచ్ రాబ్ వాల్టర్ (Rob Walter) నిరాశ వ్యక్తం చేశాడు. జట్టుకు మార్క్, రచిన్ ఎంత కీలకమో అందరికీ తెలుసని, వారు ఈ సిరీస్‌లో ఆడలేకపోవడం దురదృష్టకరమని అన్నాడు. గత వారం చాప్‌మన్‌తో మాట్లాడానని, అతడు నిరాశగా ఉన్నా తిరిగి మైదానంలోకి రావడానికి కష్టపడుతున్నాడని చెప్పాడు.

రచిన్ విషయానికొస్తే, వైట్ బాల్ క్రికెట్‌లో ఫీల్డింగ్ చేసేంతగా అతడి భుజం ఇంకా కోలుకోలేదని వాల్టర్ తెలిపాడు. ఈ నెలాఖరులో టెస్టు సిరీస్ కూడా ఉండటంతో అనవసరంగా రిస్క్ తీసుకోవాలనుకోవడం లేదని స్పష్టం చేశాడు.