Hadik Pandya: నాలో ఆటగాడిని నిద్ర లేపింది ఆమే.. హార్దిక్ పాండ్యా ఆసక్తికర వ్యాఖ్యలు..

భారత సూపర్‌స్టార్ ఆల్‌రౌండర్ హార్దిక్ పాండ్యా తన బ్యాటింగ్‌లో ఇంకా పూర్తి స్థాయిలో తన సామర్థ్యాన్ని చూపించలేకపోయానని ఓ ఇంటర్వ్యూలో స్వయంగా అంగీకరించాడు. గత ఐపీఎల్ 2025 తర్వాత తనకు ఆటపై ఆసక్తి కొంత తగ్గినట్టుగా అనిపించిందని, బ్యాటింగ్‌లో తన పూర్తి సామర్థ్యాన్ని వినియోగించుకోవడం జరగలేదని చెప్పుకొచ్చాడు. ఈ సమయంలో మహికా శర్మతో జరిగిన సంభాషణలు తనకు మానసికంగా ఎంతో సహాయం చేశాయని వెల్లడించడం గమనార్హం.

హార్దిక్ మాట్లాడుతూ, ఇప్పటివరకు తాను బ్యాటింగ్‌లో కేవలం 40 శాతం మాత్రమే తన సామర్థ్యాన్ని ఉపయోగించుకున్నానని తెలిపాడు. ఐపీఎల్ 2025 తర్వాత తన ఆటపై సీరియస్‌గా పని చేసినట్లు పేర్కొన్నాడు. బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో రోజుకు 6 నుంచి 7 గంటల పాటు బ్యాటింగ్ ప్రాక్టీస్ చేశానని తెలిపాడు. తన గర్ల్‌ఫ్రెండ్ మహికా శర్మ వల్లే మళ్లీ క్రికెట్‌పై ప్రేమ, ఆసక్తి పెరిగిందని చెప్పుకొచ్చాడు.

హార్దిక్ పాండ్యా జియోహాట్‌స్టార్‌తో మాట్లాడుతూ, గత ఐపీఎల్ సమయంలో తాను ఉత్సాహం కోల్పోయినట్టు అనిపించిందని తెలిపాడు. “నాలోని చిన్నపిల్లాడు, క్రికెట్ పిచ్చోడు బౌలింగ్‌పై ఎక్కువగా దృష్టి పెట్టాడు. నాకు ఎప్పటినుంచో బౌలింగ్‌పై నమ్మకం ఉంది. కానీ బ్యాటింగ్ నా హృదయానికి దగ్గర ఉంటుంది. గత ఐపీఎల్ తర్వాత నాకు అర్థమైంది.. హార్దిక్ పాండ్యాగా నా పూర్తి సామర్థ్యంతో ఆడాలి. నిజంగా చెప్పాలంటే, ఇప్పటివరకు బ్యాటింగ్‌లో నా సామర్థ్యంలో 40 శాతం కూడా బయటపడలేదు. నేను కలలు కనేది, ప్రాక్టీస్ చేసేది నా ప్రదర్శనలో పూర్తిగా కనిపించలేదు” అని అన్నాడు.

మహికా శర్మ ఎలా సహాయం చేసింది?

హార్దిక్ తెలిపిన ప్రకారం, మహికా శర్మ తన జీవితంలోకి వచ్చిన తర్వాత ఆటపై మళ్లీ ఆసక్తి పెరిగింది. “పూర్తి సామర్థ్యంతో ఎలా ఆడాలో తెలుసుకోవడానికి కొంత సమయం తీసుకున్నాను. ఆ సమయంలో మహికా నా జీవితంలోకి వచ్చింది. ఆట గురించి, నాలోని చిన్నపిల్లాడిని తిరిగి బయటకు తీసుకురావడం గురించి మేం మాట్లాడుకున్నాం. ఆమె వల్లే క్రికెట్‌పై నా ఆకాంక్ష మళ్లీ వచ్చింది. నేను వెనక తెర వెనుక కష్టపడి పనిచేశాను. బ్యాటింగ్‌కు దీర్ఘకాలిక సెషన్లు పెట్టుకున్నాను. కొన్ని రోజులు ఆరు నుంచి ఏడు గంటల వరకు మైదానంలోనే ఉండేవాడిని. ఎన్‌సీఏ (NCA)కి వెళ్లినప్పుడు మధ్యాహ్నం 3:30కి బ్యాటింగ్ మొదలుపెట్టి, రాత్రి 12:30కి తిరిగి వచ్చేవాడిని. సాధారణంగా లైట్లు ఆఫ్ చేసి మైదానం వదిలే చివరి వ్యక్తి నేనే” అని వివరించాడు.

2025, 2026లో హార్దిక్ బ్యాటింగ్‌లో స్పష్టమైన మెరుగుదల కనిపించింది.

హార్దిక్ బ్యాటింగ్‌లో వచ్చిన మార్పు గణాంకాల్లో స్పష్టంగా కనిపిస్తోంది.

2025లో: 15 టీ20 అంతర్జాతీయ మ్యాచ్‌ల్లో 153.29 స్ట్రైక్ రేట్‌తో 302 పరుగులు చేశాడు.

2026లో: ఇప్పటివరకు 173 స్ట్రైక్ రేట్‌తో 126 పరుగులు చేశాడు.

ఈ రెండు సంవత్సరాల్లో అతని ఖాతాలో నాలుగు అర్ధశతకాలు చేరాయి. అంతకుముందు రెండు సంవత్సరాల్లో అతను టీ20 అంతర్జాతీయాల్లో కేవలం ఒక్క అర్ధశతకం మాత్రమే సాధించాడు.

భారత ఆల్‌రౌండర్ మాట్లాడుతూ, తన బ్యాటింగ్ టెక్నిక్, స్వింగ్‌లో మార్పులు చేశానని చెప్పాడు. “ఒక దశలో బ్యాటింగ్ ఎలా చేయాలో మరిచిపోయినట్టు అనిపించింది. కానీ లోపల మాత్రం సరైన దిశలోనే ముందుకు వెళ్తున్నాననే నమ్మకం ఉండేది” అని హార్దిక్ వెల్లడించాడు.