13 ఏళ్ల కెరీర్.. 136 పరుగులు, 38 సార్లు జీరోకే ఔట్.. కట్చేస్తే.. కిరాణా షాప్ యజమానిగా మారిన క్రికెటర్
ప్రస్తుతం క్రికెటర్లు ఆట నుంచి రిటైర్ అయిన తర్వాత వ్యాఖ్యానం లేదా కోచింగ్ పాత్రల్లో కనిపిస్తుంటారు. అయితే, న్యూజిలాండ్ మాజీ క్రికెటర్ ఇప్పుడు కిరాణా దుకాణం నడుపుతున్నాడు. ఈ ఆటగాడి అంతర్జాతీయ కెరీర్ 13 సంవత్సరాలు. ఈ సమయంలో, అతను 250 కంటే ఎక్కువ వికెట్లు తీసుకున్నాడు. కానీ, బ్యాట్స్మెన్గా అతను 136 పరుగులు మాత్రమే చేశాడు.
Chris Martin Birthday: న్యూజిలాండ్ మాజీ బౌలర్ క్రిస్ మార్టిన్ ఈరోజు తన 50వ పుట్టినరోజు సెలబ్రేట్ చేసుకుంటున్నాడు. అతను కాంటర్బరీలోని క్రైస్ట్చర్చ్లో 10 డిసెంబర్ 1974న జన్మించాడు. న్యూజిలాండ్ క్రికెట్ చరిత్రలో అత్యంత విజయవంతమైన బౌలర్లలో క్రిస్ మార్టిన్ ఒకడిగా పేరుగాంచాడు. అతను లైన్, లెంగ్త్లో బౌలింగ్ చేయగల సామర్థ్యానికి ప్రసిద్ధి చెందాడు. దీంతో దిగ్గజ బ్యాట్స్మెన్లకు చుక్కలు చూపించేవాడు. కానీ, అభిమానులకు క్రిస్ మార్టిన్ బ్యాటింగ్ గురించి కూడా తెలుసు. అందులో అతని రికార్డు చాలా చెడ్డది. క్రిస్ మార్టిన్ తన అంతర్జాతీయ కెరీర్లో అతను చేసిన పరుగుల కంటే ఎక్కువ వికెట్లు తీశాడు. ఇది మరే ఇతర ఆటగాడు చేయలేదు.
క్రిస్ మార్టిన్ పరుగుల కంటే ఎక్కువ వికెట్లు..
క్రిస్ మార్టిన్ అంతర్జాతీయ కెరీర్ 2002 సంవత్సరంలో ప్రారంభమైంది. అతను 2013 సంవత్సరంలో న్యూజిలాండ్ తరపున తన చివరి మ్యాచ్ ఆడాడు. ఈ సమయంలో, క్రిస్ మార్టిన్ న్యూజిలాండ్ తరపున 71 టెస్టులు, 20 వన్డేలు, 6 టీ20 మ్యాచ్లు ఆడాడు. మార్టిన్ టెస్ట్ కెరీర్ చాలా విజయవంతమైంది. అతను 33.81 సగటుతో మొత్తం 233 వికెట్లు తీశాడు. అదే సమయంలో వన్డేల్లో అతను 5.08 ఎకానమీ, 44.66 సగటుతో 18 వికెట్లు తీశాడు. ఇది కాకుండా టీ20లో అతని పేరిట 7 వికెట్లు ఉన్నాయి.
మరోవైపు, అతని బ్యాటింగ్ రికార్డు గురించి మాట్లాడితే, ఇది ఇతర ఆటగాళ్ల కంటే చాలా ఘోరంగా ఉంది. తన 13 ఏళ్ల కెరీర్లో 136 పరుగులు మాత్రమే చేశాడు. అతను టెస్టులో 104 ఇన్నింగ్స్లలో 2.36 సగటుతో 123 పరుగులు మాత్రమే చేశాడు, అందులో 12 నాటౌట్ అతని అత్యుత్తమ స్కోరుగా నిలిచింది. ఇది కాకుండా వన్డేల్లో 8, టీ20లో 5 పరుగులు మాత్రమే చేశాడు. ఇది కాకుండా, అతను తన కెరీర్లో 38 సార్లు ఖాతా తెరవకుండానే ఔట్ అయ్యాడు. వీటిలో, అతను 36 సార్లు టెస్ట్లలో 0 వద్ద అవుట్ అయ్యాడు. ఈ సంఘటన వన్డేల్లో రెండుసార్లు జరిగింది. టెస్ట్ల్లో అతను 7 సందర్భాలలో రెండు ఇన్నింగ్స్లలో సున్నాకి ఔట్ అయ్యాడు.
కిరాణా దుకాణం నడుపుతున్న క్రిస్ మార్టిన్..
ఒక క్రికెటర్ ఆట నుంచి రిటైర్మెంట్ తీసుకున్న తర్వాత ఆటతో సంబంధం లేని వృత్తిని ఎంచుకోవడం చాలా అరుదుగా చూస్తుంటాం. ప్రస్తుతం న్యూజిలాండ్లోని ఈస్ట్బోర్న్లో సూపర్ మార్కెట్ను నడుపుతున్నందున, ఇప్పుడు క్రికెట్కు దూరంగా ఉన్న కొద్దిమంది ఆటగాళ్ళలో క్రిస్ మార్టిన్ ఒకరు. ది ఫోర్ స్క్వేర్ అని పిలిచే న్యూజిలాండ్ రిటైల్ చైన్ ఫుడ్స్టఫ్స్ కమ్యూనిటీ కిరాణా దుకాణం నడుపుతున్నాడు. మార్టిన్ తన పనిని మినీ స్టోర్తో ప్రారంభించాడు. అయితే, 2019 ప్రారంభంలో అతను పెద్ద దుకాణాన్ని ప్రారంభించాడు.
మరిన్ని క్రీడా వార్తల కోసం ఇక్కడ క్లిక్ చేయండి..