World Record: టీ20ల్లో వరల్డ్ రికార్డు.. కేవలం 15 బంతుల్లో మ్యాచ్ పూర్తి.. ఇంతకీ టార్గెట్ ఎంతంటే?

అంతర్జాతీయ క్రికెట్‌లో ఎన్నో ఆశ్చర్యకరమైన మ్యాచ్‌లు తరుచుగా జరుగుతుంటాయి. ఎప్పుడు.? ఏది జరుగుతుందో అస్సలు ఊహించలేం. ఆదివారం కూడా అలాంటి మ్యాచ్ ఒకటి జరిగింది. సాధారణంగా టీ20 క్రికెట్ అంటే బ్యాటర్ల హవా కొనసాగుతుంది. బౌలర్లను ప్రేక్షకులుగా చేసి.. ఫోర్లు, సిక్సర్లు వీరబాదుడు బాదతారు. అలాంటిది కొంచెం సీన్ రివర్స్ చేస్తే.. బ్యాటర్లు ప్రేక్షపాత్ర పోషించి.. బౌలర్లు తమ ప్రతాపాన్ని చూపిస్తే రికార్డులు ఖాయం. అలాంటి ఓ మ్యాచ్ ఇది. ఇందులో టార్గెట్ కేవలం 15 బంతుల్లోనే చేధించింది ఓ జట్టు. అది కూడా వికెట్ నష్టపోకుండా చేజ్ చేసి గెలిచింది.

ఐసీసీ పురుషుల టీ20 ప్రపంచ కప్ సబ్-రీజినల్ ఆఫ్రికా క్వాలిఫయర్‌లో కెన్యా 10 వికెట్ల తేడాతో మాలి జట్టును ఓడించింది. ఈ మ్యాచ్‌లో కెన్యా అద్భుత విజయాన్ని అందించడమే కాదు.. ప్రపంచ రికార్డును కూడా బద్దలు కొట్టింది. నిజానికి టీ20 ఇంటర్నేషనల్‌లో బంతుల పరంగా కెన్యాకి ఇది అతిపెద్ద విజయం. మాలి ఇచ్చిన లక్ష్యాన్ని కెన్యా కేవలం 15 బంతుల్లోనే సాధించింది.

తొలుత బ్యాటింగ్ చేసిన మాలి జట్టు కేవలం 30 పరుగులకే ఆలౌటైంది. ఆ జట్టులో ఆరుగురి బ్యాటర్లు తమ ఖాతా కూడా తెరవలేదు. కేవలం ఒక్కడు మాత్రం రెండంకెల స్కోర్ చేయగలిగాడు. దీంతో ఆ జట్టు 64 బంతులకే కుప్పకూలింది. మాలి జట్టు నిర్దేశించిన ఆ స్వల్ప లక్ష్యాన్ని కెన్యా కేవలం 15 బంతుల్లోనే చేదించి టీ20ల్లో అతిపెద్ద విజయాన్ని అందుకుంది. ఓపెనర్ కాలిన్స్ ఒబుయా 6 బంతుల్లో 18 పరుగులు చేసి అజేయంగా నిలిచాడు. అటు మరో ఓపెనర్ పుష్కర్ శర్మ 14 పరుగులు చేశాడు. ఇక మాలి జట్టును బెంబేలెత్తించిన కెన్యా బౌలర్ పీటర్ లాంగట్ 17 పరుగులిచ్చి ఏకంగా 6 వికెట్లు తీశాడు. కాగా, ఈ విజయంతో కెన్యా ప్రపంచ రికార్డు సృష్టించింది. అంతకుముందు టర్కీని 104 బంతుల్లోనే ఓడించిన ఆస్ట్రియా అతి తక్కువ బంతుల్లో గెలిచిన రికార్డు సొంతం చేసుకోగా.. ఇప్పుడు ఆ రికార్డును కెన్యా బ్రేక్ చేసింది.