Asia Cup 2027 : క్రికెట్ ఫ్యాన్స్కు అదిరిపోయే అప్డేట్.. వచ్చే ఏడాది ఆసియా కప్ 2027 తేదీలు ఖరారు
Asia Cup 2027 : ఆసియా కప్ 2027 షెడ్యూల్కు సంబంధించిన కీలక సమాచారం వెలుగులోకి వచ్చింది. జూన్ 18 నుంచి జూలై 4 వరకు బంగ్లాదేశ్ వేదికగా వన్డే ఫార్మాట్లో టోర్నీ జరగనుండగా, వేదికలపై త్వరలో ఏసీసీ తుది నిర్ణయం తీసుకోనుంది.
Asia Cup 2027 : క్రికెట్ ప్రపంచంలో అత్యంత ప్రతిష్టాత్మకమైన టోర్నమెంట్లలో ఒకటైన ఆసియా కప్ 2027 షెడ్యూల్కు సంబంధించిన కీలక సమాచారం బయటకు వచ్చింది. ఈసారి ఈ మెగా టోర్నీకి పొరుగు దేశం బంగ్లాదేశ్ ఆతిథ్యం ఇవ్వబోతోంది. ప్రముఖ అంతర్జాతీయ క్రీడా వెబ్సైట్ క్రిక్బజ్ కథనం ప్రకారం.. వచ్చే ఏడాది జూన్ 18వ తేదీ నుంచి ఈ టోర్నమెంట్ ఘనంగా ప్రారంభం కానుంది. దాదాపు రెండు వారాల పాటు సాగే ఈ క్రికెట్ పండుగ జూలై 4వ తేదీన జరిగే గ్రాండ్ ఫైనల్తో ముగుస్తుంది. టోర్నీకి సంబంధించిన వేదికలపై రాబోయే కొన్ని రోజుల్లోనే ఆసియా క్రికెట్ కౌన్సిల్ (ACC) తుది నిర్ణయం తీసుకోనుందని సమాచారం.
ఈసారి వన్డే ఫార్మాట్లో ఆసియా కప్
గతంలో జరిగిన ఆసియా కప్ (2025లో సెప్టెంబర్ నెలలో జరిగింది) టీ20 ఫార్మాట్లో నిర్వహించబడిన సంగతి తెలిసిందే. అయితే, ఈసారి మాత్రం ఈ టోర్నమెంట్ వన్డే (50 ఓవర్ల) ఫార్మాట్లో జరగనుంది. వచ్చే ఏడాది (2027) ఐసీసీ వన్డే క్రికెట్ వరల్డ్ కప్ కూడా జరగనుండటంతో, దానికి ముందు ఆసియా జట్లకు ఇదొక అద్భుతమైన రిహార్సల్గా ఉపయోగపడుతుందని ఏసీసీ భావిస్తోంది. బంగ్లాదేశ్లోని ప్రముఖ మైదానాలైన మీర్పూర్, చిట్టగాంగ్, సిల్హెట్ అనే మూడు వేదికల్లో ఈ టోర్నీ మ్యాచ్లన్నీ నిర్వహించనున్నారు. దీనికి సంబంధించి ఆసియా క్రికెట్ కౌన్సిల్ ఇప్పటికే బంగ్లాదేశ్ క్రికెట్ బోర్డు నుంచి అవసరమైన సమాచారాన్ని కోరింది.
తమీమ్ ఇక్బాల్ అధ్యక్షతన తొలి మెగా ఈవెంట్
బంగ్లాదేశ్ చివరిసారిగా 2016వ సంవత్సరంలో ఆసియా కప్కు ఆతిథ్యం ఇచ్చింది. ఆ ఏడాది బంగ్లాదేశ్ జట్టు అద్భుతంగా రాణించి ఫైనల్స్ వరకు దూసుకెళ్లింది. కానీ, హోరాహోరీగా జరిగిన ఫైనల్ మ్యాచ్లో భారత జట్టు చేతిలో 8 వికెట్ల తేడాతో పరాజయం పాలై రన్నరప్గా నిలిచింది. ఆ తర్వాత మళ్లీ 11 సంవత్సరాల సుదీర్ఘ విరామం తర్వాత బంగ్లాదేశ్కు ఈ మెగా టోర్నీని నిర్వహించే అవకాశం దక్కింది. బంగ్లాదేశ్ మాజీ స్టార్ క్రికెటర్ తమీమ్ ఇక్బాల్ కొద్దిరోజుల క్రితమే బంగ్లాదేశ్ క్రికెట్ బోర్డు (BCB) నూతన అధ్యక్షుడిగా బాధ్యతలు చేపట్టారు. ఆయన నాయకత్వంలో బంగ్లాదేశ్ హోస్ట్ చేయబోతున్న మొట్టమొదటి అతిపెద్ద అంతర్జాతీయ టోర్నమెంట్ ఇదే కావడం విశేషం.
టీమిండియా పర్యటనపై బంగ్లాదేశ్ కొత్త ప్రకటన
ఆసియా కప్ ముచ్చట్లతో పాటు, భారత క్రికెట్ జట్టు బంగ్లాదేశ్ పర్యటనపై కూడా ఒక ఆసక్తికరమైన అప్డేట్ వచ్చింది. బంగ్లాదేశ్ హోం మంత్రి సలాహుద్దీన్ అహ్మద్ కుమారుడు ఇబ్రహీం ఈ పర్యటన గురించి కీలక విషయాలు వెల్లడించారు. బంగ్లాదేశ్కు వచ్చే అంతర్జాతీయ జట్లకు, ముఖ్యంగా టీమిండియాకు అత్యున్నత స్థాయి భద్రతను కల్పిస్తామని ఆయన హామీ ఇచ్చారు. అవసరమైతే భద్రతా సిబ్బందిని మరికొంత మందిని పెంచుతామని స్పష్టం చేశారు. అయితే, బీసీసీఐతో బంగ్లాదేశ్ బోర్డు జరపాల్సిన ద్వైపాక్షిక సిరీస్ చర్చలపై మాత్రం ఇప్పటివరకు ఎలాంటి సానుకూల ఫలితాలు రాలేదని, ఇంకా చర్చలు సాగుతూనే ఉన్నాయని ఆయన స్పష్టం చేశారు.
మరిన్ని క్రీడా వార్తల కోసం ఇక్కడ క్లిక్ చేయండి..