పవన్ వ్యాఖ్యలకు ఆలీ గట్టి కౌంటర్

జనసేన అధినేత పవన్ కల్యాణ్ తనపై చేసిన వ్యాఖ్యలపై కమెడియన్, వైసీపీ నేత ఆలీ గట్టి కౌంటర్ ఇచ్చారు. ఏ విధంగా తనకు సాయం చేశారో చెప్పగలరా..? అంటూ ఆలీ, పవన్‌ను ప్రశ్నించారు. పవన్ మాటలు తనను చాలా బాధించాయని ఆలీ అన్నారు. తన బాటను తానే వేసుకుని రాజకీయాల్లోకి వచ్చానని.. పవన్‌కు చిరంజీవి ఉన్నారని, కానీ తనకు ఎవరూ లేరని చెప్పుకొచ్చారు. పవన్ స్థానం ఎప్పుడూ తన గుండెల్లోనే ఉంటుందని గతంలోనే చెప్పానన్న ఆలీ.. ఇన్ని రోజుల తన ప్రచారంలో ఎక్కడా పవన్ గురించి పల్లెత్తు మాట కూడా అనలేదని అన్నారు.

పవన్ ఇండస్ట్రీలోకి రాకముందు నుంచే తాను మంచి పొజిషన్‌లో ఉన్నానని అలీ గుర్తు చేశారు. తానెవరినీ చేయి చాచి అడగలేదని, ఎవరినీ రూపాయి కూడా అడగలేదని పేర్కొన్నారు. వైసీపీలోకి వెళ్లడంలో ఉన్న తప్పేంటని ఈ సందర్భంగా ఆలీ ప్రశ్నించారు. అదేమైనా నేరమా..? లేక రాజ్యాంగంలో రాసుందా..? అంటూ నిలదీశారు. తన చుట్టానికి టికెట్ ఇచ్చానని పవన్ అన్నారని, అతనికి టికెట్ ఇవ్వాలని తానేమైనా అడిగానా అంటూ ప్రశ్నించారు. పోని ఇచ్చేముందు నన్నేమైనా అడిగారా అంటూ అలీ అడిగారు. తననెప్పుడూ పార్టీలోకి రమ్మని పవన్ అడగలేదని ఆలీ వివరించారు.