అబద్ధం చెప్పేవారిని ఈజీగా ఇలా కనిపెట్టండి.. మీరు అవాక్కయ్యే ట్రిక్స్ ఇవే..
నేను ఎప్పుడూ అబద్ధం చెప్పను అని అనేవారు మనకు నిత్యం కనిపిస్తుంటారు. కానీ మానవ నైజం ప్రకారం.. ఏదో ఒక సందర్భంలో ప్రతి ఒక్కరూ చిన్నదో పెద్దదో అబద్ధం చెప్పక తప్పదు. అయితే మనం అబద్ధం చెప్పినప్పుడు మనకు తెలియకుండానే మన శరీరంలో కొన్ని భౌతిక, మానసిక మార్పులు జరుగుతాయని పరిశోధనలు చెబుతున్నాయి. అబద్ధాన్ని పసిగట్టే ఆ ఆసక్తికరమైన సంకేతాలు ఏమిటో ఇప్పుడు చూద్దాం.
మెదడుపై పెరిగే ఒత్తిడి: మనం నిజం చెప్పినప్పుడు మెదడు పెద్దగా కష్టపడాల్సిన అవసరం ఉండదు. కానీ అబద్ధం చెప్పాల్సి వచ్చినప్పుడు, నిజాన్ని దాచిపెట్టి కొత్త కథను అల్లడానికి మెదడు సాధారణం కంటే వేగంగా పనిచేయాల్సి ఉంటుంది. ఈ క్రమంలో మెదడుపై ఒత్తిడి పెరిగి, రక్త ప్రసరణ వేగవంతమవుతుంది. దీనివల్ల శరీరంలోని కొన్ని భాగాలలో స్వల్పంగా వేడి పెరిగినట్లు అనిపిస్తుంది.
ముఖ కవళికల్లో మార్పులు: అబద్ధం చెప్పే వ్యక్తి ఎంత ఆత్మవిశ్వాసంతో నటించినా, వారి ముఖంలో ఒక రకమైన అశాంతి కనిపిస్తుంది. లోపల ఉండే భయం లేదా అసౌకర్యం వల్ల వారి ముఖ కవళికలు సహజత్వాన్ని కోల్పోతాయి. నిశితంగా గమనిస్తే, వారి మాటలకు ముఖంలోని హావభావాలకు పొంతన ఉండదు.
కళ్ల కదలికలు:సాధారణంగా అబద్ధం చెప్పేవారు ఎదుటి వ్యక్తి కళ్లలోకి నేరుగా చూడటానికి ఇబ్బంది పడతారు. మాట్లాడేటప్పుడు వారి కళ్లు అటూ ఇటూ కదులుతూ ఉంటాయి. చూపు తిప్పుకోవడం లేదా అకస్మాత్తుగా కళ్లు ఎక్కువగా రెప్పవేయడం వంటివి అబద్ధానికి సంకేతాలుగా భావిస్తారు.
బాడీ లాంగ్వేజ్ ప్రభావం: అబద్ధం చెప్పేటప్పుడు శరీర భాషలో స్పష్టమైన మార్పులు వస్తాయి. కొందరు పదే పదే ముక్కును తాకడం లేదా గోకడం చేస్తుంటారు. దీనినే శాస్త్రీయ పరిభాషలో పినోచియో ఎఫెక్ట్ అని కూడా అంటుంటారు. అలాగే చేతులు కట్టుకోవడం లేదా అనవసరమైన చేష్టలు చేయడం ద్వారా వారు తమ ఆందోళనను బయటపెట్టేస్తుంటారు.
మాట తీరులో తడబాటు: ఏమి చెప్పాలో ఆలోచించే క్రమంలో అబద్ధం చెప్పే వ్యక్తి మాటల్లో తడబాటు కనిపిస్తుంది. కొందరు చాలా నెమ్మదిగా పదాలను వెతుక్కుంటూ మాట్లాడుతుంటే, మరికొందరు ఆందోళనలో చాలా వేగంగా మాట్లాడి ఆ విషయాన్ని ముగించాలని చూస్తారు.