“జో ఖేలేగా వో ఖిలేగా”.. కామన్వెల్త్ విజేతలతో ప్రధాని మోదీ సందడి.. 2030 శతాబ్ది గేమ్స్కు భారత్ గ్రాండ్ వెల్కమ్!
PM Narendra Modi, CWG 2026 Medallists: గ్లాస్గోలో సాధించిన ఈ విజయం భారత క్రీడారంగంలో ఒక నూతన శకానికి నాంది పలికింది. ప్రధాని మోదీ అందించిన ప్రోత్సాహం రాబోయే ఆసియా క్రీడలు, ఒలింపిక్స్లో మన అథ్లెట్లు మరింతగా రాణించేందుకు గొప్ప స్ఫూర్తిని ఇస్తుంది. 2030లో స్వదేశంలో జరగబోయే శతాబ్ది క్రీడల నాటికి భారత్ ప్రపంచ క్రీడా సూపర్ పవర్గా నిలవడం ఖాయంగా కనిపిస్తోంది.
PM Narendra Modi, CWG 2026 Medallists: స్కాట్లాండ్లోని గ్లాస్గో నగరంలో ముగిసిన కామన్వెల్త్ క్రీడల్లో భారత అథ్లెట్లు అద్భుతమైన ప్రతిభను ప్రదర్శించారు. గత ఎడిషన్లతో పోలిస్తే ఈసారి కొన్ని క్రీడా విభాగాలను తొలగించినప్పటికీ, మన క్రీడాకారులు లభించిన అవకాశాలను రెండు చేతులా ఒసిసిపట్టుకున్నారు. భారత్ మొత్తం 39 పతకాలు సాధించి పతకాల పట్టికలో గర్వకారణంగా నాలుగో స్థానాన్ని కైవసం చేసుకుంది. ఇందులో 13 స్వర్ణాలు, 17 రజతాలు, 9 కాంస్య పతకాలు ఉన్నాయి. తక్కువ క్రీడల్లో పాల్గొన్నప్పటికీ పతకాల సాధన రేటులో భారత్ అగ్రశ్రేణి ప్రతిభను కనబరిచి అంతర్జాతీయ వేదికపై దేశ పతాకాన్ని ఎగురవేసింది.
బాక్సింగ్, వెయిట్లిఫ్టింగ్లో పతకాల పంట..
ఈ టోర్నీలో భారత్కు అత్యంత బలాన్ని ఇచ్చిన విభాగంగా బాక్సింగ్ నిలిచింది. రింగులోకి దిగిన భారత బాక్సర్లు ప్రత్యర్థులపై విరుచుకుపడి రికార్డు స్థాయిలో 10 పతకాలను కొల్లగొట్టారు. ముఖ్యంగా మహిళా బాక్సర్లు ప్రదర్శించిన ధీరత్వం నభూతో నభవిష్యత్ అనేలా సాగింది. ఏకంగా ఐదు స్వర్ణ పతకాలను మహిళా బాక్సర్లే సాధించడం విశేషం. మిరాబాయి చాను వరుసగా మూడోసారి పసిడి పతకం గెలుచుకుని వెయిట్లిఫ్టింగ్లో సరికొత్త చరిత్ర సృష్టించింది. జూడో, అథ్లెటిక్స్ విభాగాల్లోనూ మన క్రీడాకారులు అంచనాలను మించి రాణించారు. పారా-అథ్లెట్లు సైతం దేశ కీర్తిని విశ్వవ్యాప్తం చేస్తూ పసిడి, రజత పతకాలతో మెరిశారు.
“జో ఖేలేగా వో ఖిలేగా”.. క్రీడాకారుల్లో నవ ఉత్తేజం..
విజేతలను తన నివాసానికి ఆహ్వానించిన ప్రధాని మోదీ వారితో ఎంతో ఆప్యాయంగా సమయం గడిపారు. క్రీడాకారుల అనుభవాలు తెలుసుకుంటూ వారి కృషిని ప్రత్యేకంగా కొనియాడారు. ఈ సందర్భంగా పసిడి విజేత సాక్షి చౌదరి, ఇతర అథ్లెట్లతో కలిసి మోదీ ఒక ప్రత్యేక వీడియోను సోషల్ మీడియాలో పంచుకున్నారు. “ఆడేవాడు ఎల్లప్పుడూ వికసిస్తాడు” అనే తన సంకల్పాన్ని మోదీ పునరుద్ధరించారు. ప్రతి పౌరుడు భారత క్రీడాకారులకు నిరంతరం అండగా నిలవాలని, వారి విజయాన్ని వేడుకగా జరుపుకోవాలని కోరారు. ప్రధాని చూపిన ఆప్యాయత తమలో సరికొత్త ఉత్సాహాన్ని నింపిందని క్రీడాకారులు హర్షం వ్యక్తం చేశారు.
2030లో అహ్మదాబాద్ వేదికగా శతాబ్ది కామన్వెల్త్ గేమ్స్..
గ్లాస్గో క్రీడల ముగింపు వేడుకల్లో భారత్కు ఒక చారిత్రాత్మక గౌరవం లభించింది. కామన్వెల్త్ గేమ్స్ అధికారిక జెండా, బాటన్ను నిర్వాహకులు భారత్కు అప్పగించారు. 2030లో జరగబోయే ప్రతిష్టాత్మక శతాబ్ది కామన్వెల్త్ గేమ్స్కు గుజరాత్లోని అహ్మదాబాద్ నగరం ఆతిథ్యం ఇవ్వనుంది. ఆస్ట్రేలియా తర్వాత ఈ మెగా ఈవెంట్ను ఒకటి కంటే ఎక్కువసార్లు నిర్వహిస్తున్న రెండో దేశంగా భారత్ చరిత్ర పుటల్లో నిలవనుంది. 2010 ఢిల్లీ క్రీడల తర్వాత మళ్లీ రెండు దశాబ్దాలకు భారత్ వేదికగా ఈ క్రీడలు జరగనుండటంతో దేశంలో క్రీడా మౌలిక సదుపాయాలు మరింత బలోపేతం కానున్నాయి.
Delighted to host our outstanding medal winners from the Commonwealth Games 2026 at 7, Lok Kalyan Marg. Heard about their experiences from the Games.
Each one of them has made our nation proud through their exceptional performances. Their success will motivate many youngsters. pic.twitter.com/1zkYCKiV8r
— Narendra Modi (@narendramodi) August 9, 2026
మరిన్ని క్రీడా వార్తల కోసం ఇక్కడ క్లిక్ చేయండి..