Zodiac Signs: కుజ, శని గ్రహాల ప్రమాదకర వీక్షణ.. ఆర్థిక విషయాల్లో ఎవరినైనా గుడ్డిగా నమ్మితే మోసపోతారు జాగ్రత్త..!
Zodiac Signs: ప్రస్తుతం కుజ గ్రహం సింహ రాశిలోనూ, శని గ్రహం కుంభ రాశిలోనూ సంచరిస్తున్నందువల్ల ఈ రెండు గ్రహాల మధ్య పరస్పర వీక్షణ ఏర్పడింది. ఈ రెండు పాప గ్రహాల మధ్య దృష్టి ఏర్పడడం అనేది విధ్వంసాలను, వినాశాలను, ప్రమాదాలను సృష్టించే అవకాశం ఉంది. కుజుడి మీద గురు గ్రహ వీక్షణ కూడా ఉన్నందువల్ల జాతకులకు కొద్దిగా ఉపశమనం లభించే అవకాశం ఉంది కానీ..
ప్రస్తుతం కుజ గ్రహం సింహ రాశిలోనూ, శని గ్రహం కుంభ రాశిలోనూ సంచరిస్తున్నందువల్ల ఈ రెండు గ్రహాల మధ్య పరస్పర వీక్షణ ఏర్పడింది. ఈ రెండు పాప గ్రహాల మధ్య దృష్టి ఏర్పడడం అనేది విధ్వంసాలను, వినాశాలను, ప్రమాదాలను సృష్టించే అవకాశం ఉంది. కుజుడి మీద గురు గ్రహ వీక్షణ కూడా ఉన్నందువల్ల జాతకులకు కొద్దిగా ఉపశమనం లభించే అవకాశం ఉంది కానీ, ఈ కుజ, శనుల వీక్షణ విషయంలో తప్పనిసరిగా జాగ్రత్తగా ఉండాల్సిన అవసరం ఉంది. ఎప్పుడు ఎవరికి ఏ ఉపద్రవం ముంచుకొస్తుందో చెప్పడం కష్టం. ఈ వీక్షణ ఆగస్టు 18 వరకూ కొనసాగుతుంది. తస్మాత్ జాగ్రత్త! వివిధ రాశులవారికి ఏ విధంగా ఉండబోతోందో పరిశీలిద్దాం.
మేషం: ఈ రాశివారికి అయిదవ స్థానంలో ఉన్న కుజుడి మీద శని దృష్టి పడినందువల్ల, మనసులోని ఆలోచనలు, రహస్యాలు బయటపడే అవకాశం ఉంది. ఇతరులను గురించిన అభిప్రాయాలు వెల్లడయ్యే ప్రమాదం ఉంది. ముఖ్యమైన స్నేహితులు, ప్రాణ స్నేహితులైనప్పటికీ వారితో మనసులోని విషయాలను పంచుకోకపోవడం మంచిది. ఎవరినీ విశ్వాసంలోకి తీసుకోవద్దు. వృత్తి ఉద్యోగాలతో పాటు కుటుంబ విషయాలలో కూడా జాగ్రత్తగా ఉండాల్సిన అవసరం ఉంది. వాహన ప్రమాదాల్లో జాగ్రత్తగా ఉండడం మంచిది. ఇక ఏ చిన్న అనారోగ్యం కనిపించినా నిర్లక్ష్యం చేయవద్దు. వెంటనే డాక్టర్లకు చూపించడం శ్రేయస్కరం.
వృషభం: ఈ రాశివారు కొద్ది రోజుల పాటు ఎవరినీ నమ్మకపోవడం చాలా మంచిది. రహస్య లావాదేవీలకు దూరంగా ఉండడం అవసరం. అంతేకాక, రోడ్డు ప్రమాదాల విషయంలో తప్పనిసరిగా జాగ్రత్తలు పాటించాల్సి ఉంటుంది. వీలైనంతగా దూర ప్రయాణాలను వాయిదా వేయడం వల్ల ఉపయోగం ఉంటుంది. కుటుంబ వ్యవహారాలలో పారదర్శకంగా వ్యవహరించడం మంచిది. నిర్ణయాలు తీసుకోవడంలో కూడా కుటుంబ సభ్యులను సంప్రదించాల్సి ఉంటుంది. మనసులోని ఆలోచనలను ఇతరులతో పంచుకున్నందువల్ల ఇరకాట పరిస్థితి, ఇబ్బందికర పరిస్థితి ఏర్పడే అవకాశం ఉంది. ఆస్తి వివాదాల్లో కూడా ఆచితూచి వ్యవహరించాల్సి ఉంటుంది.
మిథునం: ఈ రాశివారు తప్పనిసరిగా వాహన ప్రమాదాల పట్ల అప్రమత్తంగా ఉండాల్సిన అవసరం ఉంది. స్నేహితులు నమ్మించి మోసం చేసే అవకాశం ఉంది. ఎవరితోనూ వాదోపవాదాలకు దిగవద్దు. ఎవరైనా అవమానించడం, దాడి చేయడం వంటివి జరగవచ్చు. ప్రయాణాలలో జాగ్రత్తలు పాటించడం మంచిది. ఇతరుల వ్యవహారాల్లో తలదూర్చడం వల్ల అపనిందల పాలయ్యే సూచనలు ఉన్నాయి. అధికారులతో లేదా యజమానులతో వ్యవహరించేటప్పుడు ఆచితూచి వ్యవహరించాల్సి ఉంటుంది. బంధువులు లేదా స్నేహితులతో మాటా మాటా పెరిగే అవకాశం కూడా ఉంది. ఎంత అప్రమత్తంగా ఉంటే అంత మంచిది.
కర్కాటకం: మనసులోని విషయాలను బయటపెట్టడం వల్ల ఇబ్బందులు పడాల్సి వస్తుంది. మీ బలాలను, బలహీనతలను బయటపెట్టుకోవడం వల్ల ఎదురు దెబ్బలు తినాల్సి వస్తుంది. మితిమీరిన ఔదార్యంతో ఇతరులకు సహాయం చేయడం వల్ల కూడా కష్టనష్టాలను ఎదుర్కోవాల్సి వస్తుంది. మాట తొందర వల్ల కుటుంబంలో అశాంతి, అసంతృప్తి తలెత్తే అవకాశం ఉంది. వాహనాలతో తప్పనిసరిగా జాగ్రత్తగా ఉండాల్సి ఉంటుంది. ప్రస్తుతానికి ప్రతి రహస్యాన్నీ మనసులోనే ఉంచుకోవడం అవసరం. రహస్య కార్యకలాపాల కారణంగా శత్రుత్వాలు పెరగడం జరుగుతుంది. మనసులోని విషయాలను ఎవరితోనూ పంచుకోకపోవడం మంచిది.
సింహం: రోడ్డు ప్రమాదాలు జరగడానికి ఎక్కువగా అవకాశం ఉంది. అవసరమైతే తప్ప ప్రయాణాలు చేయకపోవడం మంచిది. చిన్నపాటి అనారోగ్యమైనప్పటికీ నిర్లక్ష్యం చేయవద్దు. విషాహారం లేదా కలుషితాహారం తీసుకునే సూచనలు కూడా కనిపిస్తున్నాయి. అధికారులతో వాదోపవాదాలు, అపార్థాలు చోటు చేసుకునే ప్రమాదం ఉంది. రహస్య కార్యకలాపాలకు, రహస్య లావాదేవీలకు ఎంత దూరంగా ఉంటే అంత మంచిది. ఎంత ప్రాణ స్నేహితులైనప్పటికీ మనసులోని రహస్యాలను పంచుకోకపోవడం మంచిది. బాగా ఇబ్బందుల్లో పడే అవకాశం కనిపిస్తోంది. ఎటువంటి పరిస్థితుల్లోనూ ఇతరుల విషయాల్లో కల్పించుకోవద్దు.
కన్య: రహస్య శత్రువులు తయారయ్యే అవకాశం ఉంది. ఎవరు మిత్రులో ఎవరు శత్రువులో తెలుసుకోవడం కష్టమవుతుంది. దుష్ర్పచారం జరిగే సూచనలున్నాయి. ముఖ్యంగా ఉద్యోగంలో ప్రతికూల పరిస్థితులు తలెత్తే సూచనలున్నాయి. సహచరులలో ఎవరినీ విశ్వాసంలోకి తీసుకోకపోవడం మంచిది. అనుకున్నదొకటి, అయ్యేది ఒకటి అన్నట్టుగా ఉంటుంది పరిస్థితి. రహస్య వ్యవహారాలు పెట్టుకోవద్దు. కుటుంబ వ్యవహారాలలో కూడా వీలైనంత పారదర్శకంగా ఉండాల్సిన అవసరం ఉంది. అనారోగ్యాల విషయంలో నిర్లక్ష్యం ప్రదర్శించవద్దు. ఆహార విహారాల్లో వీలైనంతగా జాగ్రత్తలు పాటించాల్సిన అవసరం ఉంది.
తుల: అభివృద్ధిని చూసి ఓర్వలేని వారి కారణంగా కొన్ని ఇబ్బందులు పడడం జరుగుతుంది. అడ్డంకులు, అవరోధాలు సృష్టించడం, దుష్ర్పచారం సాగించడం వంటివి జరిగే అవకాశం ఉంది. మిత్రుల రూపంలో శత్రువులు పొంచి ఉన్నారనే విషయాన్ని గ్రహించడం మంచిది. రహస్య లావాదేవీల గురించి ఎక్కడా ఎవరి దగ్గరా బయటపెట్టకపోవడం చాలా మంచిది. స్వల్ప అనారోగ్యమే అయినా జాగ్రత్తలు తీసుకోవాల్సిన అవసరం ఉంటుంది. భార్యభర్తల మధ్య అపార్థాలు సృష్టించడానికి కూడా ప్రయత్నాలు సాగించే అవకాశం ఉంది. ఆస్తి లేదా ఆదాయ వివరాలు ఎవరికీ తెలియజేయకపోవడం శ్రేయస్కరం.
వృశ్చికం: వాహన ప్రమాదాలకే ఎక్కువగా అవకాశం ఉంది. ఒక మందుకు మరో మందు వేసుకోవడం, ఎత్తు నుంచి పడడం, జారి పడడం వంటివి జరిగే సూచనలు కూడా ఉన్నాయి. ఇటువంటి విషయాలలో ఎంత జాగ్రత్తగా ఉంటే అంత మంచిది. మనసులోని రహస్యాలు మనసులోనే ఉంచుకోవడం మంచిది. కొందరు సన్నిహితులు మోసం చేసే అవకాశం ఉంది. మీ బలహీనతలను ఎక్కడా బయటపెట్టవద్దు. కుటుంబ విషయాలను బంధువుల దగ్గర ప్రస్తావించవద్దు. ఎవరితోనూ రహస్య ఒప్పందాలు చేసుకోకపోవడం మంచిది. అధికారులతో వ్యవహరించేటప్పుడు సంయమనం పాటించడం మంచిది.
ధనుస్సు: ఈ రాశివారికి ఈ ప్రమాదకర వీక్షణ వల్ల సమస్యలు తక్కువగానే ఉండే అవకాశం ఉంది. ఈ రాశి నాథుడైన గురు గ్రహం వీక్షణ కుజ గ్రహం మీద ఉన్నందువల్ల రోడ్డు ప్రమాదాలు తదితర ప్రమాదాలకు అవకాశం తక్కువగా ఉంది. అయితే, వ్యక్తిగత విషయాలు బయటపెట్టిన కారణంగా ఇబ్బందులు, ఇరకాట పరిస్థితులు తప్పకపోవచ్చు. రహస్య వ్యవహారాలు పెట్టుకోకపోవడం, ఒక వేళ గతంలోనే చోటు చేసుకున్నా వాటిని ఇతరుల ముందు బయటపెట్టకపోవడం శ్రేయస్కరం. కొంత కాలం పాటు ఇతరులతో, ముఖ్యంగా సన్నిహితులతో అంటీ ముట్టనట్టు వ్యవహరించడం చాలా మంచిది.
మకరం: ఎత్తు నుంచి పడడం, జారిపడడం, రోడ్డు ప్రమాదాలకు గురి కావడం వంటివి జరిగే అవకాశం ఉంది. ఎవరినీ నమ్మి ఆర్థిక బాధ్యతలను అప్పగించకపోవడం మంచిది. ఏ విషయంలోనూ ఎవరినీ విశ్వాసంలోకి తీసుకోవద్దు. ఎవరికీ వాగ్దానాలు చేయవద్దు, హామీలు ఉండవద్దు. ముఖ్యంగా దగ్గర బంధువుల వల్ల ప్రమాదం పొంచి ఉంది. ఆకస్మిక ధన నష్టానికి కూడా అవకాశం ఉంది. ఎవరి కారణంగానో మోసపోయే సూచనలున్నాయి. ప్రయాణాలు వాయిదా వేసుకోవడం మంచిది. జీవిత భాగస్వామి నుంచి ఊహించని సమస్యలు తలెత్తే అవకాశం ఉంది. ఆంతరంగిక విషయాలను ఎవరితోనూ పంచుకోవద్దు.
కుంభం: వాహన ప్రమాదాలు, కలుషితాహార సేవనం, వ్యసనాలు, అనవసర పరిచయాలు వంటివి చోటు చేసుకునే అవకాశం ఉంది. ఆరోగ్యం విషయంలో అప్రమత్తంగా ఉండాల్సిన అవసరం ఉంది. శస్త్రచికిత్సల వరకూ వెళ్లే సూచనలు కూడా ఉన్నాయి. కొద్దిపాటి అనారోగ్యమే అయినప్పటికీ, డాక్టర్లను సంప్రదించడం మంచిది. విందులకు కూడా దూరంగా ఉండడం మంచిది. కొందరు సన్నిహితులు ఆర్థికంగా నష్టపరిచే అవకాశం ఉంది. తొందరపాటు నిర్ణయాల వల్ల, తొందరపాటు మాటల వల్ల నష్టపోవడం జరుగుతుంది. వేగంగా వాహనాలను నడపడం, వాహనాలలో దూర ప్రయాణాలు చేయడం వంటివి పెట్టుకోవద్దు.
మీనం: రహస్య శత్రువుల తయారవుతారు. అధికారులకు మీ మీద లేనిపోని విషయాలు చెప్పడం వంటివి జరిగే అవకాశం ఉంది. ఉద్యోగంలో ఇరకాట పరిస్థితులు తలెత్తే సూచనలున్నాయి. ముఖ్యంగా నరఘోష ఎక్కువగా ఉంటుంది. ఎవరికైనా డబ్బు ఇస్తే తిరిగి వచ్చే అవకాశం ఉండదు. ఎవరినీ తేలికగా నమ్మవద్దు. కష్టార్జితంలో ఎక్కువ భాగం వృథా అయ్యే అవకాశం కూడా ఉంది. కుటుంబ సభ్యులను సంప్రదించనిదే ముఖ్యమైన నిర్ణయాలు తీసుకోవద్దు. జీవిత భాగస్వామిని తప్ప ఎవరినీ విశ్వాసంలోకి తీసుకోవద్దు. దొంగతనాలకు, దోపిడీకి గురయ్యే సూచనలు కూడా ఉన్నాయి.
ముఖ్యమైన పరిహారాలు: శని, కుజుల పరస్పర వీక్షణ మీద గురు దృష్టి కూడా ఉన్నందువల్ల ఈ రకమైన ప్రమాదాలు మరీ ఎక్కువగా జరిగే అవకాశాలు లేనప్పటికీ, కొద్ది రోజుల పాటు జాగ్రత్తగా ఉండవలసిన అవసరం మాత్రం స్పష్టంగా కనిపిస్తోంది. నిజానికి, వ్యక్తిగత జాతకాల మీద కూడా ఈ ఫలితాలు ఆధారపడి ఉన్నప్పటికీ, ప్రతి రాశివారి జీవితంలోనూ ఆగస్టు 18లోగా ఈ వీక్షణ వల్ల కొద్దో గొప్పో ఈ రకమైన ఇబ్బందులు చోటు చేసుకునే అవకాశం కనిపిస్తోంది. ఈ ప్రమాదాలు జరగకుండా ఉండాలన్న పక్షంలో దత్తాత్రేయ స్తోత్రం లేదా దుర్గాదేవి స్తోత్రం లేదా ఆదిత్య హృదయం చదువుకోవడం చాలా మంచిది.