Health Tips: వైద్యుల సలహా లేకుండానే పెయిన్ కిల్లర్స్ తీసుకుంటున్నారా..? తస్మాత్ జాగ్రత్త.. ముందుగా గుండెకే ప్రమాదం..!
Pain Killer Side Effects: చాలా మంది తలనొప్పి, కడుపు నొప్పి వంటి చిన్న చిన్న సమస్యలకు కూడా పెయిన్ కిల్లర్స్ ఉపయోగిస్తుంటారు. అయితే ఇలా చేయడం ఆరోగ్యానికి ఏ మాత్రం మంచిది కాదని నిపుణులు చెబుతున్నారు. డోసేజ్ విషయంలో వైద్యుల సలహా లేకుండా తీసుకుంటే గుండెకు కూడా ప్రమాదం తప్పదని పలు అధ్యయనాలు కూడా చెబుతున్నాయి.
డెన్మార్క్‌కి చెందిన కోపెన్‌హాగన్ యూనివర్శిటీ హాస్పిటల్ పరిశోధకులు పెయిన్ కిల్లర్స్‌ని ఎక్కువగా ఉపయోగించడం వల్ల గుండెపోటు మరణాల ప్రమాదం పెరుగుతుందని కనుగొన్నారు. పెయిన్ కిల్లర్స్ తీసుకోవడం వల్ల గుండెపోటు సంభవించేందుకు 59 శాతం అవకాశాలు పెరుగుతున్నాయని వారు తెలిపారు. ఈ క్రమంలో పెయిన్ కిల్లర్స్ కారణంగా ఆరోగ్యంపై ఏయే ప్రభావాలు ఉంటాయో ఇప్పుడు చూద్దాం..
గుండె సమస్యలు: పెయిన్ కిల్లర్ కారణంగా హార్ట్ స్ట్రోక్ ప్రమాదం పెరుగుతుందని పలు అధ్యయనాలు చెబుతున్నాయి. ఆయా నివేదిక ప్రకారం పెయిన్ కిల్లర్స్‌లోని రసాయనాలు నేరుగా రక్తంలో కలవడం వల్ల బీపీ, గుండెపోటు సమస్యలు కూడా పెరుగుతాయి.
కాలేయానికి హాని: ఆరోగ్య సమస్య ఉందని మనం తీసుకునే కొన్ని రకాల మందులు కాలేయానికి హాని చేయవచ్చు. ముఖ్యంగా పెయిన్ కిల్లర్స్‌లోని విష పదార్థాలు కాలేయంలో పేరుకుపోయి ప్రాణాంతంక పరిస్థితులకు దారితీస్తుంది.
జీర్ణ వ్యవస్థపై ప్రభావం: పెయిన్ కిల్సర్స్‌ని అతిగా వాడడం వల్ల జీర్ణ వ్యవస్థపై కూడా ప్రభావం పడుతుంది. ఫలితంగా జీర్ణక్రియ రేటు తగ్గిపోవడమే మలబద్ధకం, ఉబ్బరం, అపానవాయువు, హేమోరాయిడ్లకు దారితీస్తుంది.
రోగనిరోధక శక్తిపై దుష్ప్రభావం: పెయిన్ కిల్లర్స్ నొప్పి నుంచి తాత్కాలిక ఉపశమనం కలిగించినా, తదనంతరం దీర్ఘకాలం పాటు శరీరంపై దుష్ప్రభావాలను చూపిస్తాయి. ఈ క్రమంలో శరీర రోగ నిరోధక శక్తి కూడా తగ్గిపోతుంది. ఫలితంగా సీజనల్ వ్యాధుల నుంచి శరీరం తన రక్షణ కవచాన్ని కోల్పోతుంది.