అరెరె ఇన్నాళ్లు ఎలా మిస్సయ్యాం.. గుడ్డు ఉడికించేటప్పుడు ఇది వేస్తే పొట్టు ఈజీగా ఊడిరావడం పక్కా..
మార్నింగ్ బ్రేక్ఫాస్ట్లో అయినా, సాయంత్రం స్నాక్స్లో అయినా ఉడికించిన గుడ్డు తినడం చాలామందికి అలవాటు. నిమిషాల్లో తయారయ్యే ఈ ప్రోటీన్ పవర్హౌస్ను తినడం ఎంత ఇష్టమో.. ఉడికించిన తర్వాత దాని పెంకు ఒలవడం ఒక్కోసారి అంత విసుగు తెప్పిస్తుంది. తొక్క తీసే క్రమంలో తెల్లసొన పెంకుకే అంటుకుని గుడ్డు చిందరవందరగా మారిపోవడం చాలా మందికి ఎదురవుతుంది. అయితే వంటగదిలో ఉండే చిన్న వస్తువులతో గుడ్డు పెంకును చిటికెలో ఎలా తీయ్యాలో తెలుసుకుందాం..
గుడ్లు ఉడకబెట్టే సమయంలో నీటిలో అర టీస్పూన్ బేకింగ్ సోడా లేదా కొన్ని చుక్కల వెనిగర్ వేస్తే పెంకు ఈజీగా ఊడివస్తుంది. ఈ చిట్కా వెనుక ఆసక్తికరమైన సైన్స్ దాగి ఉంది. తాజా గుడ్లలో ఆమ్లత ఎక్కువగా ఉండటం వల్ల తెల్లసొన పెంకు లోపలి పొరకు గట్టిగా అతుక్కుంటుంది. నీటిలో బేకింగ్ సోడా కలిపినప్పుడు అది క్షారత్వాన్ని పెంచి లోపలి పొరను వదులు చేస్తుంది. అదే వెనిగర్ అయితే అందులోని ఆమ్లం పెంకులోని కాల్షియంను మెత్తబరుస్తుంది.
బేకింగ్ సోడా, వెనిగర్తో పాటు మరికొన్ని పద్ధతులు కూడా గుడ్డు పెంకు సులువుగా రావడానికి తోడ్పడతాయి. గుడ్లు ఉడికే నీటిలో కొద్దిగా ఉప్పు లేదా కొన్ని చుక్కల నూనె వేసినా పెంకు లోపలికి తేమ చేరి పొర వదులవుతుంది. అలాగే మరీ నిన్న మొన్నటి తాజా గుడ్ల కంటే, కొన్ని రోజులు ఫ్రిజ్లో నిల్వ ఉన్న గుడ్లను ఉడకబెడితే సహజంగానే పెంకు త్వరగా వస్తుంది.
ఉడకబెట్టే విధానంలో కూడా చిన్న జాగ్రత్తలు పాటించాలి. గుడ్లను చల్లటి నీటిలో వేసి వేడి చేయడం కంటే, నీరు బాగా మరుగుతున్న సమయంలో గుడ్లను నెమ్మదిగా దింపితే తెల్లసొన పెంకుకు అంటుకోకుండా త్వరగా గడ్డకడుతుంది. సుమారు 10 నుంచి 12 నిమిషాల పాటు సరైన మంటపై ఉడికిస్తే గుడ్డు లోపలి పచ్చసొన కూడా రంగు మారకుండా చక్కగా ఉడుకుతుంది.
గుడ్లు ఉడకగానే చేయాల్సిన మరో ముఖ్యమైన పని ఐస్ బాత్. వేడి నీటి నుండి గుడ్లను తీసి వెంటనే ఐస్ ముక్కలు ఉన్న చల్లటి నీటిలో సుమారు 5 నిమిషాల పాటు ఉంచాలి. ఉష్ణోగ్రతలో వచ్చే ఈ ఆకస్మిక మార్పు వల్ల గుడ్డు లోపలి భాగం స్వల్పంగా కుచించుకుపోయి, పెంకు నుంచి పొర పూర్తిగా విడిపోతుంది.
చల్లటి నీటిలో నుంచి తీసిన గుడ్డును గట్టి ఉపరితలంపై నెమ్మదిగా తట్టి, అరచేతితో ముందుకు వెనుకకు సున్నితంగా దొర్లించాలి. ఇలా చేయడం వల్ల పెంకుపై ఏర్పడే పగుళ్ల ద్వారా లోపలి పలుచని పొర వేరై, చేత్తో లాగగానే మొత్తం పెంకు క్షణాల్లో ఊడివస్తుంది. ఉడికించిన గుడ్డును క్షణాల్లో ఆస్వాదించడానికి ఈ పద్ధతి ఉత్తమమైన మార్గం.