Green peas : చలికాలంలో పచ్చి బఠానీలు తింటే ఆరోగ్యానికి కలిగే ప్రయోజనాలు తెలిస్తే..
చలికాలంలో మార్కెట్‌లో ఎటు చూసినా తాజాగా పండ్లు, కూరగాయలే కనిపిస్తుంటాయి. అలాగే, సీజనల్‌గా వచ్చే కొన్ని కూరగాయాలు కూడా శీతాకాలంలోనే విరివిగా లభిస్తాయి. అందులో ఒకటి పచ్చి బఠాణీలు. ఈ సమయంలో పచ్చి బఠాణీలు ఎక్కువగా లభిస్తాయి. అందుకే చాలా మంది వీటితో రకరకాల వంటకాలు చేసుకుని తింటుంటారు. పచ్చి బఠాణీలు వంటలకు రుచిని పెంచుతాయి. అలాగే, చాలా మంది వీటిని పచ్చిగా కూడా తినడానికి ఇష్టపడతారు. అసలు పచ్చి బఠానీలను తినడం వల్ల కలిగే ప్రయోజనాలు ఏంటో తెలుసుకుందాం.
పచ్చి బఠానీల్లో పోషకాలు పుష్కలంగా ఉంటాయి. ముఖ్యంగా ఇందులో ఫైబర్, సోడియం, ఫాస్పరస్, పొటాషియం, ఐరన్, కాల్షియం, ప్రొటీన్, విటమిన్ బి6, మెగ్నీషియం, సెలీనియం, యాంటీ ఆక్సిడెంట్ గుణాలు, విటమిన్ సి, విటమిన్ కె, కాల్షియం, జింక్ తదితర పోషకాలు పుష్కలంగా లభిస్తాయి. పచ్చిబఠానీలు ఆరోగ్యపరంగా అన్ని వయసులో వారు తినవచ్చని పోషకాహార నిపుణులు సూచిస్తున్నారు.
పచ్చి బఠానీలలో అవసరమైన కెరోటినాయిడ్లు లుటిన్, జియాక్సంతిన్ ఉంటాయి. ఈ పోషకాలు కంటిశుక్లం వంటి దీర్ఘకాలిక వ్యాధుల నుండి కళ్ళను రక్షించడంలో సహాయపడతాయి. పచ్చి బఠానీలలో ఎ, బి, సి, ఇ, కె వంటి అనేక రకాల విటమిన్లు ఉంటాయి. ఇందులో జింక్, పొటాషియం, ఫైబర్ కూడా పుష్కలంగా ఉంటాయి.
పచ్చి బఠానీలు పీచుతో నిండిన ఆహారం. ఇది శరీర రోగనిరోధక శక్తిని పెంచుతుంది. పచ్చి బఠానీలలో కౌమెస్ట్రాల్ అనే పోషకం ఉంటుంది. ఇది కడుపు క్యాన్సర్ నుండి రక్షించడంలో సహాయపడుతుంది. మధుమేహ వ్యాధిగ్రస్తులు కూడా పచ్చి బఠానీలను తినవచ్చు. పచ్చి బఠానీలు రక్తంలో చక్కెర స్థాయిలను సమతుల్యం చేస్తాయి.
పచ్చి బఠాణీలు తీసుకోవటం వల్ల శరీరానికి త్వరగా శక్తిని ఇస్తుంది. జ్ఞాపకశక్తిని మెరుగుపరచడంలో కూడా ప్రభావవంతంగా పనిచేస్తుంది. ఇందులో యాంటీ ఇన్‌ఫ్లమేటరీ గుణాలు కూడా ఉన్నాయి. ఇది మధుమేహం, గుండె జబ్బులు, ఆర్థరైటిస్ వంటి వ్యాధుల ప్రమాదాన్ని తగ్గిస్తుంది. పచ్చి బఠానీలను తీసుకోవడం వల్ల జ్ఞాపకశక్తి సమస్యలు రావని నిపుణులు చెబుతున్నారు.
పచ్చి బఠాణీలలో ఫైబర్ పుష్కలంగా ఉంటుంది. ఇది జీర్ణవ్యవస్థను బలోపేతం చేస్తుంది. ఇది మంచి బ్యాక్టీరియా వృద్ధిని ప్రోత్సహిస్తుంది. బరువు తగ్గడానికి కూడా పచ్చి బఠానీలు బెస్ట్ ఆప్షన్. ఇందులో కేలరీలు చాలా తక్కువగా ఉంటాయి. వీటిని తినడం వల్ల మీ కడుపు నిండడమే కాకుండా బరువు తగ్గడానికి సహాయపడుతుంది.