పెరుగు అన్నం vs లెమన్ రైస్.. ఆ సమస్య ఉన్నవారికి ఏది బెస్ట్..? ఇవి తప్పక తెలుసుకోండి..
భారతీయులు అన్నం లేకుండా ఉండలేరు. అయితే డయాబెటిస్ లేదా ప్రీ-డయాబెటిస్ ఉన్నవారికి అన్నం తినడం ఒక సవాలుతో కూడుకున్న పని. ఎందుకంటే అన్నం త్వరగా జీర్ణమై రక్తంలో చక్కెర స్థాయిలను వేగంగా పెంచుతుంది. ముఖ్యంగా వేసవి కాలంలో చల్లదనం కోసం తీసుకునే పెరుగు అన్నం లేదా నోటికి రుచినిచ్చే లెమన్ రైస్ చక్కెర స్థాయిలపై ఎలాంటి ప్రభావం చూపుతాయి? ఏది ఆరోగ్యానికి మేలు? తాజా పరిశోధనలు ఏం చెబుతున్నాయో ఇప్పుడు తెలుసుకుందాం..
అన్నం తింటే షుగర్ ఎందుకు పెరుగుతుంది: ఫుడ్స్ జర్నల్, నేషనల్ ఇన్స్టిట్యూట్ ఆఫ్ న్యూట్రిషన్ ప్రకారం, తెల్ల బియ్యం గ్లైసెమిక్ ఇండెక్స్ సుమారు 58 ఉంటుంది. దీనివల్ల అన్నం తిన్న వెంటనే గ్లూకోజ్ స్థాయిలు పెరుగుతాయి. అయితే అన్నాన్ని ఒంటరిగా కాకుండా ప్రోటీన్, కొవ్వు లేదా ఆమ్ల గుణాలు ఉన్న పదార్థాలతో కలిపి తీసుకున్నప్పుడు ఈ ప్రభావం తగ్గుతుంది.
పెరుగు అన్నం: పరిశోధనల ప్రకారం.. లెమన్ రైస్ కంటే పెరుగు అన్నం రక్తంలో చక్కెర స్థాయిలను స్థిరీకరించడంలో మెరుగ్గా పనిచేస్తుంది. దీనికి ప్రధాన కారణాలు.. పెరుగులోని మంచి బ్యాక్టీరియా కార్బోహైడ్రేట్ల శోషణను నెమ్మదిగా చేస్తుంది. పెరుగులో ఉండే ప్రోటీన్ జీర్ణాశయం ఖాళీ అవ్వడాన్ని ఆలస్యం చేస్తుంది. దీనివల్ల రక్తంలో చక్కెర ఒక్కసారిగా పెరగకుండా స్థిరంగా ఉంటుంది. ఇది జీర్ణవ్యవస్థను చల్లబరచడమే కాకుండా శక్తిని కూడా పెంచుతుంది.
నిమ్మకాయ అన్నం: ప్లాంట్స్ జర్నల్ ప్రకారం.. అన్నంలో నిమ్మరసం కలపడం వల్ల దానిలోని ఆమ్ల గుణం కార్బోహైడ్రేట్ల జీర్ణక్రియను నెమ్మదింపజేస్తుంది. తాలింపులో వాడే నూనె, వేరుశెనగలు, ఆవాలు వంటివి కొవ్వులు, ప్రోటీన్లను అందించి గ్లూకోజ్ స్థాయిలను నియంత్రిస్తాయి. నిమ్మకాయ అన్నంలో నూనె పరిమాణం ఎక్కువగా ఉండే అవకాశం ఉంది. మధుమేహ వ్యాధిగ్రస్తులు దీనిని తీసుకునే ముందు వైద్యుడి సలహా తీసుకోవడం ఉత్తమం.
పరిమాణమే ముఖ్యం: మీరు ఏ వంటకం తిన్నా, అది ఎంత తింటున్నారనేదే మీ షుగర్ లెవల్స్ను నిర్ణయిస్తుంది. ఒక కప్పు కంటే ఎక్కువ అన్నం తీసుకుంటే చక్కెర స్థాయిలు అకస్మాత్తుగా పెరిగే ప్రమాదం ఉంది. కేవలం అన్నం మాత్రమే కాకుండా ప్లేట్లో పప్పులు లేదా పీచు పదార్థం ఎక్కువగా ఉండే కూరగాయలు ఉండేలా చూసుకోవాలి. పాలిష్ చేసిన బియ్యం కంటే ముడి బియ్యం లేదా దంపుడు బియ్యం వాడటం మేలు.
డయాబెటిస్ ఫ్రెండ్లీ: పెరుగు అన్నం తీపి లేని, చిక్కటి పెరుగును వాడండి. రుచి కోసం తురిమిన క్యారెట్, కీర దోసకాయ వంటి కూరగాయలు చేర్చండి. అన్నం పరిమాణం తగ్గించి, పెరుగు ఎక్కువగా ఉండేలా చూసుకోండి. అదే లెమన్ రైస్ కోసమైతే వంట నూనెను సాధ్యమైనంత వరకు తగ్గించడం మంచిది. వేరుశెనగలు, పప్పు దినుసులు కొంచెం ఎక్కువగా వేసి ప్రోటీన్ పెంచండి. ఫైబర్ కోసం ఉడికించిన బీన్స్ లేదా ఇతర కూరగాయలు కలుపుకోవచ్చు.