సచిన్, కోహ్లీ వల్ల కూడా కాలే.. బర్త్ డే బాయ్ రోహిత్ శర్మ అరుదైన రికార్డుల ‘పంచ్’.. టచ్ చేయడం కష్టమే..!
Rohit Sharma Birthday: టీమిండియా స్టార్ ప్లేయర్ రోహిత్ శర్మ నేడు 39 ఏట అడుగుపెడుతున్నాడు. కాగా, వన్డే ప్రపంచకప్ 2027 కోసం సన్నాహాల్లో మునిగిపోయాడు. ఈ క్రమంలో రోహిత్ శర్మ నమోదు చేసిన 5 రికార్డులను ఓసారి చూద్దాం.. వీటిని బ్రేక్ చేయాలంటే కష్టమే.
భారత క్రికెట్ చరిత్రలో అత్యంత ప్రభావవంతమైన ఆటగాళ్లలో ఒకరైన రోహిత్ శర్మ నేడు తన 39వ పుట్టినరోజును సెలబ్రేట్ చేసుకుంటున్నాడు. మైదానంలో పరుగుల వరద పారించడమే కాకుండా, కెప్టెన్గా భారత్కు ప్రపంచ కప్లను అందించిన ఈ 'హిట్మ్యాన్' పేరిట కొన్ని అరుదైన రికార్డులు ఉన్నాయి. ఆధునిక క్రికెట్లో వాటిని అధిగమించడం ఏ బ్యాటర్కైనా అంత సులభం కాదు. అవేంటో ఓసారి చూద్దాం..
1. వన్డే క్రికెట్లో అత్యధిక వ్యక్తిగత స్కోరు: క్రికెట్ ప్రపంచం ఎప్పటికీ గుర్తుంచుకునే రికార్డు రోహిత్ శర్మ పేరిట ఉంది. 2014లో శ్రీలంకపై కోల్కతా వేదికగా జరిగిన మ్యాచ్లో రోహిత్ ఏకంగా 264 పరుగులు సాధించి ప్రపంచ రికార్డు సృష్టించాడు. ఒక ఇన్నింగ్స్లో 33 ఫోర్లు, 9 సిక్సర్లతో విరుచుకుపడి ఆయన సృష్టించిన ఈ మైలురాయిని చేరుకోవడం ప్రస్తుత తరం ఆటగాళ్లకు ఒక కలగానే మిగిలిపోయింది.
2. మూడు డబుల్ సెంచరీల రారాజు: వన్డేల్లో ఒక్క ద్విశతకం సాధించడమే గగనమైన వేళ, రోహిత్ శర్మ ఏకంగా మూడుసార్లు ఈ ఘనత సాధించి చరిత్రకెక్కాడు. ఆస్ట్రేలియాపై ఒకసారి, శ్రీలంకపై రెండుసార్లు డబుల్ సెంచరీలు బాది 'డబుల్ సెంచరీల కింగ్' అనిపించుకున్నాడు. ప్రపంచంలో మరే ఇతర బ్యాటర్ కూడా ఇప్పటివరకు ఈ స్థాయికి చేరుకోలేదు.
3. ప్రపంచ కప్లో అత్యధిక శతకాలు: ప్రపంచ కప్ వంటి భారీ టోర్నీలలో రోహిత్ ప్రదర్శన అమోఘం. వన్డే ప్రపంచ కప్ చరిత్రలో అత్యధికంగా 7 సెంచరీలు బాదిన రికార్డు ఆయన పేరిట ఉంది. ఈ క్రమంలో ఆయన సాక్షాత్తు సచిన్ టెండూల్కర్ రికార్డును కూడా అధిగమించాడు. ముఖ్యంగా 2019 ప్రపంచ కప్లో ఒకే టోర్నీలో 5 సెంచరీలు సాధించి రికార్డు సృష్టించాడు.
4. అంతర్జాతీయ క్రికెట్లో సిక్సర్ల రారాజు: సిక్సర్లు బాదడంలో రోహిత్ శర్మకు సాటి ఎవరూ లేడు. క్రికెట్ మూడు ఫార్మాట్లలో కలిపి మొత్తం 650కి పైగా సిక్సర్లు బాది ప్రపంచంలోనే అగ్రస్థానంలో నిలిచాడు. వెస్టిండీస్ దిగ్గజం క్రిస్ గేల్ పేరిట ఉన్న రికార్డును తుడిచిపెట్టిన రోహిత్, తన అద్భుతమైన టైమింగ్తో 'సిక్స్ మెషీన్'గా గుర్తింపు పొందాడు.
5. అన్ని ఫార్మాట్లలో మూడుకు పైగా సెంచరీలు: టెస్టులు, వన్డేలు, టీ20లు.. ఇలా మూడు విభాగాల్లోనూ కనీసం మూడు లేదా అంతకంటే ఎక్కువ సెంచరీలు సాధించిన ఏకైక భారతీయ బ్యాటర్ రోహిత్ శర్మ. టెస్టుల్లో 12, టీ20ల్లో 5, వన్డేల్లో 33 సెంచరీలు సాధించి అన్ని ఫార్మాట్లలో తన ఆధిపత్యాన్ని చాటుకున్నాడు.
రోహిత్ శర్మ కేవలం ఒక బ్యాటర్ మాత్రమే కాదు, భారత క్రికెట్ను కొత్త శిఖరాలకు చేర్చిన గొప్ప సారథి. 2024 టీ20 ప్రపంచ కప్, 2025 ఛాంపియన్స్ ట్రోఫీ విజేతగా నిలిచి తన కెప్టెన్సీ ముద్రను వేశాడు. ఆయన మరిన్ని విజయాలు సాధించాలని కోరుకుంటూ జన్మదిన శుభాకాంక్షలు..!