Devi Sri Prasad: సినిమాకు ప్రాణం గా నిలుస్తున్న దేవీ మ్యూజిక్
గంగిగోవు పాలు గరిటెడైనా చాలు అంటూ చిన్నపుడు చదువుకున్న పద్యం గుర్తుంది కదా..? ఇప్పుడు దేవీ శ్రీ ప్రసాద్ను చూస్తుంటే ఇదే గుర్తుకొస్తుంది. గ్యాప్ లేకుండా సినిమాలు చేసేంత క్రేజ్ ఉన్నా.. కావాలనే అలా ఓ గ్యాప్ ఇస్తుంటారీయన. కమర్షియల్ బ్రేక్ ఇచ్చినా.. కావాల్సినన్ని రోజులు గుర్తుండిపోయే పాటలిస్తుంటారు. తాజాగా మరోసారి దేవీ మేనియా మొదలైంది.
దేవీ శ్రీ ప్రసాద్.. మాటల కంటే ఎక్కువగా పాటలతోనే పలకరించే వ్యక్తి ఈయన. DSP అని స్క్రీన్ మీద కనిపిస్తే చాలు.. సగం సినిమా హిట్టైపోయినట్లే. ఈయన గ్యాప్ ఇచ్చినా.. ఆడియన్స్ మాత్రం ఆయన పాటలను గ్యాప్ లేకుండా వింటుంటారు.
అదే దేవీ మ్యాజిక్. కొన్ని రోజులుగా మరోసారి దేవీ మ్యూజిక్ మేనియా మొదలైంది. ఒకప్పుడు ఏడాదికి 10 సినిమాలు కూడా చేసిన దేవీ.. ఈ మధ్య ఆ లెక్క బాగా తగ్గించేసారు.
తెలుగులో 2023లో వాల్తేరు వీరయ్య.. 2024లో పుష్ప 2 సినిమాలకు మాత్రమే సంగీతం అందించారు. ఈ రెండింటికీ దేవీ మ్యూజికల్ మ్యాజిక్ ఎలా పని చేసిందో చెప్పనక్కర్లేదు. ఇక ఈ ఏడాది తండేల్కు తన పాటలతో ప్రాణం పోసారు దేవీ.
అలాగే తాజాగా కుబేరాతో మాయ చేస్తున్నారీయన.ఒకప్పట్లా వేగంగా సినిమాలు చేయాలనే ధ్యాసేం లేదు దేవీకి. చేసిన కొన్ని సినిమాలైనా గుర్తుండిపోయేలా ప్లాన్ చేసుకుంటున్నారు. పుష్ప 2, తండేల్, కుబేరాతో దేవీ శ్రీ ప్రసాద్ మళ్లీ రేసులోకి వచ్చారు.
ప్రస్తుతం మోహన్ లాల్ వృషభకు సంగీతం అందిస్తున్నారు దేవీ. మొత్తానికి చేసే సినిమాల సంఖ్య తగ్గినా.. చేసిన ప్రతీ పాటతో పూనకాలు పుట్టించాలని చూస్తున్నారు దేవీ.