Mahindra Electric Cars: ఎదురుచూపులకు ఫుల్ స్టాప్.. లాంచింగ్‌కు రెడీ అయిన మహీంద్రా ఎలక్ట్రిక్ కార్లు.. లిస్ట్ ఇదే..
దేశీయ మార్కెట్లో ఎలక్ట్రిక్ వాహనాలకు క్రమంగా డిమాండ్ పెరుగుతోంది. అందుకనుగుణంగా కంపెనీలు తమ ఉత్పత్తులను లాంచ్ చేస్తున్నాయి. కార్ల విషయానికి వస్తే ఇప్పటికే టాటా ఓ అడుగు ముందుందనే చెప్పాలి. నెక్సాన్ ఈవీ, టియాగో ఈవీ, టైగోర్ ఈవీ వంటివి ఇప్పటికే మార్కెట్లో ప్రవేశ పెట్టింది. అలాగే మరిన్ని కార్లను లాంచింగ్ కి రెడీ చేసింది. అలాగే కియా, ఎంజీ, మెర్సిడెస్ వంటి బ్రాండ్లుకూడా తమ ఉత్పత్తులను లాంచ్ చేశాయి. ఈ ఎలక్ట్రిక్ కార్ల రేస్ లో కాస్త వెనుకబడినట్లు కనిపించిన మహీంద్రా కంపెనీ ఇప్పుడు తన సత్తా చూపేందుకు సిద్ధమైంది. ఇప్పటికే ఎక్స్‌యూవీ 400 పేరిట ఓ ఎలక్ట్రిక్ కారు మార్కెట్లో అందుబాటులో ఉండగా.. మరిన్ని మోడళ్లు లాంచ్ చేసేందుకు మహీంద్రా ప్రణాళిక చేసింది. వాటిలో అత్యాధునిక సాంకేతికతతో కూడిన ఫీచర్లున్నాయి. త్వరలో లాంచ్ కానున్న మహీంద్రా కంపెనీకి సంబంధించిన టాప్ ఎలక్ట్రిక్ కార్ల గురించి ఇప్పుడు తెలుసుకుందాం..
మహీంద్రా బీఈ 05.. మహీంద్రా నుంచి వస్తున్న పూర్తిస్థాయి ఎలక్ట్రిక్ వాహనం ఇది. దీనిని టాటా అవిన్యా, హ్యాందాయ్ క్రెటాలకు పోటీగా మహీంద్రా ఆవిష్కరిస్తోంది. దీనిలో కొత్త ఇన్‌గ్లో(ఐఎన్జీఎల్ఓ) కాన్సెప్ట్ ను వినియోగించారు. దీనిలో 60kwh, 80kwh వేరియంట్ల బ్యాటరీ ప్యాక్స్ ఉంటాయి. సింగిల్ చార్జ్ పై 450 కిలోమీటర్ల రేంజ్ ఇస్తుంది. దీని ధర రూ. 24లక్షలు ఉండొచ్చని అంచనా వేస్తున్నారు. 2025 అక్టోబర్ లో ఈ కారు అందుబాటులోకి వచ్చే అవకాశం ఉంది.
మహీంద్రా బీఈ రాల్ ఈ.. కూపే స్టైల్ ఎస్యూవీ ఇది. స్టీల్ వీల్స్, వస్తువులు పె ట్టుకునేందుకు రూఫ్ ర్యాక్ ఉంటాయి. దీని పవర్ ట్రైన్ రియర్ వీల్ డ్రైవ్, డ్యూయల్ మోటార్ ఆన్ వీల్ డ్రైవ్(ఏడబ్బ్యూడీ) ఫీచర్లు ఉన్నాయి. 175 కిలోవాట్ల పాస్ట్ చార్జింగ్ సామర్థ్యం ఉంటుంది. దీనిలోని బ్యాటరీ సింగిల్ చార్జ్ పై 450 కిలోమీటర్ల రేంజ్ ఇస్తుంది. ఇది 2025 డిసెంబర్ నాటికి మార్కెట్లోకి వచ్చే అవకాశం ఉంది.
మహీంద్రా బీఈ 07.. ఈ ఎస్యూవీ టాటా హారియర్ పరిమాణంలో ఉంటుంది. అథ్లెటిక్ లుక్ లో కట్టిపడేస్తుంది. మూడు స్క్రీన్ లతో డ్యాష్ బోర్డు ఉంటుంది. దీనిలో రెండు వేరియంట్లు 60kwh, 80kwh సామర్థ్యాలతో బ్యాటరీలు ఉంటాయి. సింగిల్ చార్జ్ పై 450 కిలోమీటర్ల రేంజ్ ఇస్తుంది. దీని ధర రూ. 25లక్షల నుంచి 30 లక్షల వరకూ ఉంటుంది. 2026 అక్టోబర్ నాటికి అందుబాటులోకి వచ్చే అవకాశం ఉంది.
మహీంద్రా బీఈ 09.. ఈ కారు దాదాపు రూ. 45లక్షల వరకూ ఉంటుందని అంచనా వేస్తున్నారు. ఇది మహీంద్రా నుంచి రాబోయే అతి పెద్ద ప్రీమియం ఎస్యూవీ. దీనిలో కొత్త ఇన్‌గ్లో(ఐఎన్జీఎల్ఓ) కాన్సెప్ట్ ను వినియోగిస్తోంది. దీనిలో బ్యాటరీ సింగిల్ చార్జ్ పై 450కిలోమీటర్లు రేంజ్ ఇస్తుంది. ఇది 2026 డిసెంబర్ లో మార్కెట్లోకి వచ్చే అవకాశం ఉంది.
మహీంద్రా ఎక్స్‌యూవీ.ఈ9.. ఇది కూపే స్టైల్లో స్పోర్టీయర్ లుక్ లో కనిపిస్తుంది. దీనిలో 60kwh, 80kwh సామర్థ్యాలతో కూడిన బ్యాటరీ ప్యాక్ లు ఉంటాయి. 175 కిలోవాట్ల సామర్థ్యంతో కూడిన ఫాస్ట్ చార్జింగ్ సపోర్టు ఉంటుంది. ఈ బ్యాటరీ సింగిల్ చార్జ్ పై 450 కిలోమీటర్ల రేంజ్ ఇస్తుంది. దీని ధర రూ. 38 లక్షలు ఉండే అవకాశం ఉంది. 2025 ఏప్రిల్ నాటికి మార్కెట్లో అందుబాటులోకి వచ్చే అవకాశం ఉంది.