SCSS: బెస్ట్ పెన్షన్ ప్లాన్ ఇదే.. ఒకసారి కడితే.. నెలనెలా వేలల్లో రాబడి..
ఇటీవల కాలంలో ఎక్కువ శాతం మంది పదవీవిరమణ ప్రణాళికను ముందు నుంచే అమలు చేస్తున్నారు. ఎందుకంటే మన సంపాదించే సమయంలో ఆర్థికంగా ఇబ్బందులు ఉండకపోవచ్చు గానీ, వృద్ధాప్యం వచ్చాక, ఒకరిపై ఆధారపడాల్సిన పరిస్థితి వస్తే చాలా అవస్థలు పడాల్సి వస్తుంది. అందుకే వ్యక్తులు సంపాదిస్తున్న సమయం నుంచే మంచి ప్రణాళికతో పొదుపును అలవాటు చేసుకుంటున్నారు. ముఖ్యంగా రిటైర్ మెంట్ తర్వాత నెలవారీ ఆదాయం ఉండేలా ప్లాన్ చేసుకుంటున్నారు. మీరు కూడా ఇలాంటి ఆలోచనలో ఉండి.. మంచి పదవీవిరమణ పథకం గురించి వెతుకుంటే ఈ కథనం మీకు బాగా ఉపకరిస్తుంది. కేంద్ర ప్రభుత్వం ఓ అద్భుతమైన పదవీవిరమణ పథకాన్ని అమలు చేస్తోంది. దీని పేరు సీనియర్ సిటిజెన్ సేవింగ్స్ స్కీమ్(ఎస్సీఎస్ఎస్). దీనికి సంబంధించిన పూర్తి వివరాలు ఇప్పుడు చూద్దాం..
ఎవరు అర్హులు.. పేరులోనే ఈ పథకం గురించి అర్థం అవుతుంది. సీనియర్ సిటిజెన్ సేవింగ్స్ స్కీమ్.. అంటే వయో వృద్ధులకు మాత్రమే ఈ పథకానికి అర్హులు. 60 ఏళ్లు పైబడిన వారు ఎవరైనా దీనిలో చేరొచ్చు. డిఫెన్స్ ఉద్యోగులు అయితే 50ఏళ్లకు ఖాతా ప్రారంభించొచ్చు.
అధిక వడ్డీ.. సీనియర్ సిటిజెన్ సేవింగ్స్ స్కీమ్(ఎస్సీఎస్ఎస్) పోస్టాఫీస్ లో ప్రారంభించొచ్చు. కేంద్ర ప్రభుత్వ భరోసా ఉంటుంది. దీనిలో అత్యధిక వడ్డీ వస్తోంది. ప్రస్తుతం 8.20శాతం అంటే సుకన్య సమృద్ధి యోజనతో సరిసమానంగా ఉంది. కనీసం రూ. 1000 నుంచి ఎంతైన పెట్టుబడి పెట్టొచ్చు. ఒకరు లేదా జీవిత భాగస్వామితో కలిసి అకౌంట్ ప్రారంభించవచ్చు.
సింగిల్ టైం ఇన్వెస్ట్మెంట్.. ఈ పథకంలో ఒకేసారి డబ్బులను పెట్టుబడి పెట్టాల్సి ఉంటుంది. కాల పరిమితి ఐదేళ్లుగా ఉంటుంది. ప్రతి మూడు నెలలకు ఒకసారి అంటే త్రైమాసికానికి వడ్డీ జమవుతుంది. కాలపరిమితి ముగిసిన తర్వాత మరో మూడేళ్లకు దీనిని పొడిగించుకునే అవకాశం ఉంటుంది.
నెలకు ఎంత వస్తుంది.. ఈ పథకంలో గరిష్ట పరిమితి గతంలో రూ. 15లక్షలుగా ఉండేది. 2023 బడ్జెట్ సమయంలో దీనిని రూ. 30లక్షలకు పెంచింది. మీరు ఒకేసారి రూ. 30లక్షలు పెట్టుబడి పెడితే ఏటా రూ. 2.46లక్షలు వడ్డీనే లభిస్తుంది. ఈ మొత్తాన్ని ప్రతి మూడు నెలలకు ఓసారి రూ. 61,500 చొప్పున మీకు అందిస్తారు.
పన్ను ప్రయోజనాలు.. ఆదాయపు పన్ను చట్టం సెక్షన్ 80సీ కింద పాత పన్ను విధానంలో కొంత పన్ను ప్రయోజనం ఈ పథకం ద్వారా లభిస్తోంది. ఒక ఆర్థిక సంవత్సరంలో రూ. 1.50లక్షల వరకూ పెట్టుబడులపై పన్ను ఆదా అవుతుంది.