కొత్త ఏడాది నుంచి రైల్వేలో భారీ మార్పులు.. ఈ 18 రైళ్లలో ప్రయాణిస్తే డబ్బులు ఆదా! కొత్త నంబర్లు ఇవే

Indian Railway Updates Telugu: భారతీయ రైల్వే ప్రయాణికులకు కీలక అప్‌డేట్ ఇచ్చింది. 2027 జనవరి 1 నుంచి పలు రైళ్ల వర్గీకరణ, నంబర్లలో మార్పులు చేయనుంది. ముఖ్యంగా నార్తర్న్ రైల్వే పరిధిలో నడిచే 18 రైళ్లను సూపర్‌ఫాస్ట్ కేటగిరీ నుంచి సాధారణ ఎక్స్‌ప్రెస్ రైళ్లుగా మార్చనున్నారు. దీంతో ఆయా రైళ్లలో ప్రయాణించే వారికి సూపర్‌ఫాస్ట్ సర్‌ఛార్జ్ భారం తగ్గనుంది. ఈ మార్పుల వల్ల ఢిల్లీ, బీహార్, పంజాబ్, ఉత్తరాఖండ్ రాష్ట్రాల మధ్య ప్రయాణించే వేలాది మంది ప్రయాణికులపై ప్రభావం పడనుంది. కొత్త ఏడాది నుంచి టికెట్లు బుక్ చేసుకునేవారు తప్పనిసరిగా కొత్త రైలు నంబర్లను గమనించాలి.

18 రైళ్లను సూపర్‌ఫాస్ట్ కేటగిరీ నుంచి ఎందుకు తొలగిస్తున్నారు?

రైల్వే బోర్డు నిబంధనల ప్రకారం బ్రాడ్‌గేజ్ రైలు సూపర్‌ఫాస్ట్ హోదా పొందాలంటే మొత్తం ప్రయాణంలో గంటకు కనీసం 55 కిలోమీటర్ల సగటు వేగాన్ని కలిగి ఉండాలి. రైలు ప్రయాణించే మొత్తం దూరం, తీసుకునే సమయాన్ని బట్టి ఈ వేగాన్ని లెక్కిస్తారు. అయితే నార్తర్న్ రైల్వే పరిధిలోని 18 రైళ్లు ఈ ప్రమాణాలను అందుకోవడం లేదని సమీక్షలో తేలింది. దీంతో వాటిని సాధారణ ఎక్స్‌ప్రెస్ రైళ్లుగా మార్చాలని నిర్ణయించారు. రైల్వే మార్గాల్లో రద్దీ, అదనపు హాల్టులు, స్టేషన్లలో ఎక్కువసేపు నిలపడం వంటి కారణాలతో రైళ్ల సగటు వేగం తగ్గుతుంది. అందువల్ల గరిష్ట వేగం మారకపోయినా మొత్తం ప్రయాణ సమయం పెరిగి సూపర్‌ఫాస్ట్ ప్రమాణాలను అందుకోలేకపోవచ్చు.

ప్రయాణికులకు ఎంత డబ్బు ఆదా అవుతుంది?

సూపర్‌ఫాస్ట్ రైళ్లలో ప్రయాణించేవారు సాధారణ టికెట్ ధరతో పాటు అదనంగా సూపర్‌ఫాస్ట్ సర్‌ఛార్జ్ చెల్లించాల్సి ఉంటుంది. ఇప్పుడు ఈ 18 రైళ్లు సాధారణ ఎక్స్‌ప్రెస్ కేటగిరీలోకి మారడంతో ఆ అదనపు ఛార్జీ తొలగిపోనుంది.

తరగతులను బట్టి ప్రయాణికులకు కలిగే అంచనా ఆదా ఇలా ఉంటుంది.

• స్లీపర్ క్లాస్: రూ.30
• ఏసీ 3 టైర్: రూ.45
• ఏసీ 3 టైర్ ఎకానమీ: రూ.45
• ఏసీ 2 టైర్: రూ.45
• ఏసీ చైర్ కార్: రూ.45
• ఫస్ట్ ఏసీ: రూ.75
• ఎగ్జిక్యూటివ్ క్లాస్: రూ.75

అయితే ఇది సూపర్‌ఫాస్ట్ సర్‌ఛార్జ్ తొలగింపు వల్ల కలిగే తగ్గింపు మాత్రమే. బేసిక్ టికెట్ ధరలో మార్పు కాదు.

కొత్త నంబర్లు పొందనున్న 18 రైళ్ల పూర్తి వివరాలు

జనవరి 1, 2027 నుంచి పాత నంబర్ల స్థానంలో కొత్త నంబర్లు అమల్లోకి వస్తాయి.
రైళ్ల పాత నంబర్లు – కొత్త నంబర్లు:

1. తనక్‌పూర్ నుంచి ఢిల్లీ వెళ్లే రైలు నంబర్ 12035ను 15317గా మార్చారు.
2. ఢిల్లీ నుంచి తనక్‌పూర్ వెళ్లే రైలు నంబర్ 12036ను 15318గా మార్చారు.
3. డెహ్రాడూన్ నుంచి కాఠ్‌గోదాం వెళ్లే రైలు నంబర్ 12091ను 15315గా మార్చారు.
4. కాఠ్‌గోదాం నుంచి డెహ్రాడూన్ వెళ్లే రైలు నంబర్ 12092ను 15316గా మార్చారు.
5. మొరాదాబాద్ నుంచి రామ్‌నగర్ వెళ్లే రైలు నంబర్ 25013ను 15313గా మార్చారు.
6. రామ్‌నగర్ నుంచి మొరాదాబాద్ వెళ్లే రైలు నంబర్ 25014ను 15314గా మార్చారు.
7. మొరాదాబాద్ నుంచి రామ్‌నగర్ వెళ్లే మరో రైలు నంబర్ 25035ను 15335గా మార్చారు.
8. రామ్‌నగర్ నుంచి మొరాదాబాద్ వెళ్లే మరో రైలు నంబర్ 25036ను 15336గా మార్చారు.
9. ఇస్లాంపూర్ నుంచి న్యూఢిల్లీ వెళ్లే రైలు నంబర్ 20801ను 18633గా మార్చారు.
10. న్యూఢిల్లీ నుంచి ఇస్లాంపూర్ వెళ్లే రైలు నంబర్ 20802ను 18634గా మార్చారు.
11. దర్భంగా నుంచి జలంధర్ సిటీ వెళ్లే రైలు నంబర్ 22551ను 15541గా మార్చారు.
12. జలంధర్ సిటీ నుంచి దర్భంగా వెళ్లే రైలు నంబర్ 22552ను 15542గా మార్చారు.
13. పాట్నీపుత్ర నుంచి చండీగఢ్ వెళ్లే రైలు నంబర్ 22355ను 13255గా మార్చారు.
14. చండీగఢ్ నుంచి పాట్నీపుత్ర వెళ్లే రైలు నంబర్ 22356ను 13256గా మార్చారు.
15. ముజఫర్‌పూర్ నుంచి ఆనంద్ విహార్ వెళ్లే రైలు నంబర్ 12557ను 15577గా మార్చారు.
16. ఆనంద్ విహార్ నుంచి ముజఫర్‌పూర్ వెళ్లే రైలు నంబర్ 12558ను 15578గా మార్చారు.
17. రాజ్‌గిర్ నుంచి న్యూఢిల్లీ వెళ్లే రైలు నంబర్ 12391ను 13291గా మార్చారు.
18. న్యూఢిల్లీ నుంచి రాజ్‌గిర్ వెళ్లే రైలు నంబర్ 12392ను 13292గా మార్చారు.

కర్ణాటకకు సంబంధించిన రైళ్ల నంబర్లలోనూ మార్పులు

మరోవైపు, సౌత్ వెస్ట్రన్ రైల్వే పరిధిలోనూ పలు రైళ్ల నంబర్లను మార్చనున్నారు. మైసూరు-కేఎస్ఆర్ బెంగళూరు-బెలగావి విశ్వమానవ ఎక్స్‌ప్రెస్ నంబర్లు 20676, 20675 స్థానంలో వరుసగా 16275, 16276 అమల్లోకి వస్తాయి. ఈ రైలును కూడా సూపర్‌ఫాస్ట్ కేటగిరీ నుంచి తొలగించనున్నారు. అలాగే మల్గుడి డైలీ ఎక్స్‌ప్రెస్, తిరుపతి-ఎస్‌ఎంవీటీ బెంగళూరు ఎక్స్‌ప్రెస్, ముంబై-తిరువనంతపురం గరీబ్ రథ్ సహా పలు రైళ్లకు కొత్త నంబర్లు కేటాయించారు. వీటిలో కొన్ని మార్పులు జనవరి 1 నుంచి అమల్లోకి వస్తుండగా, మరికొన్ని జనవరి 2, 3, 4 తేదీల్లో అమలవుతాయి. గరీబ్ రథ్ రైళ్లు కర్ణాటక తీర ప్రాంతంలోని కార్వార్, ఉడిపి, మంగళూరు మీదుగా ప్రయాణిస్తాయి.

ప్రయాణికులు ఏం చేయాలి?

జనవరి 1, 2027 తర్వాత ప్రయాణించాలనుకునేవారు టికెట్లు బుక్ చేసుకునే ముందు కొత్త రైలు నంబర్లను తనిఖీ చేసుకోవాలి. పాత నంబర్లతో సేవ్ చేసుకున్న ప్రయాణ వివరాలను కూడా మరోసారి పరిశీలించుకోవాలి. ముఖ్యంగా కర్ణాటక రైళ్ల విషయంలో మార్పులు అమల్లోకి వచ్చే తేదీలను గమనించాలి. ప్రయాణికులు రైళ్ల తాజా వివరాల కోసం నేషనల్ ట్రైన్ ఎంక్వైరీ సిస్టమ్ (NTES), అధికారిక రైల్వే రిజర్వేషన్ వెబ్‌సైట్‌ను పరిశీలించవచ్చు. లేదా 139 నంబర్‌కు కాల్ చేసి వివరాలు తెలుసుకోవచ్చు.