Crime News: హారన్ కొట్టినా తప్పుకోవా..? సైకిల్‌పై వెళ్తున్న చెవిటి వ్యక్తిని కత్తితో పొడిచి చంపిన బాలిక..
ద్విచక్రవాహనంపై వెళ్తుండగా.. తాను హారన్ కొడుతుంటే జరగడం లేదని బాలిక కత్తితో పొడిచి మరి చంపింది. ఈ దారుణ ఘటన ఛత్తీస్‌గఢ్‌లోని రాయ్‌పూర్‌ కంకలిపారా ప్రాంతంలో ఆదివారం చోటుచేసుకుంది.
Raipur shocking incident: క్షణికావేశంలో కొంతమంది దారుణాలకు పాల్పడుతున్నారు. ముందు వెనుక ఆలోచించకుండా సాటివారిపై దాడులు చేస్తూ ప్రాణాలు తీస్తున్నారు. తాజాగా ఓ బాలిక.. బధిర వ్యక్తి ప్రాణాలు తీసింది. రోడ్డుపై ద్విచక్రవాహనంపై వెళ్తుండగా.. తాను హారన్ కొడుతుంటే జరగడం లేదని బాలిక కత్తితో పొడిచి మరి చంపింది. ఈ దారుణ ఘటన ఛత్తీస్‌గఢ్‌లోని రాయ్‌పూర్‌ కంకలిపారా ప్రాంతంలో ఆదివారం చోటుచేసుకుంది. 15 ఏళ్ల బాలిక వికలాంగుడిని కత్తితో పొడిచి చంపినట్లు పోలీసులు తెలిపారు. మైనర్ ద్విచక్ర వాహనంపై వెళుతుండగా, సైకిల్‌పై వస్తున్న వినికిడి లోపం ఉన్న బాధితురాలి హారన్‌కు స్పందించకపోవడంతో దాడి చేసినట్లు పోలీసులు తెలిపారు. బాలికను అరెస్టు పోలీసులు రిమాండ్‌కు తరలించారు.
15 ఏళ్ల బాలిక తన తల్లితో కలిసి స్కూటర్‌పై వెళుతోంది. ఈ క్రమంలో సైకిల్‌పై వెళ్తున్న బాధితుడు సుదామ లాడర్‌ను అధిగమించేందుకు ఆమె పదే పదే హారన్ మోగించింది. అయితే సుదామ లాడర్ (40) బధిరుడు (దివ్యాంగుడు) కావడంతో అతనికి వినిపించలేదు. తనకు కావాలనే అడ్డుపడుతున్నాడని బాలిక కోపంతో తన స్కూటర్‌ను ఆపి, లాడర్‌పై అరవడం ప్రారంభించింది. ఆ తర్వాత బాలిక తన వద్ద ఉన్న కత్తితో సుదామ లాడర్ మెడపై పొడిచింది. దీంతో లాడర్ అక్కడికక్కడే కుప్పకూలాడు. గమనించిన స్థానికులు బాధితుడిని వెంటనే సమీప ఆసుపత్రికి తరలిస్తుండగా మార్గమధ్యంలోనే మృతి చెందాడు.
ఈ ఘటన తర్వాత బాలిక తన తల్లిని వదిలి అక్కడి నుంచి పారిపోయింది. వెంటనే రంగంలోకి దిగిన పోలీసులు మందిర్ హసౌద్ ప్రాంతంలో బాలికను అదుపులోకి తీసుకున్నారు. కత్తిని కూడా స్వాధీనం చేసుకున్నామని.. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
మరిన్ని జాతీయ వార్తల కోసం ఇక్కడ క్లిక్ చేయండి..
