కనికరం లేని యజమాని.. పెంపుడు కుక్క విసిగిస్తోందని దారుణంగా ఏం చేశాడో తెలుసా?

కొంతమంది పెంపుడు జంతువులను చాలా ఇష్టంగా చూసుకుంటారు. ప్రేమతో ఆదరిస్తారు. వాటితో గడుపుతూ మానసిక ఆనందాన్ని పొందుతారు. కానీ ఇక్కడ ఓ పెద్దాయన విచిత్రంగా ప్రవర్తించారు. పెంపుడు కుక్క విసిగిస్తోందని కారుకు కట్టేసి ఈడ్చుకెళ్లాడు. దీంతో అతడిపై జంతుప్రేమికులు మండిపడ్డారు. దీనికి సంబంధించిన వీడియో ఇప్పుడు సోషల్ మీడియాలో వైరల్‌గా మారింది.

కేరళలోని ఎర్నాకుళం జిల్లాలో యూసఫ్ అనే వ్యక్తి తన పెంపుడు కుక్క బాగా విసిగిస్తోందని దూరంగా విడిచిపెట్టి రావాలనుకున్నాడు. అందుకోసం ఏం ఆలోచించకుండా కుక్కను కారుకు కట్టి బలవంతంగా రోడ్డుపై ఈడ్చుకొని వెళ్లాడు. దీంతో కుక్క రోడ్డుపై బొర్లుతూ వస్తుండటంతో తీవ్రంగా గాయపడింది. ఈ విషయాన్ని గమనించిన ఓ యువకుడు తన సెల్‌ఫోన్‌లో ఈ తతంగాన్ని మొత్తం వీడియో తీసి సోషల్‌మీడియాలో అప్‌లోడ్ చేశాడు. అంతేకాకుండా యూసప్‌ని అడ్డుకొని ఆ కుక్కను ఎందుకు అలా హింసిస్తున్నావ్ అని అడిగితే .. నీ కెందుకు నీ పని నువ్ చూసుకో అంటూ నిర్లక్ష్యంగా సమాధానం చెప్పాడు. వెంటనే కుక్క మెడలో ఉన్న తాడు విప్పి అక్కడి నుంచి వెళ్లిపోయాడు.అయితే సోషల్‌ మీడియాలో ఈ వీడియో వైరల్ కావడంతో యూసప్ తీరుపై అందరు మండిపడుతున్నారు. అంతేకాకుండా జంతుప్రేమికులు అతడిపై యానిమల్ యాక్ట్ కింద కేసులు పెట్టారు. దీంతో పోలీసులు అతడిని అరెస్ట్ చేశారు. గాయపడిన కుక్కను పశువైద్య ఆస్పత్రికి పంపించి చికిత్స అందిస్తున్నారు.