స్మార్ట్ రింగ్ వర్సెస్ టెంపుల్ డివైజ్.. మానసిక ఒత్తిడిని కొలిచే కొత్త టెక్నాలజీ!
స్మార్ట్ రింగ్‌లు, ఫిట్‌నెస్ బ్యాండ్‌లకు భిన్నంగా, నుదుటిపై ధరించే టెంపుల్ అనే సరికొత్త బయోమెట్రిక్ డివైజ్ ఒత్తిడిని కొలిచే విధానంలో విప్లవాత్మక మార్పులు తెస్తోంది. భారత క్రికెటర్ శుభ్‌మన్ గిల్, బ్యాడ్మింటన్ స్టార్ పీవీ సింధు వంటి ప్రముఖ క్రీడాకారులు దీనిని పరీక్షిస్తున్నారు. సాధారణ డివైజ్‌లు చేతి వేళ్లు లేదా మణికట్టు ద్వారా హార్ట్ రేట్ వంటి వివరాలను సేకరిస్తే, టెంపుల్ డివైజ్ నేరుగా తల, నుదుటి భాగంలో మెదడు రక్త ప్రసరణ సంకేతాలను గమనిస్తుంది. పూర్తి వివరాలు ఇప్పుడు చూద్దాం..
ప్రస్తుత టెక్నాలజీ యుగంలో ఆరోగ్యాన్ని, ఫిట్‌నెస్‌ను ట్రాక్ చేయడానికి స్మార్ట్ వాచ్‌లు, ఫిట్‌నెస్ బ్యాండ్‌లు, స్మార్ట్ రింగ్‌లు విస్తృతంగా ఉపయోగపడుతున్నాయి. అయితే, వీటి అన్నింటికి భిన్నంగా, సరికొత్తగా నుదుటిపై ధరించే టెంపుల్ అనే వినూత్న బయోమెట్రిక్ డివైజ్ ప్రస్తుతం ప్రపంచవ్యాప్తంగా చర్చనీయాంశమైంది. భారత క్రికెట్ స్టార్ శుభ్‌మన్ గిల్, ప్రముఖ బ్యాడ్మింటన్ క్రీడాకారిణి పీవీ సింధు వంటి అగ్రశ్రేణి అథ్లెట్లు ఈ డివైజ్‌ను ప్రాక్టీస్ సెషన్లలో ధరించి పరీక్షించడం విశేషం.
టెంపుల్ డివైజ్ ప్రత్యేకత ఏమిటి?
సాధారణంగా మనం వాడే స్మార్ట్ రింగ్‌లు లేదా ఫిట్‌నెస్ ట్రాకర్లు వేలు లేదా మణికట్టుపై ఉండి, హార్ట్ రేట్, శరీర ఉష్ణోగ్రత, నిద్ర విధానం వంటి ప్రాథమిక అంశాలను మాత్రమే కొలుస్తాయి. కానీ, టెంపుల్ డివైజ్ నేరుగా నుదుటిపై అంటుకుని పనిచేస్తుంది. ఇది శరీరంలోని కేంద్రీకృత నాడీ వ్యవస్థ, మెదడు రక్త ప్రసరణ తీరును నిశితంగా పరిశీలిస్తుంది.
అథ్లెట్లకు ఇది ఎందుకు ముఖ్యం?
క్రీడా రంగంలో అలసట అనేది కేవలం కండరాల నొప్పులకు మాత్రమే పరిమితం కాదు. క్రికెట్ లేదా బ్యాడ్మింటన్ వంటి వేగవంతమైన ఆటలలో క్రీడాకారుల మెదడు నిరంతరం సెకన్ల వ్యవధిలో కీలక నిర్ణయాలు తీసుకోవాల్సి ఉంటుంది. దీనివల్ల శారీరకంగా కోలుకున్నప్పటికీ, మెదడు తీవ్రమైన మానసిక మరియు నాడీ సంబంధిత అలసటకు గురవుతుంది. టెంపుల్ డివైజ్ ఈ మానసిక భారాన్ని, ఒత్తిడిని కచ్చితంగా అంచనా వేయగలదు.
టెంపుల్ వర్సెస్ స్మార్ట్ రింగ్ – ముఖ్యమైన తేడాలు:
అమర్చే విధానం: స్మార్ట్ రింగ్‌ను వేలికి ధరిస్తారు. కానీ టెంపుల్ డివైజ్‌ను నుదుటి పక్క భాగంలో ప్రత్యేక గ్రిప్స్‌తో అతిపించుకుంటారు.
సమాచార సేకరణ: స్మార్ట్ రింగ్ పరిధీయ నాడీ సంకేతాలను సేకరిస్తే, టెంపుల్ డివైజ్ మెదడు రక్త ప్రసరణ సంబంధిత సంకేతాలను విశ్లేషిస్తుంది.
ప్రధాన ఉద్దేశం: స్మార్ట్ రింగ్‌లు సాధారణ ఆరోగ్య పర్యవేక్షణకు ఉపయోగపడగా, టెంపుల్ డివైజ్ మానసిక ఒత్తిడి, అలసట, రికవరీ స్థాయిలను లోతుగా అంచనా వేస్తుంది.
ఈ వినూత్న టెక్నాలజీ ద్వారా అథ్లెట్లు తమ శారీరక ఆరోగ్యంతో పాటు మానసిక సామర్థ్యాన్ని కూడా మెరుగుపరుచుకోవడానికి వీలవుతుంది. భవిష్యత్తులో ఆరోగ్యాన్ని, ఒత్తిడిని విశ్లేషించే విధానంలో ఇదొక పెద్ద విప్లవంగా మారనుందని నిపుణులు భావిస్తున్నారు.
మరిన్ని లైఫ్ స్టైల్ న్యూస్ కోసం క్లిక్ చేయండి..