వంట నూనెను స్టవ్ పక్కనే పెడుతున్నారా? ఇంటిల్లిపాది ఆరోగ్యం డేంజర్లో పడినట్టే..!
మన రోజువారీ వంటింటి పనుల్లో వేగం కోసం, వంట చేసేటప్పుడు సులభంగా అందుతుందనే ఉద్దేశంతో చాలామంది చేసే సాధారణ పొరపాటు వంట నూనె డబ్బా లేదా సీసాను గ్యాస్ స్టవ్ పక్కనే ఉంచడం. చూడటానికి ఇది చిన్న విషయంగా అనిపించినప్పటికీ, దీనివల్ల నూనె నాణ్యత దెబ్బతినడమే కాక మన ఆరోగ్యానికి తీవ్ర హాని జరుగుతుందని ఆహార నిపుణులు హెచ్చరిస్తున్నారు. స్టవ్ పక్కన నూనె ఉంచడం వల్ల కలిగే నష్టాలేంటో ఇప్పుడు చూద్దాం..
Updated on: Jul 21, 2026 | 7:35 PM
వంటింట్లో సులభంగా అందుబాటులో ఉంటుందని చాలామంది వంట నూనె సీసాలను స్టవ్ పక్కనే ఉంచుతుంటారు. కానీ, ఇది తీవ్రమైన ఆరోగ్య సమస్యలకు దారితీసే పెద్ద పొరపాటు అంటున్నారు ఆరోగ్య నిపుణులు.. ఎందుకంటే..వంట చేసేటప్పుడు స్టవ్ నుంచి వచ్చే విపరీతమైన వేడి, సెగ నూనె సీసాపై నిరంతరం పడుతుంటాయి. ఈ అధిక ఉష్ణోగ్రత వల్ల నూనెలోని యాంటీఆక్సిడెంట్లు, ఆరోగ్యకరమైన కొవ్వులు వేగంగా విచ్ఛిన్నమై నాశనమవుతాయి.
వేడి, వెలుతురు ప్రభావం వల్ల నూనె త్వరగా ఆక్సీకరణకు గురవుతుంది. దీనివల్ల నూనె రంగు మారడం, వికారమైన దుర్వాసన రావడం జరుగుతుంది. ఇలా పాడైన నూనెతో వండిన ఆహారం రుచి తగ్గడమే కాక, కడుపులో ఎసిడిటీ, గ్యాస్, జీర్ణ సమస్యలకు దారితీస్తుంది.
ఎక్కువమంది నూనెను ప్లాస్టిక్ సీసాలలోనే నిల్వ చేస్తుంటారు. స్టవ్ వేడికి ప్లాస్టిక్ కరిగి, అందులోని BPA (బిస్ఫెనాల్-ఎ) వంటి ప్రమాదకరమైన రసాయనాలు నూనెలో కలిసే అవకాశం ఉంది. ఇది దీర్ఘకాలంలో హార్మోన్ల అసమతుల్యతకు, ఇతర తీవ్ర ఆరోగ్య రుగ్మతలకు కారణమవుతుంది.
నూనెను సురక్షితంగా నిల్వ చేసే సరైన పద్ధతులు:
వంట నూనెను ఎప్పుడూ ప్రత్యక్ష సూర్యకాంతి, వేడి తగలని చల్లని, పొడి ప్రదేశంలో ఉంచాలి. కిచెన్ క్యాబినెట్ లేదా తలుపులు ఉన్న షెల్ఫ్లు దీనికి సరైన ప్రదేశాలు. అలాగే, వంట నూనెను ప్లాస్టిక్ డబ్బాల్లో కాకుండా గాజు లేదా స్టీలు సీసాలలో భద్రపరచుకోవడం ఎంతో సురక్షితం. లేదంటే, గాలిలోని ఆక్సిజన్ తగిలితే నూనె త్వరగా పాడవుతుంది. కాబట్టి, వాడిన వెంటనే మూతను గట్టిగా మూసి ఉంచాలి.
ఆరోగ్యకరమైన నూనెను ఎంచుకోవడం ఎంత ముఖ్యమో, దాన్ని సరైన పద్ధతిలో నిల్వ చేయడం కూడా అంతే ముఖ్యం. ఇకపై వంట నూనె సీసాను స్టవ్కు దూరంగా ఉంచి, మీ కుటుంబ ఆరోగ్యానికి రక్షణగా నిలవండి.
మరిన్ని లైఫ్ స్టైల్ న్యూస్ కోసం క్లిక్ చేయండి..
