మీరు వాడే నెయ్యి మంచిదా.. కల్తీదా..? ఇంట్లోనే సింపుల్గా ఇలా గుర్తించండి..
ఆరోగ్యానికి అమృతం లాంటిది దేశీ నెయ్యి.. కానీ అది కల్తీ అయితే మాత్రం గుండె జబ్బులకు, కాలేయ సమస్యలకు దారితీస్తుంది. ఈ మధ్య కాలంలో కల్తీ నెయ్యి దందాలు పెరుగుతున్న తరుణంలో, సామాన్య వినియోగదారులు అయోమయానికి గురవుతున్నారు. ఈ నేపథ్యంలో ఇంట్లోనే అందుబాటులో ఉండే వస్తువులతో నెయ్యి స్వచ్ఛతను ఎలా పరీక్షించవచ్చో తెలుసుకుందాం..
భారతీయ వంటకాల్లో నెయ్యికి ఉన్న ప్రాధాన్యతే వేరు. పప్పులో వేసుకున్నా, స్వీట్లు చేసినా నెయ్యి ఉంటేనే ఆ రుచి వస్తుంది. అయితే మార్కెట్లో పెరుగుతున్న డిమాండ్ను ఆసరాగా చేసుకుని కేటుగాళ్లు కల్తీ నెయ్యితో ప్రజల ఆరోగ్యంతో చెలగాటమాడుతున్నారు. మరి మనం తినే నెయ్యి స్వచ్ఛమైనదేనా? అని తెలుసుకోవడం ఎలా? ప్రయాగ్రాజ్కు చెందిన పాల వ్యాపారి సుమిత్ యాదవ్, ఇతర నిపుణులు సూచించిన సులభమైన చిట్కాలు ఇక్కడ ఉన్నాయి.
అచ్చమైన నెయ్యి లక్షణాలు ఇవే
స్వచ్ఛమైన దేశీ నెయ్యిని దాని సువాసన, రంగు మరియు రూపం ద్వారా గుర్తు పట్టవచ్చు
గరుకుదనం: అసలైన నెయ్యి కొద్దిగా పూస పూసగా (గరుకుగా) ఉంటుంది.
వాసన: దీని వాసన చాలా సహజంగా, ఆహ్లాదకరంగా ఉంటుంది.
కృత్రిమ రంగు: కల్తీ నెయ్యి ఘాటైన వాసన కలిగి ఉండి, చూడ్డానికి జిగటగా లేదా కృత్రిమమైన పసుపు రంగులో ఉండవచ్చు.
ఇంట్లోనే చేసుకోదగ్గ 3 సులభమైన పరీక్షలు
అరచేతి పరీక్ష :
మీ అరచేతిలో కొద్దిగా నెయ్యి వేసుకోండి. అది కేవలం శరీర ఉష్ణోగ్రతకే త్వరగా కరిగిపోయి, సువాసన వస్తుంటే అది స్వచ్ఛమైన నెయ్యి. ఒకవేళ కరగడానికి సమయం పట్టినా లేదా జిగటగా అనిపించినా అది కల్తీ అని అనుమానించాలి.
వేడినీటి పరీక్ష:
ఒక గ్లాసు వేడి నీటిలో ఒక చెంచా నెయ్యి వేయండి. అది నీటిపై తేలి, పూర్తిగా కరిగిపోయి ఏకరీతిగా కనిపిస్తే అది అసలైనది. అలా కాకుండా నీటిలో విడివిడి పొరలు లేదా తెల్లటి గడ్డల్లా కనిపిస్తే అందులో వెజిటబుల్ ఆయిల్ లేదా ఇతర నూనెలు కలిసినట్లు లెక్క.
అయోడిన్ పరీక్ష:
నెయ్యిలో పిండి పదార్థం కలిపారో లేదో తెలుసుకోవడానికి ఇది అద్భుతమైన మార్గం. కొద్దిగా నెయ్యి తీసుకుని అందులో రెండు చుక్కల అయోడిన్ కలపండి. నెయ్యి రంగు నీలం రంగులోకి మారితే, అందులో బంగాళదుంప పిండి లేదా ఇతర స్టార్చ్ కలిపినట్లు నిర్ధారించుకోవచ్చు.
డబుల్ బాయిలర్ పరీక్ష:
మరో సులభమైన మార్గం ఏమిటంటే.. నెయ్యిని కరిగించి ఒక సీసాలో పోసి, అందులో కొద్దిగా చక్కెర కలిపి బాగా ఊపండి. కాసేపటి తర్వాత సీసా అడుగున ఎరుపు రంగు కనిపిస్తే, అందులో డాల్డా కలిపారని అర్థం.
నెయ్యి కొనేటప్పుడు ఈ జాగ్రత్తలు తప్పనిసరి
ధరను గమనించండి: స్వచ్ఛమైన దేశీ నెయ్యి తయారీకి కనీసం 20 నుండి 25 లీటర్ల పాలు అవసరమవుతాయి. కాబట్టి మార్కెట్ ధర కంటే తక్కువ ధరకు నెయ్యి లభిస్తుందంటే అది ఖచ్చితంగా కల్తీ అయ్యే అవకాశం ఉంది.
లేబుల్ చెకింగ్: ఎల్లప్పుడూ విశ్వసనీయమైన బ్రాండ్లు లేదా అగ్మార్క్ సర్టిఫికేషన్ ఉన్న ఉత్పత్తులనే ఎంచుకోండి.
ప్యాకేజింగ్: ప్యాకింగ్ తేదీ మరియు ‘బెస్ట్ బిఫోర్’ వివరాలను తప్పక చూడండి.
నెయ్యి మన ఆరోగ్యానికి మేలు చేసే గొప్ప ఆహారం. కానీ అది కల్తీ అయితే మాత్రం గుండె జబ్బులు, కాలేయ సమస్యలకు దారి తీస్తుంది. కాబట్టి సోషల్ మీడియాలో వైరల్ అవుతున్న వీడియోల ఆధారంగా లేదా పైన చెప్పిన ప్రాథమిక పరీక్షల ద్వారా అప్రమత్తంగా ఉండండి. ఏదైనా సందేహం ఉంటే ప్రయోగశాల పరీక్ష చేయించుకోవడమే ఉత్తమం.